ညောင်လေးပင်မြို့နယ်၌ မီးရထားလမ်းရေကျော်သဖြင့် ရန်ကုန်-မန္တလေးရထားခရီးစဉ် ယာယီပိတ်
DVB
·
August 5, 2020
ပဲခူးတိုင်းဒေသကြီး၊ ညောင်လေးပင်မြို့နယ်၊ ပိန်းဇလုပ်မြို့နဲ့ တော်ဝိကျေးရွာအကြားမှာ သြဂုတ် ၄ ရက်က ရထားလမ်းရေကျော်ခဲ့တာကြောင့် ရန်ကုန်-မန္တလေး ရထားခရီးစဉ်တွေကို ယာယီပိတ်ထားရတယ်လို့ မြန်မာ့မီးရထားဌာန တာဝန်ရှိသူက ပြောပါတယ်။
ညောင်လေးပင်မြို့နယ်မှာ မိုးအဆက်မပြက်ရွာသွန်းပြီး ချောင်းရေလျှံတာကြောင့် ပိန်းဇလုပ်နဲ့ တော်ဝိကျေးရွာအကြား မိုင်တိုင်အမှတ် ၉၈/၄၅ မှာ ရထားလမ်းရေကျော်ပြီး တံတားနောက် တာဘောင်ပျက်ကျခဲ့တာလို့ ဆိုပါတယ်။
ရထားလမ်းရေကျော်နေတာကြောင့် ရန်ကုန်-မန္တလေး ရထားခရီးစဉ်တွေအားလုံးကို သြဂုတ် ၄ ရက်နေ့က စတင်ပိတ်ထားခဲ့တာဖြစ်တယ်လို့ ပဲခူးတိုင်းဒေသကြီး တိုင်းအင်ဂျင်နီရာမှူး ဦးအောင်အောင်ထွန်းက ဒီဗွီဘီကို ပြောပါတယ်။
“ရန်ကုန်-မန္တလေး ရထားခရီးစဉ်အားလုံးကို ပိတ်ထားတာပါ။ ညောင်လေးပင်အနီးအနား ရောက်မှ ကားနဲ့ ကဲ့ထုတ်တာတို့ ဘာတို့ မရှိပါဘူး။ အကုန်ခရီးစဉ်အားလုံး ရပ်ထားတာပါ။ ကျနော်တို့လည်း အမြန်ဆုံးပြီးအောင် လုပ်နေပါတယ်။”
တာဘောင်ကျိုးကျခဲ့တဲ့နေရာမှာ အမြန်ဆုံးပြုပြင်နိုင်ဖို့ တာဘောင်ထည့်ကာ တံတားအစားထိုးဖို့ ဆောင်ရွက်နေကြပြီး ဒီနေ့ညနေ ပြုပြင်ပြီးနိုင်မယ်လို့ ဆိုပါတယ်။
သြဂုတ်လ ၄ ရက်ညက ပိန်းဇလုပ်မြို့နဲ့ ရန်ကုန်-မန္တလေး အမြန်လမ်းဟောင်းကို ဆက်သွယ်ထားတဲ့ ကားလမ်း ရေတိုက်စားလို့ ကျိုးပေါက်မှု ဖြစ်ခဲ့တာပါ။
ပိန်းဇလုပ်မြို့မှာ သြဂုတ် ၃ ရက်နေ့က မိုးအဆက်မပျက် ရွာသွန်းတာကြောင့် အိမ်ထောင်စု ၁၀၀ ကျော်က လူဦးရေ ၄၀၀ ကျော် ကယ်ဆယ်ရေးစခန်းတွေမှာ ယာယီ ခိုလှုံနေရပါတယ်။
သတင်း၊ ဓာတ်ပုံ - နေလင်းထိုက်
