အန်အယ်လ်ဒီဥက္ကဋ္ဌ ဒေါ်အောင်ဆန်းစုကြည်ကို ဂုဏ်ပြုကြောင်း သူရဦးရွှေမန်းပြော
DVB
·
November 10, 2020
အထွေထွေရွေးကောက်ပွဲမှာ တောင်ပြိုကမ်းပြိုအနိုင်ရရှိခဲ့တဲ့ အန်အယ်လ်ဒီ ပါတီ ဥက္ကဋ္ဌ ဒေါ်အောင်ဆန်းစုကြည်ကို ဂုဏ်ပြုကြောင်း ပြည်ထောင်စုကောင်းကျိုးဆောင်ပါတီ ဥက္ကဋ္ဌ သူရဦးရွှေမန်းက ပြောကြားလိုက်ပါတယ်။
မကြာသေးခင်ရက်ပိုင်းက ပြည်ထောင်စုကောင်းကျိုးဆောင်ပါတီရဲ့ အဓိက ပြိုင်ဘက်ဟာ အန်အယ်လ်ဒီနဲ့ ယူအက်စ်ဒီပီပါတီလို့ ထုတ်ဖော်ပြောဆိုခဲ့ကြောင်း ခုအခါမှာ အန်အယ်လ်ဒီ ဥက္ကဋ္ဌဟာ သူ့ရဲ့ မဲဆန္ဒနယ်အပါအဝင် တပြည်လုံးမှာ တောင်ပြိုကမ်းပြို အနိုင်ရခဲ့တဲ့အတွက် ဂုဏ်ပြုတယ်လို့ သူရဦးရွှေမန်းက သူ့ရဲ့ လူမှုကွန်ယက်စာမျက်နှာမှာ ရေးသားထားတာပါ။
ဒါ့အပြင် နိုင်ငံတည်ဆောက်ရေးမှာ မှန်ကန်ထိရောက်စွာ ဦးဆောင်နိုင်စေဖို့အတွက်လည်း တိုက်တွန်းထားပါတယ်။
ပြည်ထောင်စုကောင်းကျိုးဆောင် (UBP) ပါတီဟာ ၂၀၂၀ အထွေထွေရွေးကောက်ပွဲမှာ မြို့နယ်ပေါင်း ၂၅၀ ကျော်မှာ ကိုယ်စားလှယ်လောင်း ၉၀၀ လောက်ဝင်ပြိုင်မှာဖြစ်ပြီး မဲဆန္ဒနယ်အားလုံးရဲ့ ၄၀ ၊ ၅၀ ရာခိုင်နှုန်းအတွင်း အနိုင်ရရှိဖို့နဲ့ အစိုးရဖွဲ့ဖို့ မျှော်မှန်းထားတယ်လို့ ပါတီ ဥက္ကဋ္ဌ သူရဦးရွှေမန်းက ရွေးကောက်ပွဲမတိုင်ခင်က ပြောထားပါတယ်။
ဓာတ်ပုံ -THURA U SHWE MANN
