ကြည့်မြင်တိုင်မြို့နယ်စည်ပင်ရုံး Lockdown ချ
ဇေယျာချမ်းအေး
·
September 14, 2020
ရန်ကုန်တိုင်း၊ ကြည့်မြင်တိုင်မြို့နယ် စည်ပင်သာယာရေးကော်မတီဥက္ကဋ္ဌမှာ ကိုဗစ်-၁၉ ရောဂါပိုးတွေ့ပြီးနောက် သူနဲ့ထိတွေ့ခဲ့တဲ့ ဝန်ထမ်းတွေကို ကွာရန်တင်းထားရှိပြီး ရုံးကိုလည်း Lockdown ချထားလိုက်ပါတယ်။
ကြည့်မြင်တိုင်မြို့နယ် စည်ပင်သာယာရေးကော်မတီဝင် ဦးလှမျိုးထွန်း “ ရုံးကို Lockdown ချလိုက်ပါပြီ” လို့ ပြောပါတယ်။
စက်တင်ဘာ ၁၂ ရက် ညပိုင်း ကျန်းမာရေးနဲ့ အားကစားဝန်ကြီးဌာနက ထုတ်ပြန်တဲ့စာရင်းအရ ကြည့်မြင်တိုင်မြို့နယ်မှာ ပိုးတွေ့သူ ၇ ဦးရှိခဲ့ပြီး မြို့နယ်စည်ပင်ဥက္ကဋ္ဌလည်း ပါဝင်ခဲ့တာပါ။
ဥက္ကဋ္ဌမှာ ရောဂါပိုးတွေ့ရှိခဲ့တဲ့အတွက် ကော်မတီဝင် ၁၊ ၂၊ အတွင်းရေးမှူး၊ မြို့နယ်စည်ပင်အုပ်ချုပ်ရေးမှူး အပါအဝင် အထိစပ်ဆုံးဝန်ထမ်းတွေကို ကွာရန်တင်း ထားရှိလိုက်ပါတယ်။
ဒါ့အပြင် ကျန်တဲ့ဝန်ထမ်းတွေကိုလည်း ကိုဗစ်-၁၉ ရောဂါ ရှိ မရှိ စစ်ဆေးတာတွေ ပြုလုပ်သွားမယ်လို့ ဦးလှမျိုးထွန်းက ပြောပါတယ်။
ကြည့်မြင်တိုင်စည်ပင်ဥက္ကဋ္ဌဟာ ခရီးသွားရာဇင်မရှိသလို ဘယ်က ကူးစက်ခံရမှန်းမသိဘဲ ကိုဗစ်-၁၉ ရောဂါ စစ်ဆေးတွေ့ရှိခဲ့တာပါ။
သူနဲ့ ထိစပ်သူတွေကို လိုက်လံစုံစမ်းပြီး ကွာရန်တင်းထားဖို့ ပြင်ဆင်နေတယ်လို့ ကြည့်မြင်တိုင်မြို့နယ် တိုင်းလွှတ်တော်ကိုယ်စားလှယ် ဦးကျော်နန္ဒအောင်ကပြောပါတယ်။
“စည်ပင်ဥက္ကဋ္ဌဆိုတော့ ထိတွေ့သူတွေက များမယ်။ လိုက်စုံစမ်းပြီး Home Quarantine နေခိုင်းဖို့ စီစဉ်နေပါတယ်။ History မရှိဘူးဗျ။ ဘယ်ကကူးမှန်းမသိဘူး”
စက်တင်ဘာ ၁၃ ရက် ညပိုင်းအထိစာရင်းတွေအရ ကြည့်မြင်တိုင်မြို့နယ်မှာ ကိုဗစ်-၁၉ အတည်ပြုလူနာ ၃၀နီးပါး ရှိနေပါတယ်။
ကြည့်မြင်တိုင်မြို့နယ်ဟာ Stay at Home ၂၈ မြို့နယ်မှာ ပါဝင်ပြီး လမ်းတွေကို ပိတ်ထားပေမယ့် ကူးစက်လူနာသစ်တွေ ထပ်တွေ့ခဲ့ရတာ ဖြစ်ပါတယ်။
သတင်း- ဇေယျာချမ်းအေး
