အိန်ဂျယ်မြို့က ကိုဗစ်-၁၉ ဆိုင်ရာ ခေါင်းဆောင်မှု
DVB
·
April 24, 2020
ကမ္ဘာကျော် ဟောလီးဝုဒ် မင်းသားကြီး တွမ်ဟန့်ခ်နဲ့ ဇနီးမောင်နှံတို့ ကိုရိုနာဗိုင်းရပ်စ် ကူးစက်ခံထားရတယ်ဆိုတဲ့ သတင်းက ကမ္ဘာတဝန်းမှာရှိတဲ့ သူရဲ့ပရိသတ်တွေနဲ့ လူအများကို စိုးရိမ်မှုတွေဖြစ်စေခဲ့ပါတယ်။
ဟောလီးဝုဒ်မြို့တော်လို့ တင်စားတဲ့ လော့စ်အိန်ဂျလိစ်မြို့မှာလည်း ကိုဗစ်-၁၉ ကူးစက်ခံရသူ ဦးရေတိုးလာတာနဲ့အမျှ လော့စ်အိန်ဂျလိစ်မြို့သူ၊ မြို့သားတွေ ဖြစ်တဲ့ အိန်ဂျယ်လီနိုတွေကလည်း သူတို့ရဲ့ ကျန်းမာရေးဆိုင်ရာ၊ လုံခြုံမှု၊ စီးပွားရေး၊ လူမှုရေးတွေနဲ့ ပတ်သက်ပြီး စိုးရိမ်မှုတွေ မြင့်တက်လာပါတယ်။
မြို့ခံလူထုကတော့ အခုလို မသေချာ၊ မရေရာမှုတွေထဲမှာ သူတို့အတွက် အဖြေကို ရှာရုံသာမက သူတို့ကို လမ်းညွှန်ပြသပေးမယ့် သူ၊ တစ်နည်းအားဖြင့် ပြောရမယ်ဆိုရင် သူတို့တတွေရဲ့ စိုးရိမ်ပူပန်မှုတွေကို ဖယ်ရှားပေးနိုင်မယ့် ခေါင်းဆောင်ကောင်း တစ်ယောက်ကို ရှာဖွေနေမိကြပါတယ်။ ဒါ့ကြောင့်လည်း လော့စ်အိန်ဂျလိစ်မြို့တော်ဝန် အဲရစ်ဂါစီးတီးကို သူတို့ရဲ့ အထူးအာရုံစိုက်စရာနဲ့ အားထားရာ သူတစ်ယောက်အဖြစ် ရှုမြင်လာပါတယ်။
မြို့တော်ဝန် အဲရစ်ဂါစီးတီးကလည်း သူသိပ်ချစ်ရတဲ့ မြို့တော်အတွက် အလွန်အင်မတန်မှ ကျစ်လျစ်ပြီး ထိရောက်တဲ့ စီမံကိန်းတွေကို ချမှတ်ကာ တစိုက်မတ်မတ် လုပ်ဆောင်မှုတွေကြောင့် အိန်ဂျယ်လီနိုတွေက လေးစားယုံကြည်မှုကို ရရှိခဲ့ပြီး သူရွေးချယ် လုပ်ဆောင်ခဲ့တဲ့ နည်းလမ်း တွေက နောင်လာနောင်သားတွေနဲ့ အနာဂတ်ခေါင်းဆောင်တွေအတွက် စံနမူနာ ယူစရာ ကောင်းလှပါတယ်။
အခြေအနေအလိုက် ဖျတ်လတ်မှန်ကန်မှုရှိခြင်း
မြို့တော်ဝန် အဲရစ်ဂါစီးတီးက လော့စ်အိန်ဂျလိစ်မြို့တော်အတွက် ကိုဗစ်-၁၉ ကူးစက်ခံရသူ အနည်းငယ်ရှိစဉ်မှာပဲ ဒေသအတွင်း အရေးပေါ်အခြေအနေကို မတ်လ ၄ နေ့မှာ ကြေညာပြီး နောက်မှာတော့ လူစူလူဝေး အယောက် ၅၀ နဲ့ အထက် စုဝေးခြင်းကို တားမြစ်လိုက်ပါတယ်။ ဆက်လက်ပြီး လူ ၁၀ ယောက်အထက် စုဝေးမှုကို ကန့်သတ်ကာ ကျောင်းတွေ၊ အများပြည်သူနဲ့ ပတ်သက်တဲ့ အဆောက်အဦတွေနဲ့အတူ စီးပွားရေးလုပ်ငန်းတော်တော်များများကို ရပ်တန့်ဖို့ အမိန့်ထုတ်ပြန်ပါတယ်။
