မိုးကုတ်မြို့တွင်း ကိုဗစ်-၁၉ ကူးစက်ခံရသူတွေ့ရှိသဖြင့် စည်းကမ်းလိုက်နာကြရန်တိုက်တွန်း
DVB
·
December 29, 2020
မန္တလေးတိုင်း၊ မိုးကုတ်မြို့နယ်မှာ ခရီးသွားရာဇဝင်မရှိတဲ့ မြို့တွင်း ကိုဗစ်-၁၉ ကူးစက်ခံရတဲ့ အတည်ပြုလူနာ တစ်ယောက်ကို ဒီဇင်ဘာ ၂၈ ရက်က တွေ့ရှိခဲ့တယ်လို့ ကိုဗစ်-၁၉ ရောဂါ ထိန်းချုပ်ရေးကော်မတီက ပြောပါတယ်။
ပိုးတွေ့သူဟာ နေမကောင်းတာကြောင့် ဆေးရုံမှာ ဆေးလာစစ်တဲ့အခါမှာ ကိုဗစ်-၁၉ ရောဂါပိုးတွေ့ရှိခဲ့တာဖြစ်ပြီး မိုးကုတ်မြို့တွင်းမှာ နေထိုင်နေသူ ဖြစ်ပါတယ်။ အဆိုပါ လူနာဟာ ခရီးသွားရာဇဝင်မရှိထားသလို ပိုးတွေ့လူနာနဲ့လည်း ထိတွေ့ထားမှုမရှိဘူးလို့ သိရပါတယ်။ လက်ရှိ ပိုးတွေ့လူနာနဲ့ သူ့ရဲ့ မိသားစုကို ကွာရန်တင်းစင်တာကို ပို့ဆောင်ထားပါတယ်။
မိုးကုတ်မြို့မှာ ကိုဗစ်-၁၉ ပိုးတွေ့လူနာစုစုပေါင်း ၃၂ ယောက်ရှိပြီး ၂၈ ယောက် ဆေးရုံဆင်းရကာ ကျန်တဲ့ပိုးတွေ့လူနာတွေက ကျန်းမာရေးကောင်းမွန်နေတယ်လို့ သိရပါတယ်။ မိုးကုတ်မှာ ကွာရန်တင်းစင်တာ ၃ ခု ရှိပြီး ကွာရန် တင်းဝင်နေသူ စုစုပေါင်း ၂၁၂ ယောက် ရှိပါတယ်။
မိုးကုတ်မြို့တွင်းမှာ ကိုဗစ်-၁၉ ပိုးကူးစက်မှုစတင်နေပြီဖြစ်တာကြောင့် စည်းကမ်း သတ်မှတ်ချက်တွေကို စနစ်တကျလိုက်နာပေးဖို့ မြို့နယ် ကိုဗစ်-၁၉ ရောဂါ ထိန်းချုပ် ကာကွယ်ရေးကော်မတီက တိုက်တွန်းထားပါတယ်။
သတင်း - ဟန်နာထက်အောင်၊ ဓာတ်ပုံ - ပါရမီ
