ကိုဗစ်-၁၉ လူနာသစ် ၈၃ ဦး တွေ့ရှိ၊ လူနာ ၄ ဦး ထပ်မံသေဆုံး
DVB
·
September 14, 2020
ဓာတ်ခွဲနမူနာ ၂,၂၄၄ ခုအား စစ်ဆေးချက်အရ လူနာသစ် ၈၃ ဦး ထပ်မံတွေ့ရှိခဲ့ပြီး လူနာ ၄ ဦး သေဆုံးခဲ့တာကြောင့် သေဆုံးသူ စုစုပေါင်း ၂၄ ဦး ရှိပြီလို့ ကျန်းမာရေးနဲ့အားကစားဝန်ကြီးဌာနက ဒီနေ့မနက် ၈ နာရီ ထုတ်ပြန်ပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်) က ၁,၄၄၁ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန(မန္တလေး) က ၂၈၇ ခု၊ ပုသိမ်မြို့ ပြည်သူ့ဆေးရုံကြီးက ၁၅ ခု၊ နေပြည်တော် ပြည်သူ့ဆေးရုံကြီး ကုတင် ၁၀၀၀ က ၂၈ ခုနဲ့ အမှတ်(၁) တပ်မတော်ဆေးရုံကြီး ကုတင်-၁၀၀၀ က ၄၇၃ ခု၊ စုစုပေါင်း ဓာတ်ခွဲနမူနာ ၂,၂၄၄ ခုတို့အား ထပ်မံ စစ်ဆေးပြီးစီးခဲ့ပြီး ကိုဗစ်-၁၀ အတည်ပြုလူနာသစ် ၈၃ ဦးတွေ့ရှိခဲ့တာပါ။
စစ်တွေဆေးရုံကြီးမှာ တက်ရောက်ကုသနေတဲ့ ၇၅ နှစ်အရွယ် သွေးတိုး ရောဂါအခံရှိပြီး လေဖြတ်ရောဂါ ၈ နှစ်ကြာခံစားနေရသူ အမျိုးသား (Case-2463) ဟာ ပြင်းထန်အဆုတ်ရောင်ရောဂါဖြစ်တာ၊ ရုတ်တရက်ဦးနှောက်သွေးကြောပိတ်ပြီး ထပ်မံ လေဖြတ်တဲ့ရောဂါကြောင့် မနေ့ညနေ ၆ နာရီက သေဆုံးသွားပါတယ်။
ရန်ကုန်အရှေ့ပိုင်းဆေးရုံကြီးမှာ တက်ရောက်ကုသနေတဲ့ ၆၉ နှစ်အရွယ် ပန်းနာရင်ကြပ်ရောဂါ၊ ဆီးချို၊ သွေးတိုး နဲ့ နှလုံးရောဂါအခံရှိသူ အမျိုးသမီး (Case-2324) ဟာ ပြင်းထန်အဆုတ်ရောင်ရောဂါကြောင့် ရုတ်တရက်အသက်ရှူ လမ်းကြောင်း ပျက်စီးတာကြောင့် ၁၁ ရက်နေ့ မနက် ၆ နာရီက သေဆုံးသွားခဲ့ပါတယ်။
ကိုဗစ်-၁၉ ကုသရေးဌာန (ဖောင်ကြီး) မှာ တက်ရောက်ကုသနေတဲ့ ၅၁ နှစ်အရွယ် အသည်းရောင်အသားဝါ (စီ) ပိုး ရောဂါအခံရှိသူ အမျိုးသား (Case-1997) ဟာ ပြင်းထန်အဆုတ်ရောင်ရောဂါကြောင့် ရုတ်တရက်အသက်ရှူ လမ်းကြောင်း ပျက်စီးတာ၊ အသည်းခြောက်ရောဂါကြောင့် သွေးအန်ပြီး အသည်းနဲ့ကျောက်ကပ်ပျက်စီးတာကြောင့် မနေ့မနက် ၁၁:၃၄ နာရီအချိန်က သေဆုံးသွားခဲ့ပါတယ်။
အလားတူ ကိုဗစ်-၁၉ ကုသရေးဌာန (ဖောင်ကြီး) မှာ တက်ရောက်ကုသနေတဲ့ ၇၆ နှစ်အရွယ် ဆီးချို၊ သွေးတိုး ရောဂါအခံရှိသူ အမျိုးသမီး (Case-2126) ဟာ ပြင်းထန်အဆုတ်ရောင်ရောဂါကြောင့် ရုတ်တရက်အသက်ရှူ လမ်းကြောင်း ပျက်စီးတာ၊ နှလုံးသွေးကြောကျဉ်းရောဂါကြောင့် ရုတ်တရက် လေဖြတ်ခြင်းရောဂါတဲ့ စက်တင်ဘာ ၁၁ ရက်နေ့ မနက် ၆:၀၅ နာရီအချိန်က သေဆုံးသွားခဲ့ပါတယ်။
မနေ့ညက ဓာတ်ခွဲနမူနာ ၁,၃၉၁ ခု အား စစ်ဆေးရာမှာ လူနာသစ် ၁၃၆ ဦး တွေ့ရှိခဲ့ပြီး လူနာ ၂ ဦး ထပ်မံသေဆုံးခဲ့ပါတယ်။
မြန်မာနိုင်ငံမှာ ဒီနေ့မနက်ပိုင်းအထိ ကိုဗစ်-၁၉ အတည်ပြလူနာ ၃,၀၁၅ ဦး၊ သေဆုံးသူ ၂၄ ဦးနဲ့ ဆေးရုံမှ ဆင်းခွင့်ပြုခဲ့သူ ၆၉၉ ဦးနဲ့ စောင့်ကြည့်လူနာအသစ် ၂၇၀ ဦးရှိတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
