ရေကြည်မြို့ Quarantine စင်တာမှထွက်ပြေးသူ အမျိုးသားကို ထောင်ဒဏ် ၁ လ ချမှတ်
DVB
·
May 15, 2020
ဧရာဝတီတိုင်း၊ ရေကြည်မြို့နယ်၊ ဇရပ်လှကျေးရွာ အထက်တန်းကျောင်းမှာ ဖွင့်လှစ်ထားတဲ့ စောင့်ကြည့်စင်တာက ထွက်ပြေးသူအမျိုးသားကို မေ ၁၄ ရက်နေ့က ရေကြည်မြို့နယ်တရားရုံးက အလုပ်ကြမ်းနဲ့ ထောင်ဒဏ် ၁ လ ချမှတ်ခဲ့တယ်လို့ ဒေသခံတွေက ပြောပါတယ်။
ထောင်ဒဏ် ၁ လချမှတ်ခံရတဲ့ အမျိုးသားမှာ ရေကြည်မြို့နယ်၊ ဇရပ်လှကျေးရွာက ကိုဇော်ဝင်းနိုင်ဖြစ်ကာ ရန်ကုန်က မေလ ၄ ရက်နေ့က ပြန်လာပြီး ကျေးရွာ အထက်တန်းကျောင်းမှာ ဖွင့်လှစ်ထားတဲ့ Community Based Facility Center မှာ ၂၁ ရက် စောင့်ကြည့်နေစဉ် ထွက်ပြေးခဲ့တာလို့ ကျေးရွာအုပ်ချုပ်ရေးမှူး ဦးမျိုးမင်းသန်းက ပြောပါတယ်။
"သူက ရန်ကုန်ကပြန်လာပြီး စောင့်ကြည့်စင်တာမှာ မေလ ၄ ရက်နေက စနေတာ၊ ဒီနေ့မနက်ပိုင်းက ထွက်ပြေးတာ ရဲတပ်ဖွဲ့က ဖမ်းဆီးပြီး တရားရုံးတင်တော့ အလုပ်ကြမ်းနဲ့ ထောင်ဒဏ် ၁ လ ချမှတ်ခဲ့တာ။"
ကျေးရွာစောင့်ကြည့်စင်တာက ထွက်ပြေးခဲ့တဲ့ ကိုဇော်ဝင်းနိုင်ကို ရဲတပ်ဖွဲ့က ဖမ်ဆီးပြီး ကျန်းမာရေးဌာန ဆရာဝန်တဦးရဲ့ တရားလိုပြုလုပ်တိုင်တန်းချက်အရ ရေကြည်မြို့နယ်တရားရုံးကို တရားစွဲတင်ပို့ခဲ့ကာ တရားရုံးက ကူးစက်ရောဂါများကာကွယ်နှိမ်နင်းရေးဥပဒေပုဒ်မ ၁၈ အရ အလုပ်ကြမ်းနဲ့ထောင်ဒဏ် ၁ လ ပြစ်ဒဏ်ချမှတ်ခဲ့တာလို့ ဆိုပါတယ်။
ရေကြည်မြို့နယ်မှာ မေလ ၁၀ ရက်နေ့ကလည်း ရန်ကုန်တိုင်း ရွှေပြည်သာမြို့နယ်က ပြန်လာတဲ့ အသက် ၃၀ အရွယ် အမျိုးသားတဦး စောင့်ကြည့်စင်တာမှာ နေထိုင်ဖို့ ငြင်းဆိုလို့ ကူးစက်ရောဂါများကာကွယ်နှိမ်နင်းရေးဥပဒေနဲ့ တရားစွဲပြီး ထောက်ဒဏ် ၁ လ ပြစ်ဒဏ် ချမှတ်ခဲ့ပါတယ်။
COVID-19 ရောဂါကာလအတွင်း ရေကြည်မြို့နယ်မှာ ညမထွက်အမိန့်မလိုက်နာလို့ ရာဇသတ်ကြီးပုဒ်မ ၁၈၈ နဲ့ တရားစွဲဆိုခံရသူ ၅ ဦးရှိပြီး ထုတ်ပြန်ထားတဲ့ အမိန့်တွေကို မလိုက်နာလို့ ကူးစက်ရောဂါများကာကွယ်နှိမ်နင်းရေးဥပဒေနဲ့ အရေးယူထားသူ ၉ ဦးရှိတယ်လို့ ရေကြည်ရဲတပ်ဖွဲ့ရဲ့ မှတ်တမ်းတွေအရ သိရပါတယ်။
မင်းထက်မုန်း (ပုသိမ်)