အခုအချိန်မှာတော့ အိမ်တွင်းမှာသာနေကြဖို့ အမိန့်ထုတ်ပြန်ထားပြီး အပြင်ထွက်ဖို့ လိုအပ်ပါက Masks တွေတပ်ကြဖို့၊ တစ်ယောက်နဲ့ တစ်ယောက် ၆ ပေ ခွာပြီး သွားလာကြဖို့လည်း အထူးသတိပေး နှိုးဆော်ထားပါတယ်။
ကမ္ဘာတဝန်းမှာတော့ ကိုဗစ်-၁၉ နဲ့ ပတ်သက်ပြီး လော့ဒ်ဒေါင်းချဖို့ တစ်နည်းပြောရမယ်ဆိုရင် ရောဂါကပ်ဘေးကို ရပ်တန့်စေဖို့အတွက် အများပြည်သူတွေ အိမ်အပြင်ထွက်တာတွေကို ရုတ်တရက် ကန့်သတ်လိုက်တဲ့ စနစ်ကိုကျင့်သုံးလိုက်ချိန်မှာတော့ မြို့တော်ဝန် အဲရစ်ဂါစီးတီးက အိန်ဂျယ်လီနိုတွေအတွက် တစ်ဆင့်ပြီးတစ်ဆင့် သွားလို့ရမယ့် နည်းလမ်းတွေကို ရွေးချယ် သွားတာကိုတွေ့ရပါတယ်။
ဒီလိုရွေးချယ်လိုက်ခြင်းရဲ့ ရလဒ်ကတော့ မလိုလားအပ်တဲ့ စိုးရိမ်လွန်ကဲမှုတွေကို ဖြေဖျောက်ပေးရုံသာမက သူတို့အတွက် လုံလောက်တဲ့ ပြင်ဆင်မှုတွေကို ရရှိစေပြီး အစိုးရရဲ့ ချမှတ်လိုက်တဲ့ လမ်းညွှန်ချက်တွေနဲ့ အမိန့်တွေကို ယုံယုံကြည်ကြည်နဲ့ နာခံ လိုက်ပါလုပ်ဆောင်ဖို့ ဖြစ်စေပါတယ်။
တိကျမှန်ကန်ပြီး သတင်းအချက်အလက်များကို ဦးစားပေးဆောင်ရွက်မှုရှိခြင်း
ကိုဗစ်-၁၉ နဲ့ ပတ်သက်တဲ့ သတင်းတု၊ သတင်းအမှားတွေကလည်း ကူးစက်ခံရသူ ဦးရေ များလာတာနဲ့အမျှ တိုးတိုးလာနေပါတယ်။ ဒါ့ကြောင့် မြို့တော်ဝန် အဲရစ်ဂါစီးတီးက မြို့ခံတွေကို ကိုဗစ်-၁၉ နဲ့ ဆက်နွှယ်တဲ့ သတင်းအချက်အလက်တွေ၊ ဝန်ဆောင်မှုတွေ၊ အကူအညီတွေ၊ အရေးပေါ်အခြေအနေတွေ၊ ဆေးစစ်နေရာတွေနဲ့ မြို့တော်ဝန်ရုံးက ကူညီဆောင်ရွက်ပေးနေတာတွေ စတဲ့ လိုအပ်တဲ့ အသေးစိတ် အချက်အလက်တွေကို မြို့တော်ဝန်ရုံးနဲ့ တခြား အစိုးရရုံးဆိုင်ရာ ဝက်ဘ်ဆိုက်တွေ၊ လူမှုကွန်ရက်တွေနဲ့ သတင်းမီဒီယာတွေကတဆင့် အချိန်တိုင်း၊ နေ့ရက်တိုင်း ဖြန့်ဝေပေးပါတယ်။
ဥပမာ https://emergency.lacity.org/notifyla ဝက်ဘ်ဆိုက်မှာ ဝင်ရောက်ပြီး ကိုယ်ပိုင်အကောင့်လုပ်ဆောင်ခြင်းဖြင့် အရေးပေါ်အခြေအနေကြုံလာရင် အရေးကြီးတဲ့ သတင်း အချက်အလက်တွေကို ကိုယ်ရဲ့ မိုလ်ဘိုင်းဖုန်းက တဆင့်ရရှိမှာဖြစ်ပါတယ်။
