Homeမြန်မာသတင်း
ကိုဗစ်ကြောင့် လူမှုစီးပွားထိခိုက်မှုများ ကုစားရန် ချေးငွေကန်ဒေါ်လာ သန်း ၃၅၀ သုံးစွဲခဲ့
ကိုဗစ်ကြောင့် လူမှုစီးပွားထိခိုက်မှုများ ကုစားရန် ချေးငွေကန်ဒေါ်လာ သန်း ၃၅၀ သုံးစွဲခဲ့
DVB
·
December 12, 2020
ကိုဗစ်ကြောင့် လူမှုစီးပွားထိခိုက်တာတွေကို ကုစားဖို့ ချေးငွေအမေရိကန်ဒေါ်လာ သန်း ၃၅၀ သုံးစွဲခဲ့ပြီးပြီလို့ စီမံကိန်း၊ ဘဏ္ဍာရေးနဲ့ စက်မှု ဝန်ကြီးဌာန တာဝန်ရှိသူတွေက ပြောပါတယ်။
အပြည်ပြည်ဆိုင်ရာငွေကြေးရန်ပုံငွေအဖွဲ့ (IMF) က တာဝန်ရှိသူတွေနဲ့ မနေ့ကတွေ့ဆုံရာမှာ ပြောခဲ့တာပါ။
မြန်မာနိုင်ငံမှာ ကိုဗစ်-၁၉ ကြောင့် လူမှုစီးပွားရေးဆိုင်ရာ ထိခိုက်တာတွေကို ကုစားနိုင်ရေးအတွက် IMF ကနေ Rapid Credit Facility (RCF)နဲ့Rapid Financing Instrument (RFI) အစီအစဉ်တွေနဲ့ ချေးငွေအမေရိကန်ဒေါ်လာ သန်း ၇၀၀ ပံ့ပိုးထားခဲ့တာ ဖြစ်ပါတယ်။
အဲဒီချေးငွေထဲက ပထမအသုတ် သန်း ၃၅၀ ကို ၂၀၁၉-၂၀ ဘဏ္ဍာရေးနှစ်မှာ သုံးစွဲခဲ့ပြီးဖြစ်လို့ ဒုတိယအသုတ်အဖြစ် အမေရိကန်ဒေါ်လာသန်း ၃၅၀ ကို ၂၀၂၀-၂၁ ဘဏ္ဍာရေးနှစ်မှာ ဆက်လက် သုံးစွဲနိုင်ရေးအတွက် Letter of Intent နဲ့ MoU တို့ကို လက်မှတ်ရေးထိုးနိုင်ရေး ဆောင်ရွက်နေတယ်လို့ ဝန်ကြီးနဲ့ ဒုဝန်ကြီးတွေက ပြောပါတယ်။
ဒီချေးငွေတွေကို ကိုဗစ်-၁၉ နဲ့ ဆက်စပ်အသုံးစရိတ်တွေမှာ ထိထိရောက်ရောက် သုံးစွဲနိုင်ရေး ကြပ်မတ်နေသလို G20 နိုင်ငံတွေကလည်း ကြွေးမြီပေးဆပ်ရမယ့် ကာလကို ၂၀၂၀ ပြည့်နှစ် မေလကစလို့ ဒီဇင်ဘာလအထိ ရွှေ့ဆိုင်းပေးခဲ့တဲ့အပြင် ၂၀၂၁ ခုနှစ် ဇွန်လကုန်အထိ နောက်ထပ် ၆ လ ထပ်ရွှေ့ပေးမယ်လို့ ကြားသိရကြောင်းလည်း ဆိုပါတယ်။
IMF Mission Chief , Mr. Shanaka Jayanath Peiris ကလည်း ကိုဗစ်-၁၉ ကာလအတွင်း မြန်မာအစိုးရရဲ့ တုံ့ပြန်ဆောင်ရွက်တာတွေကို အားရကျေနပ်သလို မြန်မာနိုင်ငံအတွက် IMF ကနေ RCF နဲ့ RFI အစီအစဉ်တို့နဲ့ ပံ့ပိုးပေးမယ့် ဒုတိယအသုတ်ချေးငွေ အမေရိကန် ဒေါ်လာသန်း ၃၅၀ ထုတ်ချေးရေးကိစ္စကို IMF Director Board အဖွဲ့က လာမယ့်နှစ် ဇန်နဝါရီလလယ်လောက်မှာ အတည်ပြု ဆုံးဖြတ်နိုင်ရေး တင်ပြပေးမယ်လို့ ပြောပါတယ်။
