ဘားအံဆေးရုံကြီးတွင် စောင့်ကြည့်လူနာ ၉ ဦး ထပ်မံရောက်ရှိ
DVB
·
April 24, 2020
ကရင်ပြည်နယ်၊ ဘားအံပြည်သူဆေးရုံကြီးမှာ ဧပြီ ၂၃ ရက် နေ့လည်ပိုင်းအထိ COVID-19 စောင့်ကြည့်လူနာ ၉ ဦးရောက်ရှိနေပြီး လူနာတွေရဲ့ဓာတ်ခွဲနမူနာတွေကို ရန်ကုန်ရှိ အမျိုးသားကျန်းမာရေးဓာတ်ခွဲမှုဆိုင်ရာဌာနကို ပေးပို့ထားတယ်လို့ ဆေးရုံအုပ်ကြီး ဒေါက်တာ ဘရမ်အောင်က ပြောပါတယ်။
စောင့်ကြည့်လူနာ ၉ ဦးရဲ့ ဓာတ်ခွဲစမ်းသပ်ချက်အဖြေတွေ မရရှိသေးတဲ့အတွက် စောင့်ကြည့်လူနာအနေနဲ့သီးသန့်ထားရှိပြီး လိုအပ်တဲ့စစ်ဆေးကုသမှုတွေ ဆောင်ရွက်ပေးထားသလို လက်ရှိမှာ ကျန်းမာရေးကောင်းမွန်တယ်လို့ ဆိုပါတယ်။
ဆေးရုံအုပ်ကြီး ဒေါက်တာ ဘရမ်အောင်က “ဘားအံမြို့နယ်တွင်းက လူတွေပဲ။ အဖြေကို မနေ့က ညကပို့ထားတယ်။ ဒီနေ့ည အဖြေထွက်မယ်။ ရောဂါလက္ခဏာက နှာစေး၊ ချောင်းဆိုး၊ ဖျားပြီး ဆေးရုံကိုရောက်လာတာ”လို့ ပြောပါတယ်။
ဧပြီ ၂၁ ရက်အထိ ဘားအံဆေးရုံရှိ COVID-19 ရောဂါစောင့်ကြည့်လူနာအားလုံးမှာ အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်)က ပြန်လည်ပေးပို့တဲ့ အဖြေတွေအရ COVID-19 ရောဂါ မတွေ့ရှိတဲ့အတွက် ဆေးရုံဆင်းခွင့်ပြုလိုက်ပြီဖြစ်ပါတယ်။
သတင်း- ရဲမင်းခေါင်
