“ကြည်အေး ၄ နှစ်ပြည့်” “မေတ္တာမီးအိမ်”၊ “နွမ်းလျအိမ်ပြန်” “မှန်၏မောင်ရိပ်”၊ “တောတောင်ရေမြေ” “မောင်ကိုကို နှင့် မြနန္ဒာ” စာအုပ်တွေရေး၊ ကဗျာရေးသူ ကြည်အေး တဲ့ကျော်၊ စာဆိုတော်ကား နှုတ်ဆက်သွားတာ၊ လေးနှစ်ကြာပြီ။ ။ “ကြည်အေး” ဆိုတာ ကဗျာဆရာမပါလို့ ကဗျာဆရာကြီး ဒဂုန်တာရာက “ကြည်အေး ၏ ကဗျာများ” စာအုပ်မှာ ရေးခဲ့တယ်။ ကဗျာဆရာမကြီး၊ စာရေးဆရာမကြီး ကြည်အေး အမည်ရင်း ဒေါ်ကြည်ကြည် (ခ) ဒေါ်သောင်းကြည် (၈၇ နှစ်) ဟာ ၂၀၁၆ ခု ဒီဇင်ဘာ ၂၈ ရက်က အမေရိကန်ပြည်ထောင်စု နယူးယောက်မြို့မှာ  ကွယ်လွန်သွားခဲ့တာပါ။ သူရေးခဲ့တဲ့ “နွမ်းလျအိမ်ပြန်”၊  “မီ”၊ “တမ်းတတတ်သည်”၊ “ကျွန်မပညာသည်”၊ “အပြင်ကလူ”၊ “ဖုန်းသက်တိုင်”၊ “မေတ္တာမီးအိမ်”၊ “မောင်ကိုကိုနှင့် မြနန္ဒာ”၊ “ကြည်အေး၏ ကဗျာများ” စတဲ့ စာအုပ်တွေဟာ လူကြိုက်များ ထင်ရှားပါတယ်။ အခု ၂၀၂၀ ခုနှစ် ဒီဇင်ဘာ ၂၈ ရက်မှာ ဆရာမကြီး ကြည်အေး ကွယ်လွန်ခဲ့တာ ၄ နှစ် ပြည့်ပါပြီ။ ကျွန်တော် ကြည်အေးကို သိတာတခုပဲရှိသည်။  သူမသည် ကဗျာဆရာမ၊ သူမ၏ ခံစားမှု (ဝါ) ရင်ခုန်သံကို ဖွဲ့နွဲ့သူဖြစ်သည်။ ထို့ကြောင့် ကြည်အေးသည် ကဗျာဆရာမ၊  ခံစားမှုကို လိမ်၍မရ၊ အတုလုပ်၍မရ။   (ဒဂုန်တာရာ)  ကြည်အေး၏ကဗျာများစာအုပ်အမှာ “ကြည်အေးရဲ့ ဘဝအကြောင်း” ကြည်အေး (၁၃ ဒီဇင်ဘာ ၁၉၂၉–၂၈ ဒီဇင်ဘာ ၂၀၁၆) ဟာ အမျိုးသမီး စာရေးဆရာ၊ ဆရာဝန်တစ်ဦးပေါ့။ ၁၉၂၉ ဒီဇင်ဘာ ၁၃ ရက် ရန်ကုန်မြို့ လှည်းတန်းမှာ မွေးတယ်။ မိဘနှစ်ပါးက ဦးဟန်၊ ဒေါ်ငွေယုန်တို့ဖြစ်တယ်။  ကြည်အေးရဲ့ နာမည်ရင်းက ကြည်ကြည်တင်မြင့် (ခေါ်) ဒေါ်သောင်းကြည်။ တတိယတန်း ပညာသင်ဆဲမှာ  ဒုတိယကမ္ဘာစစ် ဖြစ်လို့ စစ်ဘေးကင်းလွတ်တဲ့ တောရွာ၊ တောမြို့တွေမှာ အချိန်ကုန်ခဲ့တယ်။ စစ်ပြီးစ အင်္ဂလိပ်သဒ္ဒါဆရာ မစ္စတာ မေတျာဆီမှာ ၆ လ အင်္ဂလိပ်စာ လေ့လာခဲ့တယ်။ ကွမ်းခြံကုန်းမြို့မှာ စစ်ပြေးချိန်ကတည်းက စာပေဗိမာန်ဆရာတွေက သင်တန်းတခု ပေးခဲ့တာမှာ  ဦးဝန်(မင်းသုဝဏ်) ရဲ့ မြန်မာစာ၊ ဆရာတက်တိုးရဲ့ အင်္ဂလိပ်စာနဲ့ သတင်းစာလုပ်ငန်း၊ ဒေါ်ခခွေးရဲ့ Psychology၊ ဒေါ်မမကြီးရဲ့ ကမ္ဘာ့သမိုင်း သင် တန်းတွေကို တက်ရောက်ခဲ့ပြီး ဖြစ်တယ်။ ဒါကြောင့် စစ်ပြီးတဲ့အခါ ကျောင်းနှစ်နှစ်လောက် ပြန်တက်ပြီး ဆယ်တန်းစာမေးပွဲ အောင်တယ်။ ၁၉၄၈ ခု ရန်ကုန်တက္ကသိုလ် ရောက်သည်။ ဆေးပညာ တတိယနှစ်မှာ ကျောင်းထွက်ခဲ့ရတယ်။ အဲ့သည်နောက် ဝိဇ္ဇာစာမေးပွဲ ကို အောင်မြင်တယ်။  သူ့ရဲ့ ပထမဆုံးဝတ္ထု “ထိုည” ဝတ္ထုတိုကို တာရာမဂ္ဂဇင်း (အတွဲ-၁၊ အမှတ်-၄)မှာ ဖော်ပြခံရ တယ်။ ကြည်အေး ကလောင်အမည် ယူခဲ့တာကတော့ ဂျပန်တော်လှန်ရေးမှာ ကျဆုံးခဲ့ရတဲ့ အစ်ကိုရဲ့ သူငယ်ချင်း ကိုဗကြည် ရဲ့ ပုံနှိပ်မခံရတဲ့ ကလောင်နာမည်ကို ယူခဲ့တာ။ ကြည်အေးဟာ ငယ်ကတည်းက ကဗျာကို စပ်ဆိုနိုင်ခဲ့တယ်လို့ ဆိုကြတယ်။ ပိုက်ဆံ- ပိုက်ဆံ အမှန်တကယ်ပျောက် ဘယ်သူ ပျောက်ပျောက် ဘယ်သူ ကောက်ကောက် အမအိတ်ထဲရောက် - ဂျောက် (ကြည်အေး) ၇ နှစ် အရွယ် ပထမဆုံးစပ်ခဲ့တဲ့ကဗျာ၊ ကြည်အေး၏ကဗျာများစာအုပ်မှ သူငယ်စဉ်က ရေးခဲ့တဲ့ ကဗျာတွေနဲ့ ပတ်သက်ပြီး ဆရာမကြည်အေးက  “ကဗျာစာဆိုတဦး ကဗျာတွေကို  ငယ်ရာကစ ဘယ်လို ရေးခဲ့သလဲ ဆိုတာ  Study လုပ်ချင်ရင်တော့  ကျွန်မရဲ့ ငယ်စဉ် ကဗျာလေးတွေက လိုအပ်မှာပါ။”   လို့ ကြည်အေး၏ ကဗျာများ စာအုပ် အမှာစာမှာ ရေးထားခဲ့ပါတယ်။ ကြည်အေးရဲ့ ငယ်ဘဝ ဒုတိယမြောက်ကဗျာကိုလဲ ဖတ်ကြည့်ကြပါဦး။ ဒုတိယကမ္ဘာစစ်အတွင်း စစ်ပြေးရင်း ကွမ်းခြံကုန်းက ဆရာကြီးမင်းသုဝဏ်ရဲ့ သင်တန်းမှာ ကျောင်းသား တဉီးကို တပုဒ်စီ ရေးခိုင်းလို့ ရေးခဲ့တဲ့ကဗျာပေါ့။ ကြည်အေး စတုတ္တ္ထတန်းလောက်က ရေးခဲ့တဲ့ ကဗျာပါ။ ထန်းပင်အို ငုတ်တုတ်နဲ့ တဲ့ပုတ်ကဲ့ပျက်ပြို မိုးတွေကယို။  အိမ်ရှေ့ကမီးဖို၊ လေချိုကြောင့်ပြာတွေဖွေး။ တကြော်ကြော်အော်ကာရောင်းတယ် မုန့်ပေါင်းတဲ့လေး။ ။ (ကြည်အေး)  ၈ နှစ် ၉ နှစ်အရွယ်က စပ်ခဲ့သောကဗျာ၊ ကြည်အေး၏ကဗျာများစာအုပ်မှ ဆရာမ ကြည်အေးဟာ ၁၉၄၇ ခုနှစ်က မက်ထရစ်စာမေးပွဲကို မြန်မာပြည်တစ်ပြည်လုံး အတော်ဆုံး ၁၀ ဦးထဲပါပြီး  အောင်ခဲ့တယ်။ ၁၉၄၈ - ရန်ကုန်တက္ကသိုလ်တက်ပြီး ဆေးပညာ တတိယနှစ်က ကျောင်းထွက်လိုက်တယ်။ ဒါပေမဲ့ ဝိဇ္ဇာ စာမေးပွဲဖြေဆို အောင်မြင်ခဲ့ပြန်တယ်။ ရှေးသိပ်ကျတဲ့ မိဘတွေက သမီးမိန်းကလေး ပညာသင်တာကို လက်မခံ၊ အားမပေး တာမို့ ပညာရေးပျက်ပြား ဆေးတက္ကသိုလ်က ကျောင်းထွက်ခဲ့ရတာပါ။  စာရေးဆရာမကြီး ဒေါ်ခင်မျိုးချစ်၊ ဦးခင်မောင်လတ်တို့ ကျေးဇူးကြောင့် ဘီအေတန်းဖြေခွင့်ရ အောင်မြင်ခဲ့ရတာပါ။ ပြီးတော့ ရန်ကုန်တက္ကသိုလ် နည်းပြဆရာမလုပ်ပြီး နောက်ပိုင်းမှာ ဆေးပညာကို ပြန်သင်ယူတဲ့အတွက် ဆရာဝန်ဖြစ်တယ်။ ၁၉၅၃ မှာ ဘဏ်မန်နေဂျာ ဦးတင်မြင့်နဲ့ အိမ်ထောင်ကျပြီး သားသမီး ၆ ယောက် ထွန်း ကားတယ်။ သူမဟာ ၁၉၇၂ ခုနှစ် ဒီဇင်ဘာလ အမေရိကန်ကို ထွက်ခွာသွားခဲ့တယ်။ လွတ်လပ်ခွင့်ကို အလွန်အမင်း  ခုံမင်နှစ်သက်သောကြည်အေးသည်  ၁၉၆၂ ခု၊ အာဏာသိမ်း စစ်အစိုးရလက်အောက်  မြန်မာပြည်တွင် ဆက်နေရန်မဖြစ်နိုင်၊  နိုင်ငံခြားသွားရောက် နေထိုင်နိုင်ရန်  အင်္ဂလိပ်စာတော်ရုံလောက်နှင့် မလုံလောက်။  ထို့ ကြောင့် 3rd MB နှင့် ထွက်ခဲ့ရသော ဆေးသိပ္ပံတွင်ပြန်တက်၏။ ၁၉၇ဝ ခုတွင် MBBS ဘွဲ့ရ၊ ဆရာဝန်ဖြစ်ကာ ဆေးရုံကြီး၌လုပ်ခဲ့ စသဖြင့် စနစ်တကျ ပြင်ဆင်ခဲ့၏။ (မောင်အောင်မွန်)  ကြည်အေးကွယ်လွန်ပြီးစ ရေးသော မောင်အောင်မွန်၏ မိုးမခ အွန်လိုင်းဆောင်းပါးမှ . . .  “မိုးနှင့်မြေ” ပြုံးစရာလျှင် မာနလည်းကြွယ်၊ အလှမယ်က ထည်ဝါခါးထောက်၊ မာမောက်မောက်နှင့် စိတ်မြောက်စကားဆိုသတည်း။  “မောင့်လိုလူကို  ကြည်ဖြူလက်ကမ်း၊ ချစ်ဖို့လမ်းကား ကွာလှမ်းပလေ၊ မိုးနှင့်မြေ” တဲ့ အခြေတင်းပါလှသတည်း။ ပခုံးတွန့်၍ မြေပြန့်မိုးခြေ၊ ကြည့်မျှော်လေသော် မြေလည်းအပြာ၊ မိုးလည်းပြာ၍ အပြာချင်းယှက်၊ မိုးကုပ်စက်ဝယ် စပ်ဆက်မိုးမြေ၊ ထိတွေ့နေသည် မြေသည်မိုးနှင့်နီးသည်တကား။ ။  (ကြည်အေး) ပဒေသာမဂ္ဂဇင်း၊ ၁၉၄၅၊ မေ “အင်္ဂလန်ရောက် ဆရာဝန် ကဗျာဆရာမ ကြည်အေး” ကြည်အေးဟာ ၁၉၆၁ - ဘီဘီစီ လန်ဒန်မှာ တစ်နှစ်လောက် လုပ်ခဲ့တယ်။ ၁၉၇၁ - ၇၃ ခုနှစ်တွေမှာ ကြည်အေးဟာ အမေရိကန်နိုင်ငံ ချီကာဂိုမြို့မှာ  အလုပ်သင် ဆရာဝန်ဖြစ်လာခဲ့တယ်။ ၁၉၇၃ - ၇၆ - နယူးယောက်မြို့မှာ စိတ်ပညာ Residency နဲ့ အမေရိက အရှေ့မြောက်မြို့တွေမှာ ကထိက အထူးကု ဆရာဝန် ဖြစ်လာတယ်။ ၁၉၈၆ - ၈၈ - စင်စင်နက်တီ တက္ကသိုလ် စိတ်ရောဂါကုမှုပညာရပ်အဖွဲ့ဝင် (ဆယ် ကျော်သက်နဲ့ မိသားစုစိတ်ရောဂါကုမှုပညာရပ်)။ ၁၉၈၈ - ၂၀၀၁ - အင်္ဂလန်ကို ပြောင်းရွှေ့ပြီး အစိုးရဆေးရုံနဲ့ ပုဂ္ဂလိကဆေးရုံတွေမှာ အတိုင်ပင်ခံ သမားတော် လုပ်တယ်။ ၂၀၀၁ - အငြိမ်းစားယူ ခဲ့ပြီး စာပေ၊ ကဗျာတွေ ပိုရေးသားခဲ့တယ်။ သူ့အသက် ၈၇ နှစ်အရောက် ၂၀၁၆ - ဒီဇင်ဘာ ၂၈ ရက်နေ့ မနက် ခြောက်နာရီ ကျော် အမေရိကန်မှာ ကွယ်လွန်ခဲ့တယ်။  “အနုပညာကျွန်း” ရောက်ခဲ့ဖူးတယ် ယစ်မူးငြိမ့်လျော၊ လှေအမျောမှာ တယောလဲ့လဲ့၊ တီးတိုးနွဲ့ရင်း ဆိုဖွဲ့သီချင်း၊ ဖြည်းညှင်းညှင်းဆို ဟောဟိုမြေနု၊ သစ်ပင်စုနဲ့ အနုပညာကျွန်းကိုပေါ့။ အဲသည်မှာလေ စာပေကိုဖတ်၊ ကဗျာစပ်လိုက် ဆောက်အပ်တွေစု၊ ရုပ်တုထုလိုက် နုရင့်ရောင်တွဲ၊ ပန်းချီဆွဲလိုက် ရင်ထဲ ခုတောင် ခုန်သေးတယ်။ နေရစ်တော့နော် ကြော့ကြော့ကလေး၊ လအေးအေးအောက် ငှက်တေးသံညင်၊ မြေပေါ်စဉ်ဖိတ် ရေပြင်ညံ့အိ၊ သစ်နွယ်ငြိချိန် စိတ်၏အစာ၊ ငတ်ပြတ်ဆာတော့ ပြန်လာလည်ပတ်ပါဦးမယ်။ ။  (ကြည်အေး) တာရာမဂ္ဂဇင်း၊ အတွဲ ၄၊ အမှတ် ၂၇၊ ၁၉၄၉ “ကြည်အေးရဲ့ကလောင်ခွဲတခု” ကြည်အေးရဲ့ ကလောင်ခွဲတခုက မမိုးသူ ဖြစ်တယ်။ မမိုးသူ ကလောင်နဲ့ The Working Peoples Daily မှာ ဆောင်းပါးတွေ ရေးခဲ့တယ်။ ဆရာမကြီး ကြည်‌အေးဟာ တာရာမဂ္ဂဇင်းမှာ ကဗျာ အများဆုံး ရေးသားခဲ့တာပါ။ မဂ္ဂဇင်းကြီးတွေမှာ ကဗျာ၊ ဝတ္ထုတို၊ ဝတ္ထုရှည်၊ ပုံပြင်၊ ဘာသာပြန်တွေ ရေးသားခဲ့တယ်။ အတွေးအရေး ဆန်းသစ် တီထွင် ရဲတင်းမှုနဲ့အတူ ဖြစ်တည်မှု ပဓာန ဝါဒဆန်သော စာရေးဆရာမအဖြစ် ကျော်ကြားခဲ့ပါတယ် “ကြွေပွင့်ကိုသာ ကောက်ပါမောင်” ကိုင်းထိပ်ဖူးမှာ ပွင့်ဦးအသစ် ယခုလှစ်သည့် ရွှေရစ်ပန်းပြာ ခပ်မာမာလေး ။ လှမ်းမီပေမယ့် မောနေပါ့မယ် ခူးမလွယ်ဘူး ။ မြေဝယ်လျှောင်းစင်း မောင့်ခြေရင်းက သက်ဆင်းကြွေလွင့် ခရေပွင့်လေ။ အလွယ်လိုက်ပြီး အကြိုက်ဆင်သင့် လှမ်းကြိုနှင့်သည့် ကြွေပွင့်ကိုသာ ကောက်ပါမောင်ရယ်… ။ ။    (ကြည်အေး) ရှုမဝမဂ္ဂဇင်း၊ ၁၉၅၃၊ ဇန်နဝါရီ ( “နွမ်းလျအိမ်ပြန်” ဝတ္ထုမှ . . )  “ကြည်အေး ရေးသားထုတ်ဝေခဲ့သော စာအုပ်များ” “မီ” ပထမအကြိမ် ၁၉၆၀ ခုနှစ် (ဒု- ၁၉၉၅)၊ “တမ်းတတတ်သည်” ပထမအကြိမ် ၁၉၆၁ ခုနှစ် (ဒု- ၁၉၉၅)၊ “ကျွန်မပညာသည်” ပထမအကြိမ် ၁၉-- ခုနှစ် (ဒု- ၂၀၀၃)၊ “နွမ်းလျအိမ်ပြန်”၊ “ဖုန်းသက်တိုင်”၊ “မောင်ကိုကို နှင့် မြနန္ဒာ” ပထမအကြိမ် ၁၉၇၃ ခုနှစ် (ဒု- ၁၉၉၃)၊ “မေတ္တာမီးအိမ်” ပထမအကြိမ် ၁၉၇- ခုနှစ် (ဒု- ၁၉၉၄)၊ “ကြည်အေး၏ကဗျာများ” ပထမအကြိမ် ၁၉၉၀ ခုနှစ် (ဒု- ၁၉၉၂)၊ “ကြည်အေး၏ဝတ္ထုတိုများ(၁)” ပထမအကြိမ် ၁၉၉၁ “ကြည်အေး၏ဝတ္ထုတိုများ(၂)” ပထမအကြိမ် ၁၉၉၃၊ “ကြည်အေး၏ဝတ္ထုတိုများ(၃)” ပထမအကြိမ် ၁၉၉၃၊ “ဤမာန” ပထမအကြိမ် ၁၉၉၄ ၊ “ကြည်အေး၏ဝတ္ထုတိုများ(၄)” ပထမအကြိမ် ၁၉၉၅ ၊ “တောတောင်ရေမြေ” (ဘာသာပြန်) (၁၉၉၅) ၊ “အိပ်မက်”၊ “အပြင်ကလူ” (၁၉၉၆) ၊ “ညတစ်ည”၊ “စိမ်းမြညတစ်ည” (၁၉၉၇) ၊ အိပ်မက်၊ အပြင်ကလူ(၂) အေးရဲ့ဖွင့်ဟဝန်ခံချက် (၁၉၉၇) ၊ “ဖူးငုံပွင့်သစ်” (၁၉၉၈) ၊ “စိုးနှင့်ခိုင်” (၂၀၀၀) ၊ “မှန်၏မှောင်ရိပ်” (၂၀၀၁) “ကဗျာချစ်သူ” သံချိုစပ်ပါတဲ့ ကို ထပ်ခါတစ်ရာပြောရှာလည်း မောရုံရှိမယ် စိုးပါရဲ့ လွန်မိတယ် ရှေ့သာတိုးမယ်မို့ မျက်ရည်မိုးအုံ့ခဲ့ပြီ။ ကဗျာမိုက်ကိုမှ ကြိုက်လှတယ်၊ အဆိုလောရှာသမို့ မနက်စော သီဝေနေခိုက် စိတ်လေ လေပစေဦးရယ်နဲ့ တေချင်ပေချင်တဲ့ထုံးစံမို့ တစ်ရယ် နှစ်ရယ် သုံးရယ်ပေါ့ ကာရန်တွေ အလွတ်မရုန်းစေဘု လေးလုံးစပ် ကဗျာစီ။ ဘယ်သူရိုက်ရင်လည်း ခေါင်းငိုက်ခံပါ့မယ်ရှင့် ဘဝမှာ ဘာကိုတွယ်မလဲ ကဗျာရယ်စာရယ်ရှိရင်တဲ့ ကျေနပ်မိ ကပျာကသီ အသာတကြည်ပေါ့ထွက်ပြေး။ မေ့နိုင်ကောင်းပါရဲ့လို့ စိတ်ကိုပြောင်းစဉ်မှ ငြိမ့်ညောင်းသံချိုနှောပါ ခလှည့်လို့တော့ ငိုမဲ့ချင်အောင် မဖန်နှင့် ကံချွန်ရင် အံ့ဖွယ်ခန်းပါတဲ့ အလှမ်းတကယ် ဟာမှ လမသာ၊ ညကြီးမင်းကြီးပေါ့ ထပြီး ထိုင်ပွေနေမရှင့် အိပ်ရာတွေ တွန့်ကြေလိပ်ခါမှ ငိုတိတ်မယ်လေး။ ။  (ကြည်အေး) သွေးသောက်မဂ္ဂဇင်း၊ ဇွန်၊ ၁၉၅၃ ကြည်အေးကဗျာ၊ ဖော်ပြပါလျှင်၊ စာစဉ်မဆုံး၊ များလှဦးမှာမို့ သူ့ကဗျာတွေ သည်မှာတင်ရပ်လိုက်ပါတယ်။ ကြည်အေးဆိုတာ ကဗျာဆရာမကြီး၊ စာရေးဆရာကြီး၊ စိတ်ရောဂါ အထူးကု ကထိက ဆရာဝန်မကြီး၊ ရန်ကုန်တက္ကသိုလ် အင်္ဂလိပ်စာဆရာမ၊ ဘီဘီစီ အသံလွှင့်သတင်းသမား စသဖြင့် ဘဝစုံသူပါ။ သူမရဲ့ ကဗျာစာအုပ်မှာနဲ့ သူ့ဝတ္ထုတို သရုပ်ဖော်ပုံတွေကို သူမကိုယ်တိုင် ပန်းချီ ရေးဆွဲတာတာတွေလဲ ရှိခဲ့တာမို့ စုံသူလို့ ဆိုနိုင်တယ်။ ဖြစ်တည်မှုပဓာနဝါဒီဆိုတဲ့ ကြည်အေးဟာ ကဗျာ အတွေးဆန်း၊ အရေးဆန်းပါတယ်။ တချို့က ကြည်အေးကို ဝေဖန် တိုက်ခိုက်ခဲ့ကြတယ်။ ဒါတွေကိုတော့ ကြည်အေးက စိတ်မဝင်စားပါ။ “ ကျွန်မကို မနာလိုတဲ့ စာရေးဆရာ တချို့က ပြောင်ကြ လှောင်ကြတာ ကျမ နားမကြောင်ခဲ့ပါဘူး။  ပြန်လှန်ချေပလဲ မရေးခဲ့ပါဘူး။  ခုထိ ကျွန်မနဲ့ ပတ်သက်ပြီး မဟုတ်မဟတ် ရေးနေကြသေးတာလဲ ကြားသိရ၊ တခါတလေ ဖတ်ရပါတယ်။  သူတပါးက ပြစ်မှားတဲ့စကားကို ကျွန်မလက်ခံရင် ကျွန်မ စိတ်ထိခိုက် နစ်နာမှာပေါ့။  ကျွန်မက လက်မခံပဲ လွှတ်ပြစ်လိုက်တော့ လေလွင့် ပျောက်ပျက်သွားမှာပေါ့။ ဒီလိုပဲ သဘောထားပါတယ်။ ။  (ကြည်အေး) ကြည်အေး၏ကဗျာများစာအုပ် အမှာစာမှ . . . ခေတ်သစ်မြန်မာစာပေလောကမှာ ထင်ရှားကျော်ကြားလှတဲ့ ကဗျာဆရာနဲ့ စာရေးဆရာမကြီး ကြည်အေး ဟာ အမေရိကန် ပြည်ထောင်စု နယူးယောက်မြို့မှာ ၂၀၁၆ ခုနှစ် ဒီဇင်ဘာ ၂၈ ရက် ကွယ်လွန်ခဲ့ပြီမို့ အခု ၂၀၂၀ ဒီဇင်ဘာ ၂၈ ဟာ သူ့မ ထွက်ခွာ သွားခဲ့တာ ၄ နှစ်ပြည့်ပြီ။ နေတစင်းကွယ် လွန်ခဲ့ပြီဆိုပေမဲ့ သူ့ရဲ့ အပူ အလင်း အရောင် ရှိန်ဝှာတွေကတော့ တောက်နေဆဲပါ။ ဆရာမကြီး ကြည်အေးရဲ့ စာပေ ကဗျာတွေကလဲ ရုပ်ရှင်ပိတ်ကားတွေထဲမှာ ရွတ်ဆိုသံတွေ ကြားနေ မြင်နေရတဲ့အထိ ပျံ့လွင့်နေဆဲ ထင်ရှားနေဆဲပါဗျာ။ ။  မောင်တူး