စစ်အာဏာရှင် ကျဆုံးရေးအတွက် မကွေးမြို့မှာ ဖေဖော်ဝါရီ ၂၅ ရက်နေ့မနက်ပိုင်းက လူဦးရေသောင်းချီ သပိတ်မှောက် ဆန္ဒပြခဲ့ကြပါတယ်။
ပညာရေးဝန်ထမ်းများ သပိတ်စစ်ကြောင်း၊ စိုက်ပျိုးတောင်သူတွေနဲ့ ကျေးရွာပေါင်းစုံ စုပေါင်းသပိတ်စစ်ကြောင်း၊ မကွေး အင်ဂျင်နီယာများ သပိတ်စစ်ကြောင်း၊ ဗမာ့နွေဦးတော်လှန်ရေး စစ်ကြောင်းတွေက ဦးဆောင်ပြီးတော့ CDM လုပ်နေတဲ့ ဝန်ထမ်းတွေ၊ ကျောင်းသားလူငယ်တွေနဲ့ ပြည်သူတွေပူးပေါင်းပြီးတော့ စစ်အာဏာရှင်ကျဆုံးရေးအတွက် ချီတက် သပိတ်မှောက်ခဲ့ကြတာပါ။
ဂီတပညာရှင်တွေ၊ အနုပညာရှင်တွေကတော့ ရွေ့လျားစနစ်နဲ့ သီဆိုဆန္ဒပြနေကြပြီး မကွေးတက္ကသိုလ်ရှေ့မှာတော့ ကျောင်းသားလူငယ်တွေနဲ့မြို့ခံပြည်သူတွေ အထိုင်သပိတ် ဆင်နွှဲနေကြပါတယ်။
မကွေးမြို့က လမ်းတစ်ချို့မှာ စစ်တပ်နဲ့ ရဲတပ်ဖွဲ့ဝင်တွေက ပိတ်ဆို့တားဆီးတာတွေရှိနေပြီး ဌာနဆိုင်ရာရုံးတစ်ချို့နဲ့ မြန်မာ့စီးပွားရေးဘဏ်အပြင် ပုဂ္ဂလိက ဘဏ်ရှေ့တွေမှာ လုံခြုံရေး ယူထားတာ တွေ့ရပါတယ်။
စစ်အာအာရှင်ကျဆုံးရေး ဆန္ဒပြရာမှာ ဦးဆောင်တဲ့သူတွေကို ရဲတပ်ဖွဲ့က လိုက်လံဖမ်းဆီးတာတွေ ရှိနေတာကြောင့် ဦးဆောင်တဲ့သူတချို့ တိမ်းရှောင်နေရတယ်လို့ မကွေးမြို့ခံတွေဆီကနေ သိရပါတယ်။
သတင်း-မင်းထီး
