တောင်ကိုရီးယားရောက်မြန်မာနိုင်ငံသားများ ကြိုတင်မဲပေး
DVB
·
October 2, 2020
၂၀၂၀အထွေထွေရွေးကောက်ပွဲအတွက် တောင်ကိုရီးယားရောက်မြန်မာနိုင်ငံသားတွေအနေနဲ့ ဒီနေ့ အောက်တိုဘာ ၂ ရက်နေ့ကစတင်ပြီး မြန်မာသံရုံးမှာ ကြိုတင်မဲပေးနိုင်ပြီ ဖြစ်ပါတယ်။
ကြိုတင်မဲပေးနိုင်ဖို့အတွက် ဆိုးလ်မြို့ မြန်မာသံရုံးမှာ အောက်တိုဘာ ၂ ရက် ၊ ၃ ရက်၊ ၄ ရက်၊ ၅ ရက်၊ ၉ ရက်၊ ၁၀ ရက်၊ ၁၁ ရက်နဲ့ ၁၂ ရက်နေ့တွေမှာ နေ့စဉ် မနက် ၉နာရီခွဲ မှ ညနေ ၅ နာရီခွဲအထိ မဲရုံတွေဖွင့်လှစ်ပေးမယ်လို့ သံရုံးက ထုတ်ပြန်ထားပါတယ်။
တောင်ကိုရီးယားနိုင်ငံ ဂင်မဲမြို့မှာရှိတဲ့ မဲဆန္ဒရှင်တွေကတော့ ၅ နာရီနီးပါး ကားစီးပြီး ဆိုးလ်မြို့မှာရှိတဲ့ မြန်မာသံရုံးကို ကြိုတင်မဲ ပေးဖို့သွားရောက်ခဲ့ကြပါတယ်။
ကိုရီးယားနိုင်ငံမှာ ကြိုတင်မဲပေးဖို့ ပုံစံ ၁၅ လျှောက်ထားတဲ့ မြန်မာနိုင်ငံသား ပေါင်း ၁၀၁၆၉ ယောက်ရှိတဲ့အထဲက ပြည်ထောင်စုရွေးကောက်ပွဲ ကော်မရှင်က စိစစ်ပြီး ပြန်ပို့တဲ့ ကြိုတင်ဆန္ဒမဲပေးပိုင်ခွင့်ရှိသူ ၉၈၁၀ ယောက်ရှိတယ်လို့ သံရုံးထုတ်ပြန်ချက်အရ သိရပါတယ်။
စင်ကာပူနိုင်ငံရောက်မြန်မာတွေကတော့ အောက်တိုဘာ ၁ ရက်မနက်ကစပြီး မြန်မာသံရုံးမှာ ကြိုတင်ဆန္ဒမဲပေးနေကြပါတယ်။
သတင်း - ထက်ဝေအောင်