ဒါ့အပြင် ကိုယ်တိုင်ကာယ၊ ဉာဏအားဖြင့် လုပ်အားပေးခြင်း၊ ငွေကြေးအားဖြင့် ပါဝင်နိုင်ဖို့ တစ်နည်းပြောရမယ်ဆိုရင် အိန်ဂျယ်လီနိုတွေအချင်းအချင်း အားပေးကူညီ ဖေးမနိုင်ဖို့ အခွင့်အရေးတွေကို Mayor’s Fund for Los Angles နဲ့ Community COVID-19 Response Volunteer Interest ကတဆင့် ပြင်ဆင်ပေးထားကိုတွေ့ရပါတယ်။
တဆက်တည်းမှာပဲ ကိုဗစ်-၁၉ ကပ်ဘေးကြောင့် အလုပ်လက်မဲ့ဖြစ်သွားတဲ့ အလုပ်သမားတွေ၊ ဝင်ငွေနည်းသွားတဲ့ အလုပ်ရှင်တွေ၊ လုပ်ငန်းရပ်တန့်သွားရတဲ့ အစိုးရမဟုတ်တဲ့ အဖွဲ့အစည်းတွေ အစရှိတဲ့ နစ်နာဆုံးရှုံးခံရသူ တစ်ဦးတစ်ယောက်ချင်းနဲ့ အဖွဲ့အစည်းတွေအတွက် ငွေကြေးဆိုင်ရာ ထောက်ပံ့မှုတွေနဲ့ ပတ်သက်တဲ့ သတင်းအချက်အလက်တွေကိုလည်း Resilience Toolkit for Los Angeles Businesses မှာ တွေ့ရပါတယ်။
မြို့တော်ဝန် အဲရစ်ဂါစီးတီးရဲ့ အဓိက ရည်မှန်းချက်ပန်းတိုင်ကို ပြောရမယ်ဆိုရင် အိန်ဂျယ်လီနိုတွေအားလုံး တိကျမှန်ကန်တဲ့ သတင်းအချက်တွေ ရရှိရေး၊ ကြိုတင်ကာကွယ်နိုင်ရေးနဲ့ အထူးသဖြင့် လုံခြုံမှုရှိရေးတို့ပဲဖြစ်ပါတယ်။
ကျစ်လျစ်ခိုင်မာပြီး ထိရောက်တဲ့ ဆုံးဖြတ်ချက်ချခြင်း
လော့စ်အိန်ဂျလိစ်မြို့ရဲ့ ပြည်သူ့ကျန်းမာရေး ကာကွယ်ဖို့နဲ့ ကိုရိုနာဗိုင်းရပ်စ်မပြန့်ပွားဖို့ ကြိုတင်ပြင်ဆင်တဲ့ နေရာမှာ မြို့တော်ဝန် အဲရစ်ဂါစီးတီးက လမ်းစဉ် ၅ ခုကို အသုံးပြုသွားတာကို တွေ့ရပါတယ်။ အဲဒါကတော့ (၁) သတင်းအချက်အလက် (၂) အသင်းအဖွဲ့ (၃) ရဲဘော်ရဲဘက် (၄) သိပ္ပံပညာ နဲ့ (၅) ကျွမ်းကျင်ပညာရှင်တွေ ဖြစ်ပါတယ်။
မြို့တော်ဝန် အဲရစ်ဂါစီးတီးရဲ့ ပြည့်စုံလုံလောက်တဲ့ သတင်းတွေပါဝင်ပြီး အချက်အလက်တွေကို အခြေခံတဲ့ မူဝါဒတွေက အမေရိကန်နိုင်ငံရဲ့ ကူးစက်ရောဂါနှင့် ရောဂါထိန်းချုပ်ရေးဌာန၊ ကမ္ဘာ့ထိပ်တန်း တက္ကသိုလ်တွေဖြစ်တဲ့ ဟားဗတ်တက္ကသိုလ်၊ ဂျွန်ဟော့ကင်းတက္ကသိုလ်နဲ့ ယူစီအယ်အေတက္ကသိုလ်တို့က ထုတ်ပြန်တဲ့ ယုံကြည်စိတ်ချရတဲ့ သတင်းအချက်အလက်တွေကို အသုံးပြုထားတာကို တွေ့ရပါတယ်။
