Homeမြန်မာသတင်း
တောင်တွင်းကြီးမြို့နယ်၌ စစ်ဆေးရေးဂိတ်အတားအဆီးများကို ကားဖြင့်တိုက်ထွက်ပြေးသူများ ဖမ်းမိ
တောင်တွင်းကြီးမြို့နယ်၌ စစ်ဆေးရေးဂိတ်အတားအဆီးများကို ကားဖြင့်တိုက်ထွက်ပြေးသူများ ဖမ်းမိ
DVB
·
September 17, 2020
မကွေးတိုင်း၊ တောင်တွင်းကြီးမြို့နယ်ရှိ ကူးစက်ရောဂါ ကာကွယ်တားဆီးရေး ပူးပေါင်းစစ်ဆေးရေးဂိတ်တွေမှာ စစ်ဆေးမှုမခံယူဘဲ အတားအဆီးတွေကို ကားနဲ့တိုက်ပြီး ထွက်ပြေးသွားတဲ့ အမျိုးသား ၃ ဦးကို စက်တင်ဘာ ၁၆ ရက် ညနေပိုင်းက ဒေသခံရွာသားတွေနဲ့ တာဝန်ရှိသူတွေက ဝိုင်းဝန်း ဖမ်းဆီးခဲ့ပါတယ်။
ချောင်းနက် - နေပြည်တော်လမ်းအတိုင်း နေပြည်တော်ဘက်မှ ချောင်းနက်ကျေးရွာဘက်သို့ မောင်းနှင်လာတဲ့ မော်တော်ယာဉ်ငယ် ၂ စီးကို ဝံအော်ကျေးရွာအရောက်မှာ ကူးစက်ရောဂါ အရေးပေါ်ကာကွယ်ထိန်းချုပ်ရေးနဲ့ နယ်မြေလုံခြုံရေးအရ စစ်ဆေးဖို့ တာဝန်ရှိသူတွေက တားမြစ်ခဲ့ရာ ရပ်တန့် ပေးခြင်းမရှိဘဲ ဆက်လက်မောင်းနှင်သွားခဲ့သလို ချောင်းနက်ကျေးရွာ စစ်ဆေးရေးဂိတ်မှာလည်း အစစ်ဆေးမခံဘဲ တောင်တွင်းကြီး-ပြည်ကားလမ်းအတိုင်း မောင်းနှင်ထွက်ပြေးသွားခဲ့ကာ ဆတ်သွားကျေးရွာစစ်ဆေးရေးဂိတ်မှာလည်း လုံခြုံရေး အတားအဆီးတွေကို ကျော်ဖြတ်ပြီး ပရပ်ကြယ်ကျေးရွာဘက်သို့ မောင်းပြေးသွားခဲ့တယ်လို့ ဆတ်သွားနယ်မြေရဲတပ်ဖွဲ့က သိရပါတယ်။
အဆိုပါ မော်တော်ယာဉ် ၂ စီးဟာ ပရပ်ကြယ်ကျေးရွာအနီး ပူးပေါင်းစစ်ဆေးရေးဂိတ်ကို ကျော်ဖြတ်မောင်းနှင်ဖို့ မဖြစ်နိုင်တော့တဲ့အတွက် လာရာလမ်းအတိုင်း နောက်ပြန်လှည့်ပြီး ဆတ်သွားကျေးရွာရှိ လုံခြုံရေးအတားအဆီးတွေကို ကားနဲ့တိုက်ပြီး ချောင်းနက်ကျေးရွာဘက်သို့ ပြန်လှည့်မောင်းနှင်ထွက်ပြေးခဲ့တယ်လို့လည်း တာဝန်ကျရဲအရာရှိက ဒီဗွီဘီကိုပြောပါတယ်
ချောင်းနက်ကျေးရွာမှာ တာဝန်ရှိသူတွေက ကားလမ်းကို လုံခြုံစွာပိတ်ဆို့ တားဆီးထားပြီး စောင့်ဆိုင်းနေကြရာ အဆိုပါ မော်တော်ယာဉ် ၂ စီးက ချောင်းနက် အရှေ့စုကျေးရွာအတွင်းလမ်းသို့ ချိုးကွေ့ဝင်ရောက် မောင်းနှင်ထွက်ပြေးသွားစဉ် ရွာအနောက်ဘက်ရှိ ရေမြောင်းထဲကို ရှေ့ကမောင်းနှင်တဲ့ကားတစ်စီးက ကျွံကျသွားလို့ မောင်းမရတော့ဘဲ ကားပေါ် ပါလာသူတွေက ရွာအပြင်ဘက်ကို ထွက်ပြေးရာမှာ တာဝန်ရှိသူတွေနဲ့ ဒေသခံပြည်သူတွေက ဝိုင်းဝန်းဖမ်းဆီးရမိခဲ့တာလို့ ရဲကပြောပါတယ်။
ဖမ်းဆီးရမိသူတွေကတော့ နေပြည်တော်၊ ဥတ္တရသီရိမြို့နယ်၊ မိုးဆွေကျေးရွာနေ ကျော်ဆန်းဝင်း၊ ရဲကျော်၊ ကိုကိုချစ် တို့ဖြစ်ကြပြီး သူတို့ ၃ ဦးကို တောင်တွင်းကြီးမြို့နယ်၊ ဆတ်သွားနယ်မြေရဲစခန်းက သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေပုဒ်မ ၂၅/၃၀ (က) နဲ့ အရေးယူထားပါတယ်။
သတင်း - သားကြီး (တောင်တွင်းကြီး)
