ဧရာဝတီတိုင်းဒေသကြီးအတွင်းက လပွတ္တာ၊ မော်ကျွန်းနဲ့ မအူပင်မြို့နယ်တွေမှာ စစ်အာဏာရှင် အလိုမရှိကြောင်း ဖေဖော်ဝါရီ ၁၁ ရက်နေ့ မနက်ပိုင်းက လူအင်အား သိန်းချီ ဆန္ဒပြခဲ့ကြပါတယ်။
စစ်အာဏာရှင် အလိုမရှိ၊ ဖမ်းဆီးခံထားရသူများ ပြန်လွှတ်ပေးရေး၊ ဒီမိုကရေစီရရှိရေး ဆန္ဒဖော်ထုတ်တာတွေပြုလုပ်ခဲ့ပြီး ဒုတိယမြောက်နေ့မှာတော့ ဘုန်းတော်ကြီးတွေ၊ ပညာရေး ဝန်ထမ်းတွေအပြင် အလွှာပေါင်းစုံက ပြည်သူတွေပါဝင်လာခဲ့တာပါ။
စစ်အာဏာရှင်အလိုမရှိကြောင်း ဆန္ဒပြမှုတွေမှာ ပုဒ်မ ၁၄၄ ထုတ်ပြန်ပြီးတဲ့နောက်ပိုင်းမှာ လူအင်အား ပိုများလာသလို ဌာနဆိုင်ရာဝန်ထမ်းတွေလည်း ပူးပေါင်းမှု ပိုများလာတယ်လို့ ဦးဆောင်သူတွေက ပြောပါတယ်။
အာဏာရှင်အလိုရမရှိတဲ့ ဆန့်ကျင်ဆန္ဒပြမှုတွေမှာ ကျန်းမာရေး၊ ဥပဒေ၊ ထွေအုပ်၊ စည်ပင်၊ လျှပ်စစ်၊ သစ်တောဝန်ထမ်းတွေနဲ့ ရှေ့နေတွေလည်း ပါဝင်လာတယ်လို့ သိရပါတယ်။
စစ်အာဏာရှင်ဆန့်ကျင်ရေး ဆန္ဒပြပွဲတွေကို နိုင်ငံအနှံ့ပြုလုပ်နေပြီး ရက်ကာလကြာရှည်လာတာနဲ့အမျှ ဆန္ဒပြမှုပုံစံတွေလည်း ပြောင်းလည်လာကာ စစ်တပ်နဲ့ ရဲတပ်ဖွဲ့ကတော့ ခေါင်းဆောင်သူတွေကို ညပိုင်းမှာ လိုက်လံဖမ်းဆီးနေပါတယ်။
မင်းထက်မုန်း