သူ့ရဲ့ အားကောင်းတဲ့ ဆုံးဖြတ်ချက်တွေက သူ့ရဲ့ အဖွဲ့သူ၊ အဖွဲ့သားတွေရဲ့ မဆုတ်မနစ် သောကြိုးစားမှုရဲ့ ရလဒ်တွေကြောင့် ဖြစ်ပါတယ်။ နောက်တစ်နည်း အနေနဲ့ ပြောရမယ်ဆိုရင် အတွေ့အကြုံနဲ့ ဗဟုသုတကြွယ်၀သူတွေ အချင်းချင်း ပူးပေါင်းကာ ပြင်းပြင်းထန်ထန် ခေါင်းချင်းရိုက်ပြီး အဖြေရှာထားတာဖြစ်ပါတယ်။ အမေရိကနဲ့ ကမ္ဘာတဝန်းက သူ့လိုမျိုးတခြား မြို့တော်ဝန်တွေဆီက ကိုဗစ်-၁၉ နဲ့ ပတ်သက်ပြီး ထိရောက်စွာ ဖြေရှင်းနိုင်တဲ့ နည်းလမ်းတွေကို သင်ခန်းစာယူခြင်းကလည်း အိန်ဂျယ်လီလိုတွေအတွက် မြို့တော်ဝန် တစ်ယောက်အနေနဲ့ အကောင်းဆုံးသော ဆုံးဖြတ်ချက်တွေ ချမှတ်နိုင်ဖို့ အထောက်အပံ့ ဖြစ်စေတာကိုလည်း တွေ့ရပြန်ပါတယ်။
ဒါ့အပြင်၊ ပြည်သူ့ကျန်းမာရေးဆိုင်ရာ အထူးကျွမ်းကျင်တဲ့ ဆရာဝန်တွေ၊ အဏုဇီ၀ဗေဒဆိုင်ရာ သိပ္ပံပညာရှင်တွေနဲ့ အခြားတတ်သိကျွမ်းကျင် ပညာရှင်တွေရဲ့ ထောက်ပြပြောဆိုမှုတွေကို အလေးပေးနားစွင့်တာကလည်း မြို့တော်ဝန် အဲရစ်ဂါစီတီးအတွက် တိကျမှန်ကန်ပြီး လျင်မြန်တဲ့ ဆုံးဖြတ်ချက်တွေ ချမှတ်နိုင်ဖို့အတွက် အထောက်အကူ ဖြစ်စေပါတယ်။
ပွင့်လင်းမြင်သာပြီး တိုက်ရိုက်ဆက်သွယ်ပြောဆိုနိုင်ခြင်း
ထိတ်လန့်တကြား စျေးဝယ်စုဆောင်းတာတွေနဲ့ အိမ်သာသုံး စက္ကူတွေ ဝယ်ယူတဲ့အခါမှာ ခိုက်ရန်ဖြစ်ပွားတာတွေကို ရိုက်ကူးထားတဲ့ ဗွီဒီယိုဖိုင်တွေ လူမှုကွန်ရက်တွေမှာ ပလူပျံနေချိန်၊ ကမ္ဘာ့နိုင်ငံ အသီးသီးက မြို့တော်တွေမှာလည်း ခုလို အဖြစ်အပျက်တွေ ဖြစ်ပေါ်နေခိုက်၊ လော့စ်အိန်ဂျလိစ်မြို့တော်ကလည်း ထူးမခြားနားတဲ့ အခြေအနေမျိုးမှာ ရှိနေပါတယ်။
ဒါပေမယ့် မြို့တော်ဝန် အဲရစ်ဂါစီတီးရဲ့ စံပြလုပ်ဆောင်မှုက ဖြစ်ပျက်နေတဲ့ အခြေအနေတွေကို အကျည်းတန် ဆိုးဝါးမှုအဖြစ်သို့ မရောက်အောင် စွမ်းဆောင်ပေးလိုက်ပါတယ်။ ဥပမာတစ်ခု ပြရမယ်ဆိုရင် မြို့တော်ဝန် ကိုယ်တိုင် အစားအသောက်တွေထုတ်လုပ်တဲ့ လုပ်ငန်းခွင်ကို သွားရောက်ပြီး သူရဲ့ ဖေ့စ်ဘွတ်ခ်မှာ Live လွှင့်ရင်း အစားအသောက်နဲ့ ပတ်သက်ပြီး စိုးရိမ်လွန်၊ အကြောက်လွန် မဖြစ်ကြဖို့နဲ့ အိန်ဂျယ်လီနိုတွေအတွက် သူဘယ်လို အကောင်းဆုံး စီမံထားတာတွေကို ပြောပြပါတယ်။
ပြီးတော့ သူက “လော့စ်အိန်ဂျလိစ်မြို့မှာ အစားအသောက် ပြတ်လပ်မှု မရှိပါဘူး။ အစားအသောက်ဝယ်ဖို့ ဆိုင်တွေကို အလောတကြီးသွားစရာမလိုပါဘူး။ အိန်ဂျယ်လီနိုတွေ အနေနဲ့ ခုလိုမျိုး မသေချာ မရေရာတဲ့ ကာလမှာ စိုးရိမ်တကြီး ရှိနေမယ်ဆိုတာကို ကျနော်ကောင်းကောင်းကြီး နားလည်ပါတယ်။ ဒါပေမယ့်၊ အားလုံးကို အသိပေး စိတ်ချစေချင်တာ တစ်ခုကတော့ အစားအသောက်ဝယ်ဖို့ စျေးဆိုင်တွေက ဖွင့်အုံးမှာ ဖြစ်ပြီး လုံလောက်တဲ့ အစားအသောက်တွေကို ဆိုင်တွေမှာ အရောက် ပို့ထားပေးမှာဖြစ်တယ်ဆိုတာပါပဲ။ ကျေးဇူးပြုပြီး စျေးဝယ်မယ်ဆိုရင် အချင်းချင်း ခပ်ခွာခွာနေပြီး လူစုလူဝေးနဲ့ မဝယ်ကြဖို့လည်း တိုက်တွန်းပါတယ်” လို့ ရေးသားပြီး သူ့ရဲ့ ဖေ့စ်ဘွတ်ခ်မှာ ရေးထားပါတယ်။
မြို့တော်ဝန် အဲရစ်ဂါစီးတီးက သူ့ရဲ့ ဖေ့စ်ဘွတ်ခ် နဲ့ တွီတာ စာမျက်နှာပေါ်မှာ “ဗိုင်းရပ်စ်ဟာ လူမျိုးခွဲခြားတာတွေ မလုပ်ပါဘူး။ ကျနော်တို့ကလည်း ကျနော်တို့တတွေရဲ့ မိတ်ဆွေဖြစ်တဲ့ အာရှလူမျိုးတွေနဲ့ အာရှ-အမေရိကန် အသိုက်အဝိုင်းတွေကို လူမျိုးရေးအရ ခွဲခြားတာ၊ တိုက်ခိုက်တာ တွေကို လုံး၀ သည်းခံမှာ မဟုတ်ဘူး” ဆိုပြီး ရေးသားကာ အာရှလူမျိုးနဲ့ အာရှ-အမေရိကန်တွေကို ကာကွယ်ပြောဆိုသွား ပါတယ်။
ခုလို ခွဲခြားဆက်ဆံမှုနဲ့ ပတ်သက်ပြီး ပွင်းပွင်းလင်းလင်း ပြောဆိုကိုင်တွယ်နေမှုက မြို့တော်ဝန်ရဲ့ ပြည်သူ့ဆက်ဆံရေးရာမှာ လွန်စွာပါးနပ်မှုရှိသူဖြစ်တယ်ဆိုတာကိုလည်းပြသသွားရာ ရောက်ပါတယ်။ တကယ်တော့ ခေါင်းဆောင်မှုဆိုတာ ကိုယ့်ရဲ့ အလေးထား တန်ဖိုးထားမှုနဲ့ ယုံကြည်မှုတွေကို ရှင်းရှင်းလင်းလင်း ပြောဆိုနိုင်တာ ဖြစ်ပါတယ်။ ပြဿနာ ကြီးကြီးမားမား မဖြစ်ခင် ကြိုတင်ပြီး ကိုင်တွယ် ဖြေရှင်းနိုင်ခြင်းကလည်း ခေါင်းဆောင်မှုဆိုင်ရာ နောက်ထပ် အရည်အချင်း တစ်ခုပဲဖြစ်ပါတယ်။ လူမျိုးရေးကြောင့် မြို့သူမြို့သားတွေ အကြား အဓိကရုဏ်းတွေ မဖြစ်ရလေအောင် ကြိုတင်ပြီး ရှင်းရှင်းလင်းလင်း လုပ်ဆောင်ထားနိုင်တာက မြို့တော်ဝန်ရဲ့ ခေါင်းဆောင်စွမ်းရည်တစ်ရပ်ကို အထင်းသားကြီး မြင်သာအောင် ပြသလိုက်ခြင်းပဲ ဖြစ်ပါတယ်။
မြို့တော်ဝန် အဲရစ်ဂါစီးတီးက သတင်းစာရှင်းလင်းပွဲအစပြုတိုင်းလိုလိုမှာ ကိုရိုနာဗိုင်းရပ်စ်ကို တွန်းလှန်ကြတဲ့ အိန်ဂျယ်လီနိုတွေရဲ့ အပြုသဘောဆောင်ပြီး ချစ်စရာကောင်းတဲ့ အမူအကျင့်တွေကို ချီးကျူးလေ့ရှိပါတယ်။
ဥပမာပြောရမယ်ဆိုရင် ဗိုင်းရပ်စ်မပြန့်ပွားဖို့ အိမ်မှာနေရင်း သူတို့ အချင်းချင်း ရိုင်းပင်းကူညီကြပုံ၊ လူစုလူဝေး မလုပ်ဘဲ တစ်ယောက်နဲ့ တစ်ယောက် ခပ်ခွာခွာနေပြီး မွေးနေ့ပွဲတွေ ပြုလုပ်ကျင်းပပုံ တို့ပဲဖြစ်ပါတယ်။
