ရှမ်းပြည်နယ် မြောက်ပိုင်းက သူနာပြု ၂၀ ရန်ကုန်သို့ သွားရောက်ကူညီ
DVB
·
October 2, 2020
ကိုဗစ်-၁၉ ရောဂါဖြစ်ပွားမှု များနေတဲ့ ရန်ကုန်တိုင်းကိုကူညီဖို့ ရှမ်းပြည်နယ်မြောက်ပိုင်းက ဆေးရုံအသီးသီးမှာ တာဝန်ထမ်းဆောင်နေတဲ့ သူနာပြုအယောက် ၂၀ ဟာ အောက်တိုဘာ ၁ ရက်နေ့က ရန်ကုန်မြို့ကို သွားရောက်ခဲ့ကြတယ်လို့ ပြည်နယ် ကျန်းမာရေးဦးစီးဌာနမှ ဒေါက်တာတင်မောင်ညွှန့်က ပြောပါတယ်။
“ဒီအချိန်မှာ နိုင်ငံအတွက် တထောင့်တနေရာကနေ လုပ်ပေးချင်တာလို့ ခုလိုသွားဖို့ဆုံးဖြတ်ခဲ့တာဖြစ်တယ်” လို့ နမ့်ခမ်းမြို့နယ်ဆေးရုံက သူနာပြုတဦးက ပြောခဲ့ပါတယ်။
ပြည်နယ်ကျန်းမားရေးဆေးရုံမှာ အောက်တိုဘာ ၁ ရက်နေ့ ညနေ ၄ နာရီက အားပေးဂုဏ်ပြုနှုတ်ဆက်ကြသလို ညနေ ၆ နာရီ မြို့အထွက်မှာလည်း ပြည်သူတွေက အားပေးနှုတ်ဆက်ခဲ့ကြပါတယ်။
မြန်မာနိုင်ငံမှာ ဒီကနေ့ည ၈ နာရီအထိ ကိုဗစ်-၁၉ အတည်ပြုလူနာပေါင်း ၁၄,၃၈၃ ယောက်၊ သေဆုံးသူ ၃၂၁ ယောက်နဲ့ ဆေးရုံကဆင်းခွင့်ပြုခဲ့သူပေါင်း ၄,၁၅၆ ယောက် ရှိတယ်လို့ ကျန်းမာရေးဌာနက ထုတ်ပြန်ထားပါတယ်။
သတင်း - နန်းစပယ်
