Homeမြန်မာသတင်း
ချောက်မြို့နယ်၌ မဲရုံများအတွက် PPE ဝတ်စုံနှင့် ကိုဗစ်-၁၉ ကာကွယ်ရေးပစ္စည်းများ ဖြန့်ဝေ
ချောက်မြို့နယ်၌ မဲရုံများအတွက် PPE ဝတ်စုံနှင့် ကိုဗစ်-၁၉ ကာကွယ်ရေးပစ္စည်းများ ဖြန့်ဝေ
DVB
·
November 4, 2020
မကွေးတိုင်းဒေသကြီး၊ ချောက်မြို့နယ်က မဲရုံတွေကို နိုဝင်ဘာ ၃ ရက်က PPE ဝတ်စုံအပါအဝင် တခြားကျန်းမာရေးသုံး အထောက်အကူပြုပစ္စည်းတွေနဲ့အတူ ပစ္စည်းစုံ ၁၀ မျိုးကို မြို့နယ် အထွေထွေအုပ်ချုပ်ရေးက ပေးဝေနေပါတယ်။
မြန်မာနိုင်ငံ ကိုဗစ်-၁၉ ထိန်းချုပ်ကာကွယ်ရေးနဲ့ အရေးပေါ်တုံ့ပြန်ရေး ဗဟိုက မဲရုံတွေကို ပေးပို့လာလို့ ဝေချမ်းပေးနေတာဖြစ်တယ်လို့ မြို့နယ် လဝက ဦးစီးမှူးက ပြောပါတယ်။
မကွေးတိုင်းဒေသကြီး ရွေးကောက်ပွဲကော်မရှင် ဒုညွှန်ကြားရေးမှူး ဦးစိုးထွဋ်ဦးက “PPE 2,3 တွေကို မဲရုံတွေမှာ အဆင်သင့်ထားပေးဖို့ အတွက်ပါ၊ အပူချိန်တိုင်းရာမှာ ၃၈ ဒီဂရီစင်တီဂရိတ် ကျော်တဲ့ လူတွေကို တွေ့တယ်ဆိုရင် ထူးခြားမှုဖြစ်လာရင် အသုံးပြုဖို့ထားပေးတာပါ”လို့ ပြောပါတယ်။
နိုဝင်ဘာ ၃ ရက် မနက်ကစတင်ပြီး ချောက်မြို့နယ် မဲရုံတစ်ရုံအတွက် လက်အိတ်၊ PPE 3 ဝတ်စုံ ၂ စုံ၊ ဖိနပ် ၂ ရံ၊ goggles မျက်မှန် ၅ ခု၊ cap ၁၀ ခု၊ PPE coverall ၄ခု၊ Face shield ၂ ခု၊ Protective mask ၅ခု၊ Surgical gown ၂ စုံ၊ လက်အိတ် ၅စုံ စီနဲ့ မဲပေးသူဦးရေပေါ် မူတည်ပြီး KN95 mask တို့ကို ချောက်မြို့နယ် မဲရုံ ၂၅၈ ရုံအတွက် ခွဲဝေးပေးနေကြောင်း သိရပါတယ်။
လာမယ့် နိုဝင်ဘာ ၈ ရက်နေ့မှာ ပြုလုပ်မယ် ရွေးကောက်ပွဲနေ့ဟာ ကိုဗစ်-၁၉ ကာလ ဖြစ်တာကြောင့် မဲပေးကြမယ့် မဲဆန္ဒရှင်တွေကို အပြင်မှာ ၆ ပေခြားတန်းစီတာ၊ အပူချိန်တိုင်းတာ၊ လက်ဆေးဂျလ်အသုံးပြုစေတာ၊ လက်မှတ်ထိုးဖိုအတွက် မိမိပိုင် ဘောလ်ပင် ယူဆောင်လာစေတာ၊ mask တပ်စေတာနဲ့ လက်အိတ်အသုံးပြုတာတွေအပါအဝင် ကျန်းမာရေးလမ်းညွှန်ချက်နဲ့အညီ ဆောက်ရွက်သွားမှာလို့ မြို့နယ်ကော်မရှင်ရုံးက သိရပါတယ်။
သတင်း - ကိုလင်း (ချောက်)