ခုလိုမျိုး သတင်းမီဒီယာတွေကို အိန်ဂျယ်လီလိုတွေအကြောင်း ပြောဆိုတာက သူတို့တတွေရဲ့ နိစ္စဓူ၀ကိစ္စရပ်တွေကို သူက အမြဲနားစွင့်နေတယ်ဆိုတဲ့ အကြောင်းကို ပြသလိုက်ရုံသာမက အခြားသူတွေကိုလည်း ကိုဗစ်-၁၉ ကို ရင်ဆိုင်ဖြေရှင်းတဲ့ နေရာမှာ အတူတကွ အားလုံးပါဝင် ပတ်သက်နေတယ်ဆိုတာကိုလည်း အသိပေးလိုက်တာလည်းဖြစ်ပါတယ်။ ဒါ့အပြင် မြို့တော်ဝန် အဲရစ်ဂါစီးတီးက သတင်းမီဒီယာတွေရဲ့ မေးမြန်းမှုတို့ကိုလည်း သင့်တင့်လျောက်ပတ်စွာ ပျူငှာယဉ်ကျေးစွာ၊ ကျိုးကြောင်းဆီလျော်စွာ၊ ရိုးသားစွာ ဖြေကြားသွားတာကိုလည်း တွေ့ရပါတယ်။
အားပေးကူညီပြီး ဂရုစိုက်တတ်တဲ့ ခေါင်းဆောင်
မြို့တော်ဝန် အဲရစ်ဂါစီးတီးက အိန်ဂျယ်လီနိုတွေ “အိမ်မှာနေရမယ်” ဆိုတဲ့ အမိန့် မချမှတ်ခင်လေးမှာ ကိုဗစ်-၁၉ ကို တွန်းလှန်တဲ့ အနေနဲ့ အိမ်ခြေရာမဲ့ အိန်ဂျယ်လီနိုတွေအတွက် အရေးပေါ် ခိုလှုံဖို့ နေစရာ အိမ်ရာတွေ ပြင်ဆင်ပေးမယ်ဖို့ ကြေညာပါတယ်။ တကယ်လည်း “အိမ်မှာနေရမယ်” ဆိုတဲ့ အမိန့်ကို ချမှတ်ပြီးချိန်မှာတော့ နေစရာနေအိမ်မရှိ လမ်းမပေါ်က အိမ်ခြေရာမဲ့ အိန်ဂျယ်လီနိုတွေက လုံခြုံစိတ်ချရတဲ့ နေရာမှာ နေပြီးသား ဖြစ်နှင့်နေပြီ။ ရလဒ်အနေနဲ့ စိုးရိမ်ကြောင့်ကြမှုအဆင့်ကို ထိန်းချုပ်ပြီးသားဖြစ်နေပါတယ်။
မြို့တော်ဝန်က “အိမ်မှာနေရမယ်” ဆိုတဲ့ အမိန့်ကာလအတွင်း အိမ်တွင်းအကြမ်းဖက် ခံရတဲ့ အမျိုးသမီး အတော်တော်များများကိုလည်း ကယ်ဆယ်မှုတွေ ပြုလုပ်ခဲ့တယ်လို့ ထုတ်ဖော်ပြောကြားပါတယ်။ အလုပ်လက်မဲ့ဖြစ်ပြီး အိမ်ငှားခ မပေးနိုင်တဲ့ သူတွေ အတွက်လည်း စိတ်မပူကြဖို့နဲ့ လက်ရှိကာလအတွင်း အိမ်ရှင်က နှင်ထုတ်လို့ မရအောင် ဥပဒေအရ အကာအကွယ်ပေးထားကြောင်း အားပေးစကားပြောကြားပါတယ်။
ဒါ့အပြင် ကိုဗစ်-၁၉ ကို ရှေ့တန်းမှာ ကိုယ်ကျိုးစွန့် ဝင်ရောက်လုပ်ကိုင်နေတဲ့ ကျန်းမားရေး ဝန်ထမ်းတွေအပါအဝင် တစ်ဦးတစ်ယောက်ချင်းစီကို ဂုဏ်ပြုအားပေးတဲ့ အနေနဲ့ မြို့တော်ဝန်ရုံး တည်ရှိရာဖြစ်တဲ့ မြို့တော်ခန်းမကိုလည်း အပြာရောင် အလင်းတန်းထွန်းခြင်း၊ အိန်ဂျယ်လီနိုတွေ အားလုံးကို ည ၈ နာရီရောက်တိုင်း လက်ခုပ်ဩဘာတီးဖို့ လှုံ့ဆော်ကာ အမိန့်နာခံပြီး အိမ်မှာ နေကြတဲ့သူတွေ အချင်းချင်း လည်း တစ်ယောက်ကိုတစ်ယောက် အားပေးဂုဏ်ပြုဖို့ အားပေးပါတယ်။
