ကိုဗစ်-၁၉ ရောဂါ ဓာတ်ခွဲအတည်ပြုလူနာသစ် ၉၂ ဦးထပ်မံတွေ့ရှိ
DVB
·
September 8, 2020
ကိုဗစ်-၁၉ ရောဂါ ဓာတ်ခွဲအတည်ပြုလူနာသစ် ၉၂ ဦးထပ်မံစစ်ဆေးတွေ့ရှိရပြီး မြန်မာနိုင်ငံမှာ အတည်ပြုလူနာပေါင်း ၁,၆၁၀ ဦးအထိရှိလာပြီလို့ ကျန်းမာရေးနဲ့ အားကစားဝန်ကြီးဌာနရဲ့ ဒီကနေ့ မနက် ထုတ်ပြန်ချက်အရသိရပါတယ်။
ဓာတ်ခွဲအတည်ပြုလူနာသစ်တွေရဲ့ သတင်းအချက်အလက်တွေကို မသိရသေးဘဲ ထပ်မံထုတ်ပြန်ပေးမယ်လို့ ကြေညာထားပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ ထပ်မံစစ်ဆေးပြီးစီးခဲ့သော ဓာတ်ခွဲနမူနာ ၁၂၆,၉ ခုနဲ့ တခြားပြည်နယ်နဲ့တိုင်းတွေမှာရှိတဲ့ ပြည်သူ့ဆေးရုံကြီးတွေက ထပ်မံစစ်ဆေးပြီးစီးခဲ့တဲ့ ဓာတ်ခွဲနမူနာတွေအပါအဝင် ဓာတ်ခွဲနမူနာ ၁,၅၂၇ ခု ကို စစ်ဆေးပြီးစီးခဲ့ရာ လူနာသစ် ၉၂ ဦးထပ်တွေ့ရတာပါ။
မနေ့ညကလည်း ဓာတ်ခွဲနမူနာ ၁,၁၇၀ ခုကို စစ်ဆေးပြီးစီးခဲ့ရာမှာ ရန်ကုန်က ၃၉ ဦး အပါအဝင် လူနာသစ် ၅၄ ဦး တွေ့ရှိခဲ့ပါတယ်။
စက်တင်ဘာ ၈ ရက်မနက် ၈ နာရီအထိ မြန်မာနိုင်ငံမှာ ကိုဗစ်-၁၉ ရောဂါဓာတ်ခွဲ အတည်ပြုလူနာ ၁,၆၁၀ ဦး၊ သေဆုံးသူ ၈ ဦး၊ နှစ်ကြိမ်ဆက်တိုက် ပိုးမတွေ့ရှိသူ ၃၈၈ ဦး ဆေးရုံမှ ဆင်းခွင့်ပြုခဲ့သူ ၃၆၉ ဦးနဲ့ စောင့်ကြည့်လူနာအသစ် ၁၂၉ ဦးရှိပါတယ်။
