မူဆယ်နယ်စပ်ဂိတ်များတွင် တရုတ်နိုင်ငံဘက်သို့ လူဝင်ရောက်သွားလာခွင့် ပိတ်ထား
နန်းမြနဒီ
·
April 1, 2020
ရှမ်းပြည်မြောက်ပိုင်း၊ မူဆယ်ခရိုင်ရှိ တရုတ်နယ်စပ်ဂိတ်တွေမှာ ဒီကနေ့ ဧပြီ ၁ ရက်ကစပြီး တရုတ်နိုင်ငံဘက်ကို လူအများဝင်ရောက်သွားလာခွင့်ကို ယာယီ ပိတ်ပင်လိုက်ပါတယ်။
တရုတ်နယ်စပ် ဝင်ပေါက်တွေဖြစ်တဲ့ မံဝိန်းဂိတ်၊ ဆင်ဖြူဂိတ်၊ နန်းတော်ဂိတ်၊ ကျူကုတ်ပန်ဆိုင်းနဲ့ မန့်ဟျိုး ဂိတ်တွေမှာ ဒီကနေ့ ဧပြီလ ၁ ရက်နေ့ကစပြီး ကုန်တင်ကားကလွဲလို့ လူဝင်ရောက်တာကို ယာယီပိတ်ပင်လိုက်တယ်လို့ ခရိုင်တာဝန်ရှိသူတွေက ကြေညာထားပါတယ်။
ဒါကြောင့် အဲဒီဂိတ်တွေမှာ လူတွေရှင်းနေပြီး အရောင်းအဝယ်တွေအေးနေကာ တရုတ်ဘက်ကို နေ့သွား ညပြန်အလုပ်လုပ်တဲ့ လူတွေအတွက်တော့ အခက်အခဲ ရှိနတယ်လို့ မူဆယ်ဂရုဏာလူမှုကူညီရေးအသင်း ဥက္ကဋ္ဌ ဦးသောင်းထွန်းက ဒီဗွီဘီကို ပြောပါတယ်။
“ဒီလိုပိတ်လိုက်တော့ နေ့စဉ်ကြယ်ဂေါင်၊ ရွှေလီဘက်မှာ အလုပ်သွားလုပ်တဲ့ အလုပ်သမား တွေ ဝင်ထွက်ဖို့တော့ ခက်သွားတာပေါ့နော်၊ ကုန်ကားတွေကတော့ ပေးဝင်လို့ အသီးအနှံ တင်ပို့ရောင်းချတာတော့ ရတယ်ခင်ဗျ။ ဘယ်နေ့ထိပိတ်မယ်ဆိုတာတော့ မသိသေးဘူး။ ကိုဗစ်ရောဂါ ကူးစက်မှာစိုးလို့ ပိတ်တာဆိုတော့ အဲဒီအခြေ အနေပေါ်မူ တည်ပါလိမ့်မယ်။”
အရင်က တရုတ်နိုင်ငံ ဝူဟန်မြို့မှာ ကိုဗစ် - ၁၉ ရောဂါ စတင်ကူးစက်ပြန့်ပွားစဉ်ကလည်း တရုတ်နိုင်ငံဘက်မှာ သွားလာမှုတွေပိတ်ဆို့ထားလို့ မူဆယ်ဘက်ကို ဧည့်သည်ဝင်ရောက်မှု နည်းခဲ့ပါတယ်။
မူဆယ်ဟာ တရုတ်နယ်စပ် ဖြစ်ပေမယ့် ကိုရိုနာကူးစက်မှုတွေ မရှိခဲ့ကြောင်း၊ မူဆယ်ဆေးရုံမှာ ၂ လအတွင်း သံသယရှိလူနာ ၁၃ ဦးတက်ရောက်ကုသနေပြီး ဆေးစစ်ချက်မှာလည်း ရော ဂါပိုးမရှိကြောင်း အဖြေထွက်ခဲ့တယ်လို့လည်း ဦးသောင်းထွန်းက ပြောပါတယ် ။
ဒါပေမယ့် တာဝန်ရှိသူတွေကတော့ နယ်စပ်ဂိတ်တွေမှာ ကိုယ်အပူချိန်တိုင်းတာ၊ မြို့ထဲမှာ ပိုးသတ်ဆေးဖျန်းတာနဲ့ ကိုဗစ်-၁၉ ရောဂါကူးစက်မှု ကာကွယ်ဟန့်တားရေး ပညာပေးလုပ်ငန်းတွေ အရှိန်မြှင့်ဆောင်ရွက်နေတယ်လို့လည်း ဦးသောင်းထွန်းက ပြောပါတယ်။
မူဆယ်ခရိုင် စီးပွားရေးဇုန်နဲ့ ဒေသတွင်းရောင်းဝယ်ဖောက်ကားမှုတွေကတော့ ကိုဗစ်-၁၉ ရောဂါ ဂယက်ရိုက်ခဲ့တဲ့အချိန်ကစပြီး ကျဆင်းနေတယ်လို့ မူဆယ်ဒေသခံတွေက ပြောပါတယ်။
