နှစ်သစ်ကူးည မန္တလေးတွင် နေအိမ် ၁၇ လုံး မီးလောင်၊ လူ ၁၈၀ ခန့်မီးဘေးသင့်
Aung Aung Naing
·
January 1, 2019
မန္တလေးတိုင်းဒေသကြီး၊ ချမ်းမြသာစည်မြို့နယ်၊ ကန်သာယာရပ်ကွက် ၅၇ လမ်းနဲ့ ၅၈ ကြားမှာ ဒီဇင်ဘာ ၃၁ ရက် ညပိုင်းက နေအိမ် ၁၇ လုံး မီးလောင်ခဲ့ပါတယ်။
ကန်သာယာရပ်ကွက် အကွက် ဗ-၈ အိမ်အမှတ် ၁၂၆ ဒေါ်ငယ် (၆၂ နှစ်)ရဲ့နေအိမ်မှာ ခြင်ဆေးခွေ ထွန်းရာကနေပြီး မီးစတင်လောင်ကျွမ်းခဲ့တာပါ။
နေအိမ်မီးထဲပါသွားတဲ့ ဒေါ်ဌေးက “မီး၊ မီး၊ မီးဆိုတော့ ကျမလည်းထကြည့်မိတယ်။ ဒါပေမယ့် ကျမတို့ အရမ်းနောက်ကျနေပြီ။ မီးတောက်ကြီးတွေကလည်း မြန်လိုက်တာ၊ တမဟုတ်ချင်းကို တအိမ်နဲ့ တအိမ်ကူးနေတာ၊ အိမ်က ကပ်နေတော့ ဘာပစ္စည်းမှကို မရလိုက်ဘူး”လို့ ပြောပါတယ်။
နေအိမ် ၁၇ လုံးကို မီးကူးစက်လောင်ပြီး စုစုပေါင်း မီးလောင် ဆုံးရှုံးမှုတန်ဖိုး ကျပ် ၈၆၇၅၀၀၀ ရှိတယ်လို့ မန္တလေးတိုင်း ခရိုင်မီးသတ်တပ်ဖွဲ့က ထုတ်ပြန်ပါတယ်။
လတ်တလော မီးဘေးသင့် အိမ်ထောင်စု ၄၀ ကျော်နဲ့ လူဦးရေ ၁၈၀ နီးပါးကို ရပ်ကွက်ဓမ္မာရုံမှာ ယာယီကယ်ဆယ်ရေးစခန်း ဖွင့်လှစ်စောင့်ရှောက်ထားပါတယ်။
မီးစတင်လောင်ခဲ့တဲ့ အိမ်ပိုင်ရှင် ဒေါ်ငယ်ကို ချမ်းမြသာစည်မြို့နယ်၊ အောင်ပင်လယ်ရဲစခန်းက ရာဇသတ်ကြီး ပုဒ်မ ၂၈၅ မီးပေါ့ဆမှုနဲ့ အမှုဖွင့် အရေးယူထားပါတယ်။
