ရခိုင်ပြည်နယ် တည်ငြိမ်အေးချမ်းရေး အထောက်အကူပြုကော်မတီ အစီရင်ခံစာပြုစုပြီးစီး
DVB
·
December 25, 2019
ရခိုင်ပြည်နယ်၊ တည်ငြိမ်အေးချမ်းရေး အထောက်အကူပြုကော်မတီရဲ့ အပြီးသတ် အစီရင်ခံစာ ပြုစုပြီးစီးသွားပြီလို့ ကော်မတီဥက္ကဋ္ဌ ဦးအေးသာအောင်က ပြောတဲ့အကြောင်း အစိုးရ ပြန်ကြားရေးက သတင်းထုတ်ပြန်ပါတယ်။
အစီရင်ခံစာထဲမှာ ဘယ်လိုအကြောင်းအရာတွေ ထည့်သွင်းထားသလဲဆိုတဲ့ အသေးစိတ် အချက်အလက်တွေကတော့ သတင်းမှာ ဖော်ပြခြင်းမရှိပါဘူး။
အမျိုးသားလွှတ်တော်ဒုဥက္ကဋ္ဌ ဦးအေးသာအောင် ဦးဆောင်တဲ့ အဲဒီကော်မတီရဲ့ အကြံပြု ညှိနှိုင်းအစည်းအဝေးကို ဒီဇင်ဘာ ၂၃ ရက်က နေပြည်တော် လွှတ်တော်ရေးရာဆောင်မှာ ပြုလုပ်ခဲ့တာပါ။
အပြီးသတ် အစီရင်ခံစာလို့ ပြောရမယ့် နောက်ဆုံး တတိယအကြိမ် အစီရင်ခံစာ မူကြမ်းတခုကို ရေးပြီးဖြစ်သလို သူအပါအဝင် ပြည်ထောင်စုဝန်ကြီး ဒေါက်တာဖေမြင့်၊ ဒုတိယရှေ့နေချုပ် ဦးဝင်းမြင့်၊ ဒုတိယဝန်ကြီး ဦးတင်မြင့်တို့နဲ့အတူ တည်းဖြတ်သင့်တဲ့ ကိစ္စတွေကို တည်းဖြတ်ထားပြီးပြီလို့ အစည်းအဝေးမှာ ဦးအေးသာအောင်က ပြောပါတယ်။
ပြီးတော့ ကော်မတီအတွင်းရေးမှူး ပြည်ထောင်စုအစိုးရအဖွဲ့ရုံးဝန်ကြီးဌာန ဒုတိယဝန်ကြီးဦးတင်မြင့်က အစီရင်ခံစာမူကြမ်းကို တပိုဒ်ချင်းစီ ကော်မတီအဖွဲ့ဝင်တွေက မူကြမ်းမှာ ပြင်ဆင်၊ ဖြည့်စွက်၊ ပယ်ဖျက်ချင်တဲ့ အချက်တွေကို ဆွေးနွေးခဲ့ကြပါတယ်။
ဒီကော်မတီကို နိုင်ငံတော်သမ္မတက မတ်လ ၁၄ ရက်မှာ အမိန့်ထုတ်ပြန် ဖွဲ့စည်းပေးခဲ့တာဖြစ်ပြီး စုစုပေါင်း အဖွဲ့ဝင် ၁၄ ယောက် ပါပါတယ်။
ဒါပေမဲ့ အဖွဲ့ဝင်တွေဖြစ်တဲ့ ပြည်သူ့လွှတ်တော် ကိုယ်စားလှယ် ဦးဦးလှစောနဲ့ အမျိုးသားလွှတ်တော်ကိုယ်စားလှယ် ဒေါ်ထုမေတို့ကတော့ ကော်မတီမှာ ပါဝင်ဆောင်ရွက်တာ မရှိခဲ့ပါဘူး။
အဲဒီအပြီးသတ်အစီရင်ခံစာ ဆွေးနွေးတဲ့ အစည်းအဝေးမှာလည်း ဥက္ကဋ္ဌ၊ ဒုဥက္ကဋ္ဌ-၁ နဲ့ ၂၊ အတွင်းရေးမှူး၊ အဖွဲ့ဝင်တွေ အပါအဝင် စုစုပေါင်း ၉ ယောက်ပဲ တက်ရောက်ခဲ့ပါတယ်။
ဓာတ်ပုံ- MOI
