ရသေ့တောင်တွင် စစ်ဘေးဒုက္ခသည် ၄ ဦး လက်နက်ကြီးထိမှန်ဒဏ်ရာ
DVB
·
January 4, 2019
ရခိုင်ပြည်နယ်၊ ရသေ့တောင်မြို့နယ် မြောက်ပိုင်း၊ သက်ပေကျရွာအနီးမှာ ဇန်န၀ါရီ ၃ ရက် မွန်းလွဲပိုင်းက စစ်ဘေးဒုက္ခသည်စခန်းအနီး လက်နက်ကြီးတွေကျလို့ စစ်ဘေးဒုက္ခသည် ၄ ဦး ဒဏ်ရာရရှိခဲ့ပါတယ်။
ဗောဓိကိုင်းကျေးရွာက စစ်ဘေးရှောင် အသက် ၁၅ နှစ်အရွယ် မခင်ခင်ဝင်း ဒဏ်ရာ ပြင်းထန်လို့ ရသေ့တောင်ဆေးရုံကို တင်ပို့ထားရတယ်လို့ ဖခင်ဖြစ်သူ ဦးအင်္ဂါဖြူက ပြောပါတယ်။
"လက်နက်ကြီးကျည်ဆန် ကျရောက်ပေါက်ကွဲတဲ့အတွက် လူ လေးဦး ဒဏ်ရာရပါတယ်။ ကျနော့်သမီးမှာ ဒဏ်ရာပြင်းထန်တဲ့အတွက် ရသေ့တောင်မြို့နယ်ဆေးရုံကို ယူလာရပါတယ်။ ကျန်သုံးဦးက ဒဏ်ရာမပြင်းတဲ့အတွက် စစ်ဘေးဒုက္ခသည်စခန်းမှာ ကျန်နေခဲ့ကြပါတယ်။ ဆရာဝန်ကတော့ ဘာမှ စိုးရိမ်စရာမရှိဘူးလို့ ပြောပါတယ်။ ဖြစ်တာက မနက်ပိုင်းပါ၊ ဆေးရုံကို ညနေပိုင်းမှ ရောက်ပါတယ်။ မော်တော်ကားနဲ့ ၄ နာရီလောက်သွားရပါတယ်။ " လို့ပြောပါတယ်။
ရသေ့တောင်မြို့နယ် သက်ပေကျရွာ ဒုက္ခသည်စခန်းမှာ အိမ်ထောင်စု ၃၂ စု နဲ့ လူဦးရေ ၁၈၀ ကျော်ရှိကြောင်း သိရပါတယ်။ သက်ပေကျရွာကို ဗောဓိကိုင်းက ခမီမိသားစုတွေ ရောက်လာတာ သီတင်းတပတ်ကျော်လောက်ရှိနေပြီ ဖြစ်ပါတယ်။
ရခိုင်ပြည်နယ်အတွင်း တပ်မတော်နဲ့ ရက္ခိုင့်တပ်မတော် (အေအေ) တို့ တိုက်ပွဲတွေ ဖြစ်ပွားနေပြီး စစ်ရှောင် ပြည်သူ ထောင်ချီ ထွက်ပြေးတိမ်းရှောင်နေရပါတယ်။
ဗညား