ဒါ့အပြင် ဆေးပစ္စည်းအမျိုးမျိုးနဲ့ ဆေးအိပ်ခုတင် ၁၀၀၀ လုံးပါ အမေရိကန်ရေတပ်က ကရုဏာသင်္ဘောကြီးကို ကြိုဆိုခဲ့ပြီး လော့စ်အိန်ဂျလိစ်မြို့ရှိ ညီလာခံပြုလုပ်ရာ အဆောက်အအုံကြီးကိုလည်း ခေတ္တဆေးရုံအဖြစ်သို့ ပြောင်းလဲလိုက်တာက ဆေးပစ္စည်းတွေ ကိရိယာတန်ဆာပလာတွေ အလုံအလောက်မရှိမှာကို စိုးရိမ်ပူပန်နေတဲ့ အိန်ဂျယ်လီနိုတွေအတွက် သက်သာမှုကို ရရှိစေပါတယ်။
ရိုးသားမှုရှိပြီး အစစ်အမှန်ဖြစ်သောခေါင်းဆောင်
မြို့တော်ဝန် အဲရစ်ဂါစီးတီးက သူ့ရဲ့ ပတ်ဝန်းကျင်မှာ ဖြစ်ပျက်နေတဲ့ အခြေအနေအမျိုးမျိုးကို အထူးသိမှတ်မှုရှိပြီး ကောင်းသထက်ကောင်းအောင် အမြဲကြိုးစားလုပ်ဆောင်တတ်တဲ့ ခေါင်းဆောင်ကောင်း တစ်ဦးလည်းဖြစ်ပါတယ်။
လော့စ်အိန်ဂျလိစ်မြို့ရဲ့ ပြည်သူ့ကျန်းမာရေးဌာနက ၂၀၂၀ ပြည့်နှစ် ဧပြီ ၁၂ ရက် ညနေပိုင်း ၄ နာရီ ထုတ်ပြန်တဲ့ စာရင်းမှတ်တမ်းအရ လော့စ်အိန်ဂျလိစ်မြို့မှာ ကိုဗစ်-၁၉ လူနာပေါင်း ၉၁၀၀ ကျော်ရှိပြီး မြို့တော်ခန်းမရဲ့ ဝန်ထမ်း အပါအဝင် သေဆုံးသူ ဦးရေမှာ ၃၀၀ နီးပါးရှိပါတယ်။
ကြားရတဲ့ သတင်းတွေက မြို့တော်ဝန် အဲရစ်ဂါစီးတီးနဲ့အတူ သူ့ရဲ့ အဖွဲ့သူ၊ အဖွဲ့သားတွေနဲ့ အိန်ဂျယ်လီနိုတွေအတွက် အလွန်အင်မတန်မှ စိတ်ကြေကွဲဖွယ်ရာ ဖြစ်စေပါတယ်။
မြို့တော်ဝန်ကို အိန်ဂျယ်လီနိုတွေအတွက် ဘယ်အရာတွေမှာ ပိုမိုလုပ်ဆောင်ဖို့ လိုအပ်ပါသလဲလို့ မေးမြန်းတဲ့အခါမှာတော့ သူလုပ်ဆောင်ခဲ့တဲ့ ကောင်းကွက် အမျိုးမျိုးကို ထုတ်ဖော်ဝင့်ကြွားခြင်းမရှိဘဲ ဖယ်ဒရယ်အစိုးရဆီက ငွေကြေး အထောက်အပံ့တွေ၊ ကိုဗစ်-၁၉ စစ်ဆေးမှုတွေ၊ အသက်ရှုစက်တွေ၊ ကိုယ်ပိုင်ကာကွယ်ရေးပစ္စည်းတွေ အစရှိတာတွေ ပိုမိုရရှိအောင် လုပ်ပေးဖို့ လိုအပ်ကြောင်း ဖွင့်ဟပြောဆိုသွားပါတယ်။ ဒါက မြို့တော်ဝန်ရဲ့ ရိုးသားမှုနဲ့အတူ အမှန်တရားကို ပြောဆိုရဲတဲ့ ဝိသေသလက္ခဏာကို ထုတ်ဖော်လိုက်တာလည်း ဖြစ်ပါတယ်။ ပြီးတော့ မြို့တော်ဝန်က လက်ရှိမှာ အောက်ခြေအဆင့်ထိ ဖြစ်ပျက်နေတဲ့ အကြောင်းအရာတွေကို သိရှိပြီး လက်တွေ့ အခြေနေနဲ့ ထပ်တူကျမှု ရှိနေကြောင်းလည်း ဖော်ပြပြီးသားဖြစ်နေပါတယ်။
