ရွှေသံလွင် ဘိုးဘွားရိပ်သာတွင် ဘိုးဘွားများအပါအဝင် ၈၆ ဦး ကိုဗစ်-၁၉ ကူးစက်ခံရ
DVB
·
October 18, 2020
ရန်ကုန်တိုင်း၊ ဒဂုံဆိပ်ကမ်းမြို့နယ်၊ (၈၀) ရပ်ကွက်ရှိ ရွှေသံလွင် ဘိုးဘွားရိပ်သာမှာ နေထိုင်တဲ့ အဘိုးအဘွားများအပါအဝင် ဝန်ထမ်းနဲ့ မိသားစုဝင် ၈၆ ဦး ကိုဗစ်-၁၉ ရောဂါပိုး ကူးစက်ခံရတယ်လို့ မြို့နယ်ကျန်းမာရေးဦးစီးမှူး ဒေါက်တာအေးမူယာကျော်က ပြောပါတယ်။
အောက်တိုဘာ ၁၄ ရက်နေ့က ရိပ်သာရှိ ဝန်ထမ်း ၅ ဦးနဲ့ မိသားစုဝင်တွေမှာ အနံ့ပျောက်လို့ စစ်ဆေးရာမှ ရောဂါပိုးတွေ့ရှိပြီးနောက် ရိပ်သာမှာ နေထိုင်သူ ၁၁၆ ဦးကို ဓာတ်ခွဲနမူနာ ပေးပို့စစ်ဆေးရာမှ အောက်တိုဘာ ၁၇ ရက်နေ့မှာ ၈၆ ဦး ပိုး တွေ့ရှိခဲ့တာလို့ ဆိုပါတယ်။
ကိုဗစ်-၁၉ ကူးစက်ခံခဲ့ရတဲ့ ဘိုးဘွား ၆၂ ဦးအပါအဝင် ဝန်ထမ်း ၁၁ ဦးနဲ့ မိသားစုဝင် ၁၃ ဦးကို ဖောင်ကြီးစင်တာ၊ ဧရာဝတီစင်တာနဲ့ Fortune Plaza စင်တာတို့ကို ခွဲပြီး ပို့ဆောင်ပေးလိုက်တယ်လို့ သိရပါတယ်။
မြန်မာနိုင်ငံမှာ အောက်တိုဘာ ၁၇ ရက် ည ၈ နာရီအထိ ကိုဗစ်-၁၉ အတည်ပြုလူနာ စုစုပေါင်း ၃၄,၈၇၅ ယောက်၊ သေဆုံးသူ ၈၃၈ ယောက်နဲ့ ဆေးရုံက ဆင်းခွင့်ရသူပေါင်း ၁၆,၃၇၀ ယောက် ရှိပြီလို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
