COVID-19 လူနာအမှတ် ၁၇ ပေါက်ခေါင်းမြို့နယ် ဒုအုပ်ချုပ်ရေးမှူး ကွယ်လွန်
မင်းညို
·
April 8, 2020
ကိုရိုနာဗိုင်းရပ်စ် COVID-19 အတည်ပြုလူနာအမှတ် ၁၇ ပေါက်ခေါင်းမြို့နယ် ဒုအုပ်ချုပ်ရေးမှူးဟာ ဒီမနက် အစောပိုင်း ၃ နာရီခွဲလောက်က သေဆုံးသွားတယ်လို့ ပြည်မြို့ ပြည်သူ့ဆေးရုံ ဒုဆေးရုံအုပ် ဒေါက်တာသီတာစိုးက အတည်ပြုပြောပါတယ်။
အသက် ၄၇ နှစ်အရွယ် လူနာအမှတ် ၁၇ ဟာ ရန်ကုန်က ပုဂ္ဂလိကဆေးခန်းတခုမှာ အလုပ်လုပ်တဲ့ ဇနီးဖြစ်သူ လူနာအမှတ် ၁၅ ဆီကနေ ကူးစက်ခံခဲ့ရတာဖြစ်ပြီး သူတို့ရဲ့အသက် ၈ နှစ်နဲ့ ၁၀ နှစ်အရွယ် သားနဲ့သမီးငယ်၊ ၁၈ နှစ်အရွယ် တူမတို့လည်း ရောဂါကူးစက်ခံထားရတာ ဖြစ်ပါတယ်။
ဇနီးသည်ဖြစ်တဲ့ လူနာအမှတ် ၁၅ ကတော့ ရန်ကုန် ဝေဘာဂီဆေးရုံမှာ ဆေးကုသမှုခံယူနေပါတယ်။
လူနာ အမှတ် ၁၇ ဟာ ဒီနေ့မနက် ၃ နာရီ ၄၀ မိနစ်က ပြည်ဆေးရုံမှာ ကွယ်လွန်သွားတာဖြစ်ပြီး COVID-19 ကြောင့် သွေးဆိပ်တက်တာနဲ့ ပြင်းထန် အသက်ရှူလမ်းကြောင်းရောဂါကြောင့် သေဆုံးတာလို့ ဗဟို ကူးစက်ရောဂါတိုက်ဖျက်ရေးက ဒုတိယ ညွှန်ကြားရေးမှူး ဒေါက်တာ ခင်ခင်ကြီးက ဆိုပါတယ်။
လက်ရှိမြန်မာနိုင်ငံမှာ COVID-19 အတည်ပြုလူနာပေါင်း ၂၂ ဦးရှိပြီး ဒီအထဲက ၂ ဦး သေဆုံးခဲ့ပြီဖြစ်ပါတယ်။
