ရောဂါအခံရှိသူ ကိုဗစ်လူနာအမှတ် ၁၂၃၆ သေဆုံး၊ သေဆုံးသူ ၈ ဦးရှိလာ
DVB
·
September 6, 2020
ရောဂါအခံရှိသူ ကိုဗစ်လူနာသစ်တယောက်ထပ်ပြီး သေဆုံးခဲ့တာကြောင့် အတည်ပြုလူနာတွေထဲက သေဆုံးသူ ၈ ယောက်ရှိလာပါတယ်။
သင်္ဃန်းကျွန်းစံပြဆေးရုံကြီးမှာ တက်ရောက်ကုသခံနေတဲ့ အသက် ၄၆ နှစ်အရွယ် ဓာတ်ခွဲအတည်ပြုလူနာအမှတ် ၁၂၃၆ ဟာ စက်တင်ဘာ ၅ ရက် ညနေ ၃ နာရီလောက်မှာ သေဆုံးခဲ့တာပါ။
သူဟာ ပြင်းထန်အဆုတ်ရောင်ရောဂါကြောင့် ရုတ်တရက် အသက်ရှူလမ်းကြောင်း ပျက်စီးတာ၊ နာတာရှည်ကျောက်ကပ်ပျက်စီးတာနဲ့ ဆီးချိုရောဂါ အခံရှိတယ်လို့ ကျန်းမာရေးဌာနက ထုတ်ပြန်ထားပါတယ်။
စက်တင်ဘာ ၅ ရက် ညပိုင်းထုတ်ပြန်ချက်မှာမှ အတည်ပြုလူနာဖြစ်ခဲ့ပြီး သူ့ရဲ့ အချက်အလက်တွေကိုတော့ မထုတ်ပြန်သေးပါဘူး။
စက်တင်ဘာ ၃ ရက် ညပိုင်းကလည်း ဝေဘာဂီအထူးကုဆေးရုံကြီးမှာ တက်ရောက်ကုသမှုခံနေတဲ့ အသက် ၄၆ နှစ် အရွယ် ဓာတ်ခွဲအတည်ပြုလူနာအမှတ် ၁၂၀၃ အမျိုးသမီး သေဆုံးခဲ့ပါတယ်။
သူ့မှာ အရေပြားလေးဖက်နာရောဂါအခံရှိပြီး နောက်ဆုံးအဆင့် ကျောက်ကပ်ပျက်စီးတာနဲ့ ရုတ်တရက် နှလုံးစည်းချက်မမှန်ဖြစ်ပြီး နှလုံးအမောဖောက်တာကြောင့် သေဆုံးခဲ့တယ်လို့ ဆိုပါတယ်။
မြန်မာနိုင်ငံမှာ ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၁,၃၁၉ ဦး၊ သေဆုံးသူ ၈ ဦး၊ နှစ် ကြိမ်ဆက်တိုက် ပိုးမတွေ့ရှိသူ ၃၇၁ ဦးအနက် ဆေးရုံမှ ဆင်းခွင့်ပြုခဲ့ပြီးသူ ၃၆၆ ဦးနဲ့ စောင့်ကြည့်လူနာအသစ် (၁၁၉) ဦးရှိတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
