၂၀၂၀ ရွေးကောက်ပွဲ မကျင်းပနိုင်သည့် နယ်မြေများကြေညာ
DVB
·
October 16, 2020
၂၀၂၀ နိုဝင်ဘာ ၈ ရက်နေ့မှာ အထွေထွေရွေးကောက်ပွဲ ကျင်းပနိုင်ခြင်းမရှိတဲ့ နယ်မြေတွေကို ပြည်ထောင်စုရွေးကောက်ပွဲ ကော်မရှင်က အောက်တိုဘာ ၁၆ ရက်နေ့စွဲနဲ့ ထုတ်ပြန် ကြေညာလိုက်ပါတယ်။
လွတ်လပ်ပြီး တရားမျှတဲ့ရွေးကောက်ပွဲကျင်းပဖို့ အခြေအနေမရှိလို့ မကျင်းပနိုင်တဲ့ မဲဆန္ဒ နယ်မြေတွေထဲမှာ ကချင်ပြည်နယ်၊ ကရင်ပြည်နယ်၊ မွန်ပြည်နယ်၊ ရှမ်းပြည်နယ်၊ ရခိုင်ပြည်နယ်နဲ့ ပဲခူးတိုင်းဒေသကြီးအတွင်းက ကျေးရွာအုပ်စုတချို့ ပါဝင်ပါတယ်။
ကချင်ပြည်နယ်မှာတော့ ခေါင်လန်ဖူး၊ ဆွမ်ပရာဘွမ်၊ မချမ်းဘော၊ မံစီ၊ မိုးမောက်၊ ရွှေကူ၊ ချီဖွေ၊ ဆော့လော်၊ တနိုင်း၊ ဝိုင်းမော်နဲ့ အင်ဂျန်းယန် မြို့နယ်ထဲက ကျေးရွာအုပ်စုတချို့ ပါဝင်ပါတယ်။
ကရင်ပြည်နယ်မှာတော့ ကော့ကရိတ်၊ ကြာအင်းဆိပ်ကြီး၊ ဖာပွန်၊ ဘားအံ ၊ သံတောင်ကြီးနဲ့ မြဝတီမြို့နယ်ထဲက ကျေးရွာအုပ်စုတချို့ပါဝင်ပါတယ်။
ရခိုင်ပြည်နယ်မှာတော့ ပေါက်တော၊ ပုဏ္ဏာကျွန်း၊ ရသေ့တောင်၊ ဘူးသီးတောင်၊ မောင်တော၊ ကျောက်တော်၊ မင်းပြား၊ မြေပုံနဲ့ မြောက်ဦး မြို့နယ် တစ်ခုနဲ့ ကျောက်ဖြူ၊ အမ်း၊ စစ်တွေနဲ့ တောင်ကုတ်မြို့နယ်တွေထဲက ကျေးရွာအုပ်စုတချို့ပါဝင်ပါတယ်။
ရှမ်းပြည်နယ်မှာတော့ မိုင်းလား၊ ပန်ဆမ်း (ပန်ခမ်း) ၊ နားဖန်း၊ မိုင်းမော၊ ပန်ဝိုင်၊ မိုင်းကိုင်မြို့နယ် တစ်ခုလုံးနဲ့ ကျောက်မဲ၊ နောင်ချို၊ နမ့်ဆန်၊ မန်တုံ၊ မိုင်းခတ်၊ မိုင်းယန်း၊ မိုင်းဖြတ်၊ မိုင်းယောင်း၊ ကွတ်ခိုင်၊ မူဆယ်၊ မက်မန်း၊ တန့်ယန်း၊ လားရှိုး၊ ကွမ်းလုံ၊ ကုန်းကြမ်းနဲ့ ဟိုပန်မြို့နယ်ထဲက ကျေးရွာအုပ်စုတချို့ပါဝင်ပါတယ်။
မွန်ပြည်နယ်ထဲမှာတော့ ဘီးလင်းမြို့နယ်က ဘောနော်ခီး ကျေးရွာအုပ်စု ပါဝင်ပြီး ပဲခူးတိုင်းထဲမှာတော့ ကျောက်ကြီးမြို့နယ်က ကျေးရွာအုပ်စု ၁၂ အုပ်စုနဲ့ ရွှေကျင်မြို့နယ်ထဲက ကျေးရွာအုပ်စု ၃၀ ပါဝင်ပါတယ်။
အဆိုပါ ရွေးကောက်ပွဲ ကျင်းပနိုင်ခြင်းမရှိတဲ့ မြို့နယ်အလိုက် ရပ်ကွက်/ ကျေးရွာအုပ်စု တွေရဲ့အမည် အသေးစိတ်ကို ပြည်ထောင်စုရွေးကောက်ပွဲကော်မရှင်က သီးခြားထုတ်ပြန်ထားပြီး https://www.uec.gov.mm/ ဝက်ဆိုက်မှာလည်း ဝင်ရောက်ကြည့်ရှုစစ်ဆေးနိုင်ပါတယ်။
