ညောင်တုန်းတွင် မြစ်ကမ်းပါပြိုကျမှုကြောင့် နေအိမ် ၅ လုံးအရေးပေါ်ရွှေ့ပြောင်း
DVB
·
June 5, 2020
ဧရာဝတီတိုင်းဒေသကြီး၊ ညောင်တုန်းမြိုနယ်၊ ရန်ကင်းစံကျေးရွာအုပ်စု၊ ရန်ကင်းစံရာ (အနောက်ကျွန်း) ကျေးရွာမှာ ဇွန်လ ၂ ရက်နဲ့ ၄ ရက်နေ့တွေမှာ ကမ်းပါးပြိုကျခဲ့တာကြောင့် လူနေအိမ် ၅ လုံးကို အရေးပေါ်ရွှေ့ပြောင်းခဲ့ရပါတယ်။
ညောင်တုန်းမြို့နယ် ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန က မြို့နယ်ဦးစီးမှူး ဦးကျော်ကျော်ဝင်းစံက “ဖြစ်တာက ၂ ရက်နေ့က စဖြစ်တာပါ၊ မနေ့ကလည်း ထပ်ဖြစ်တယ်။ တဖြည်းဖြည်း လူနေ အိမ်တွေနဲ့ နီးလာတာကြောင့် အန္တရာယ်ရှိနိုင်တယ်။ အားလုံးရွှေ့ရတာဆိုရင် ၅ လုံးရှိသွားပြီ။ လောလောဆယ် ရွာထဲက သူတို့ရဲ ဆွေမျိုးတွေ နေအိမ်ကိုရွှေ့ပြောင်းပေးထားပါတယ်။ မီးသတ်တပ်ဖွဲ့ဝင်တွေ ကြက်ခြေနီတပ်ဖွဲ့ ဝင်တွေနဲ့ ဒေသခံပြည်သူတွေ ပူးပေါင်းပြီး ရွှေ့ပြောင်းပေးခဲ့ပါတယ်” လို့ ပြောပါတယ်။
မြစ်ကမ်းပါးပြိုကျမှုကြောင့် ရွှေ့ပြောင်းခဲ့ရတဲ့ နေအိမ် ၅ လုံးက မိသားစုဝင် ၅ စု၊ လူဦးရေ ၂၁ ဦးအတွက် ဆန်ရိက္ခာ ၇ ရက်စာနဲ့ အိမ်ဆောက်ပစ္စည်းရန်ပုံငွေ စုစုပေါင်း ၃၂၅၀၀၀ ကျပ်ကို ထောက်ပံပေးထားပြီး ဒီနေ့မှာလည်း ကျန်ရှိနေတဲ့ နေအိမ် ၂ လုံးတွက် ဆက်လက်ထောက်ပံ့ ပေးသွားမှာဖြစ်တယ်လို့ ဆိုပါတယ်။
မြစ်ရေတိုက်စားမှုကြောင့် နေအိမ်ပြောင်းရွှေ့ရတာနဲ့ ပတ်သက်ပြီး ညောင်တုန်းမြို့နယ် အမှတ် ၂ တိုင်း ဒေသကြီးလွှတ်တော်ကိုယ်စားလှယ် ဦးကျော်ဆန်းက ပန်းလှိုင်မြစ်ရေတိုက်စား မှုကြောင့် ကျေးရွာရဲ့ ကမ်းခြေအကျယ် ၇၅ ပေ၊ အလျား ၁၅၀ ပေခန့် မြစ်အတွင်းပြိုကျသွားပြီး နောက် အန္တရာယ်ရှိတဲ့ နေအိမ် ၃ လုံးကို အရေးပေါ်ရွှေ့ပြောင်းတာတွေ ပြုလုပ်ပေးခဲ့ပြီး နေအိမ် ၉ လုံးကို သတိပေးထားတယ်လို့ ပြောပါတယ်။
ပြိုကျသွားတဲ့ ကမ်းပါးနဲ့ ဆက်စပ်နေတဲ့ ကမ်းပါးတွေကို မြစ်ရေတိုက်စားမှုနဲ့ ရေလှိုင်းပုတ်ခက် တိုက်စားမှုဒဏ်ကို ကာကွယ်နိုင်ဖို့ ရေတားတာတွေ လှိုင်းကာတာတွေကို မြစ်ချောင်းများဖွံ့ဖြိုးရေးဦးစီးဌာနက ဆောင်ရွက်နေပြီး ကမ်းဆယ်တဲ့လုပ်ငန်းတွေကိုတော့ တိုင်းအစိုးရအဖွဲ့ထံ တင်ပြပြီး ဆက်လက်လုပ်ဆောင်သွားမှာဖြစ်တယ်လို့ တာဝန်ရှိသူတွေက ပြောပါတယ်။
မင်းထက်မုန်း (ပုသိမ်)