ယုံကြည်စိတ်ချရတဲ့ ခေါင်းဆောင်
ခေါင်းဆောင်မှုဆိုင်ရာရဲ့ အနှစ်သာရ ကိုပြောရမယ်ဆိုရင် “ယုံကြည်စိတ်ချလို့ရနိုင်ခြင်း” ဖြစ်ပါတယ်လို့ အမေရိကန် လူမည်းတွေအထဲက နိုင်ငံခြားရေးဝန်ကြီးအဖြစ် ပထမဦးဆုံး တာဝန်ယူခဲ့ဖူးတဲ့ ကောလင်းပါဝဲလ်က ပြောကြားခဲ့ဖူးပါတယ်။
မြို့တော်ဝန် အဲရစ်ဂါစီးတီးရဲ့ ရိုးသားမှု၊ သမာသမတ်ကျမှု၊ အကောင်းမြင်ဝါဒရှိမှု၊ ဂရုစိုက်တတ်မှု၊ အကြောင်းအရာ အဖြစ်အပျက်တွေကို ရှင်းလင်းမြင်သာစွာ ပြောဆိုဆက်ဆံတတ်မှု၊ အိန်ဂျယ်မြို့ကောင်းစားရေးအတွက် စွမ်းဆောင်ရာမှာ ကြိုးစားအားထုတ်မှုနဲ့ အတူ စိတ်အားထက်သန်မှုရှိခြင်းတို့က သူဟာ ယုံကြည်စိတ်ချနိုင်သော ခေါင်းဆောင်ကောင်းတစ်ဦး ဖြစ်တယ်ဆိုတာကို ပြသလိုက်ခြင်းပဲဖြစ်ပါတယ်။
သိပ်မကြာသေးခင်က လိုယိုလာမယ်ရီမောင့် တက္ကသိုလ် (Loyola Marymount University) ရဲ့ စာတမ်းကောက်ခံမှုအရ အိန်ဂျယ်လီနိုအများစု (၉၅%) က မြို့တော်ဝန် အဲရစ်ဂါစီးတီးရဲ့ “အိမ်မှာနေရမယ်” ဆိုတဲ့ အမိန့်ကို ထောက်ခံကြောင်း တွေ့ရှိရပါတယ်။ တစ်ချိန်တည်းမှာပဲ အိန်ဂျယ်လီနိုတွေက ကိုရိုနာဗိုင်းရပ်စ် မကူးစက်အောင် မိမိကိုယ်ကို မိမိ ဘယ်လိုကာကွယ်နိုင်မလဲ ဆိုတာနဲ့ ကူးစက်ခံပါက ဖြစ်ပေါ်လာတတ်တဲ့ ရောဂါလက္ခဏာတွေကိုလည်း မှန်ကန်စွာ ဖြေဆိုနိုင်ကြောင်းလည်း စစ်တမ်းမှာ ဖော်ပြထားပါတယ်။
အချုပ်ပြောရမယ်ဆိုရင် မြို့တော်ဝန် အဲရစ်ဂါစီးတီးဟာ ယုံကြည်စိတ်ချလို့ရနိုင်သူ ခေါင်းဆောင်တစ်ဦးရဲ့ ပြယုဂ်ဖြစ်ပြီး အိန်ဂျယ်လီနိုတွေရဲ့ အလိုအပ်ဆုံးအချိန်ဖြစ်တဲ့ ခုလို ကိုဗစ်-၁၉ ကြောင့် မသေချာမရေရာတဲ့ အခြေအနေအမျိုးမျိုးထဲမှာ သူတို့အတွက် မားမားမတ်မတ် ရပ်တည်ပေးတဲ့ သူတို့ ချစ်ခင် လေးစားဂုဏ်ယူရတဲ့ မြို့တော်ဝန်ကြီးကို အမြဲကျေးဇူးတင်မဆုံး ဖြစ်နေကြမှာပါ။
ဇော်တူးခေါင် (လော့စ်အိန်ဂျလိစ်)
(စာရေးသူ ဇော်တူးခေါင်သည် McCain Institute ၏ အနာဂတ်မျိုးဆက်သစ်ခေါင်းဆောင် အစီအစဉ်၌ ပါဝင်သူတဦးဖြစ်ပြီး လော့စ်အိန်ဂျလိစ်မြို့တော်ဝန်ရုံး၏ နိုင်ငံတကာရေးရာဌာနတွင် fellow အဖြစ် ဆောင်ရွက်နေသူဖြစ်သည်။)
