သရက်မြို့ရှိ ကိုဗစ်-၁၉ လူနာအမှတ် ၂၄၂ နှင့် ထိတွေ့သူများကို Quarantine ထားရှိ
DVB
·
June 10, 2020
မကွေးတိုင်း၊ သရက်မြို့မှာ ကိုဗစ်-၁၉ လူနာအမှတ် ၂၄၂ အသက် ၃၆ နှစ်အရွယ် ကွမ်းအုံရွာက အမျိုးသမီးနဲ့ထိစပ်သူ ၂၅ ဦးကို စုံစမ်းဖော်ထုတ်ပြီး နှာခေါင်း၊ အာခေါင်၊ တို့ဖတ်ရယူကာ အမျိုးသားကျန်းမာရေးဓာတ်ခွဲမှု ဆိုင်ရာဌာန(ရန်ကုန်)ကို ပေးပို့ထားသလို ၂၁ ရက် အသွားအလာ ကန့်သတ်ထားရှိပါတယ်။
ဒါ့အပြင် အဆိုပါလူနာနဲ့ ထိစပ်ခဲ့တဲ့ ကျန်းမာရေးဝန်ထမ်း ၉ ဦးကိုလည်း သရက်ခရိုင်ဆေးရုံကြီးမှာဘဲ hospital quarantine သီးသန့်ထားရှိပါတယ်။
ဒေသခံ တိုင်းဒေသကြီးလွှတ်တော်ကိုယ်စားလှယ် ဦးဇော်မိုးအောင်က “ဒီအမျိုးသမီးနဲ့ ဆက်စပ်မှုရှာတာ ဆွေမျိုး ၈ ဦးနဲ့ တာဝန်ကျတဲ့ ထွေ/အုပ် က ၄ ဦး၊ ရပ်ကွက်အုပ်ချုပ်ရေးမှူး ၁ ဦးနဲ့ ရဲတပ်ဖွဲ့ဝင် ၂ ဦး၊ ပရဟိတယာဉ်မောင်း ၁ ဦး တို့ကို တွေ့ရှိခဲ့လို့ ဆေးစစ်ချက်ရယူပြီး facility quarantine ထားထားပါတယ်။ ဆက်စပ် ၂၅ ဦးပါ။ ရောဂါကာကွယ်နိုင်ရေး ထိန်းချုပ်နိုင်ရေး အတွက် ခရိုင်ဆေးရုံအုပ်ကြီး၊ ကျန်းမာရေးဝန်ထမ်းတွေနဲ့ ထွေအုပ်၊ပရဟိတတွေနဲ့ ပူးပေါင်းပြီးမြို့ အတွက်ဝိုင်းဝန်းကြိုးစားပေးနေပါတယ်”လို့ ပြောပါတယ်။
လူနာအမှတ်စဉ် ၂၄၂ နဲ့ထိတွေ့ဆက်စပ်သူ ၂၅ ဦး အပြင် ထိုင်းနိုင်ငံက ပြန်လာသူ ၉ ဦး စုစုပေါင်း ၃၄ ဦးတို့ရဲ့ နှာခေါင်နဲ့ အာခေါင်တို့ဖတ်ရယူပြီး အမျိုးသားကျန်းမာရေး ဓာတ်ခွဲမှုဆိုင်ရာဌာန(ရန်ကုန်)ကို ဓာတ်ခွဲစစ်ဆေးဖို့ဇွန် ၈ ရက်နေ့ကပေးပို့ထားတယ်လို့ သိရပါတယ်။
သရက်ခရိုင် ဆေးရုံအုပ်ကြီး ဒေါက်တာညွန့်ရွှေအောင် က “positive ထွက်သွားတဲ့ လူနာနဲ့ ဆက်စပ်နေတဲ့လူတွေကို ၂ ကြိမ် စစ်ဆေးတာက ကျန်းမာရေးဝန်ကြီးဌာနရဲ့ လမ်းညွန်ချက်နဲ့ စစ်တာဖြစ်ပါတယ်။ ပြည်ပက ပြန်လာတဲ့သူတွေကို ပထမအကြိမ် စစ်ဆေးပါတယ်။ negative ထွက်တဲ့သူတွေကို သတ်မှတ်ထားတဲ့ ၂၁ ရက်ပြည့်ခါနီး ၃ ရက်ကနေ ၅ ရက်အလိုမှာ ဒုတိယ အကြိမ်ထပ်မံစစ်ဆေးပြီး အမျိုးသားကျန်းမာရေးဓါတ်ခွဲဌာန ကို ပေးပို့စစ်ဆေးသွားမှာ ဖြစ်ပါတယ်။ ဒါကတော့ ဘေးအန္တရာယ်ကင်း ရှင်းအောင် လမ်းညွှန်ချက်တွေအတိုင်း စစ်ဆေးတာဖြစ်ပါတယ်”လို့ ဆိုပါတယ်။
သရက်မြို့မှာ ထိုင်းနိုင်ငံက ပြန်လည် ဝင်ရောက်လာသူတွေကို နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေးသင်တန်းကျောင်းမှာဖွင့်လှစ်ထားတဲ့ facility quarantine စင်တာမှာ အသွားအလာကန့်သတ် ထားရှိတာဖြစ်ပါတယ်။
သရက်ခရိုင်ဆေးရုံကြီးမှာ ကိုဗစ်-၁၉ ရောဂါကုသရေးလုပ်ငန်းတွေအတွက် AY ဆီဆိုင်ပိုင်ရှင်က ငွေကျပ်သိန်း ၄၀ မတည်ကာ ကျန်အလှူရှင်တွေ ထည့်ဝင်ငွေတွေနဲ့ သိန်း ၁၀၀ တန် portable X-ray ရွေ့လျား ဓာတ်မှန်စက်ဝယ်ယူဖို့ရှိနေပါတယ်။
ဒီအတွက် လိုအပ်နေတဲ့ငွေသိန်း ၃၀ ကျပ်ကို PTTEP Sa ရေနံကုမ္ပဏီက မနေ့က လာရောက်လှူဒါန်းခဲ့ပါတယ်။
သတင်း -ဘဦး
