ပုသိမ်ပြည်သူ့ဆေးရုံကြီးကို အလှူရရှိငွေ သိန်း ၁၇၀၀ ကျော်အကုန်ကျခံ ပြုပြင်နေ
DVB
·
July 4, 2020
ဧရာတိုင်း၊ ပုသိမ်မြို့၊ ကုတင် (၅၀၀) ပြည်သူ့ဆေးရုံကြီးကို ရပ်ဝေးရပ်နီးကအလှူရှင်တွေရဲ့ ပါဝင်ထည့်ဝင်လှူဒါန်းငွေ သိန်း ၁၇၀၀ ကျော်နဲ့ အကုန်ကျခံပြုပြင်နေတယ်လို့ ပုသိမ်ပြည်သူ့ ဆေးရုံအုပ်ကြီးက ပြောပါတယ်။
မြောင်းမြပြည်သူ့ဆေးရုံကြီးမှ ပုသိမ်ပြည်သူ့ဆေးရုံကြီးကို ၂၀၂၀ ခုနှစ်၊ ဖေဖော်ဝါရီလပိုင်းက စတင်ပြောင်းရွှေ့လာပြီးနောက်ပိုင်း ၅ လတာကာလအတွင်း ရပ်နီးရပ်ဝေးမှ ပြည်သူတွေရဲ့ လှူဒါန်းငွေ သိန်း ၁၇၁၉ သိန်းနဲ့ ပုသိမ်ဆေးရုံကြီးရဲ့ လိုအပ်တဲ့နေရာတွေကို ပြင်ဆင်နေတာလို့ ဆေးရုံအုပ်ကြီး ဒေါက်တာ သန်းမင်းထွဋ်က ပြောပါတယ်။
"ခုဆို သိန်း ၁၇၀၀ ကျော်လောက်ရှိပြီ၊ အလှူခံပြီးတော့ ပြုပြင်ထားတာ။ ဆရာတာဝန်ယူတဲ့ အချိန် ၅ လနဲ့ လွန်ခဲ့တဲ့ ၅ လပြန်ယှဉ်ကြည့်လို့ရပါတယ်။ ဓာတ်ပုံထဲမှာရော အပြင်မှာပါပေါ့။ ခုလို အဓိက ပြောင်းလဲသွားရတာက ပြည်သူတွေပါလို့ပါ။ ပြည်သူတွေမပါရင် ဘယ်ဟာမှမပြီးဘူး။"
ပုသိမ်ပြည်သူ့ဆေးရုံကြီးမှာ လက်ရှိ ဆေးရုံခွဲစိတ်ခန်းတွေ မိုးယိုနေမှုအား ပြင်ဆင်နိုင်ခဲ့တာ၊ ကိုဗစ်-၁၉ ကာလ လူနာထားရှိနိုင်ဖို့ အရေးပေါ်ကြပ်မတ်ကုသဆောင်မှာ ကုတင်း ၁၇ လုံးထိ တိုးမြှင့်ပြင်ဆင်တာ၊ ကလေးမီးဖွားတဲ့ မွေးခန်းတွေ ပြင်ဆင်တာတွေနဲ့ သံဃာ ဆောင် အမိုးပြင်ဆင်တာတွေ လုပ်ဆောင်ထားနိုင်ခဲ့တယ်လို့ ဆိုပါတယ်။
ဒါ့ပြင် ပြီးခဲ့တဲ့လပိုင်းက မိုးသည်းထန်စွာရွာသွန်းမှုကြောင့် မျက်နှာကျက်ပြိုကျခဲ့တဲ့ အဆောင် ၉ မှ ပျက်စီးမှုတွေကို ပြုပြင်ဖို့ရှိနေပြီး ဆေးရုံရှေ့က မြေကွက်လပ်ဖြစ်နေတဲ့ နေရာကို အများပြည်သူ သွားလာရေးအဆင်ပြေဖို့အတွက် ကွန်ကရစ်ခင်းတာတွေ လုပ်ဆောင်ခဲ့တယ်လို့ သိရပါတယ်။
ပုသိမ်ဆေးရုံအုပ်ကြီးအဖြစ် ၂၀၂၀ ခုနှစ်၊ ဖေဖော်ဝါရီလ ၅ ရက်နေ့က စတင်ပြောင်းရွှေ့ တာဝန်ထမ်းဆောင်ခဲ့တဲ့ ဒေါက်တာ သန်းမင်းထွဋ်ဟာ မြောင်းမြခရိုင်ဆေးရုံကြီးမှာ ၁ နှစ် ၁ လ တာဝန်ထမ်းဆောင်ခဲ့ပြီ အလှူရှင်တွေရဲ့ လှူဒါန်းငွေတွေနဲ့ ကျေးရွာဆေးပေးခန်း၊ စာကြည့်တိုက်၊ ရေသန့်စက်နဲ့ အဝိစီတွင်း တူတာတွေ ဆောက်လုပ်လှူဒါန်းခဲ့တဲ့သူလည်း ဖြစ်ပါတယ်။
မင်းထက်မုန်း (ပုသိမ်)
