မြင်းခြံ ကွမ်းနုဝါများ လူကြိုက်များ၍ ဈေးကောင်းရရှိနေ
DVB
·
June 26, 2018
မန္တလေးတိုင်းဒေသကြီး၊ မြင်းခြံမြို့နယ်က ထွက်ရှိတဲ့ ကွမ်းနုဝါတွေကိုိ လူကြိုက်များ နေပြီး ဈေးကောင်းရရှိနေတယ်လို့ ကွမ်းနဲ့ ကွမ်းယာပစ္စည်း အရောင်းဆိုင်တွေထံက သိရပါတယ်။
အခုလပိုင်းတွေမှာ ကွမ်းရွက်အများအပြား ထွက်ရှိနေကာ မြင်းခြံမြို့နယ်က ထွက်ရှိတဲ့ ကွမ်းနုဝါတွေဟာ လူကြိုက်များနေတာကြောင့် ဈေးကောင်းရရှိနေပြီး မြင်းခြံမြို့ပေါ်မှာ နေ့စဉ် ကွမ်းရွက် ပိသာချိန် ၅၀၀၀ ခန့် ဝင်ရောက်မှုရှိနေတာ ဖြစ်ပါတယ်။
ကွမ်းရွက်အရောင်းဆိုင် ဖွင့်လှစ်လုပ်ကိုင်တဲ့ မခိုင်က "ခုချိန်က ကွမ်းရွက်ပေါချိန်လည်း ဖြစ်တယ်။ အဓိက မြင်းခြံနဲ့ နွားထိုးကြီးမြို့နယ်တွေက ကွမ်းရွက် အများဆုံးထွက်တာပေါ့။ ကွမ်းရွက်အရည်အသွေးကလည်း ကောင်းတော့ ရောင်းချတဲ့ နေရာမှာလည်း ဈေးကောင်းရရှိတယ်။ ကွမ်းစိုက်ပျိုးတဲ့ တောင်သူတွေလည်း ဝင်ငွေကောင်းရရှိ တော့ ကိုက်ညီမှုရှိတာပေါ့။ မြင်းခြံကွမ်းတွေကို တောင်ကြီး၊ ကျောက်ပန်းတောင်း၊ မိတ္ထီလာ စတဲ့ မြို့တွေ တင်ပို့ရတဲ့အပြင် အခြားမြို့တွေကပါ ကြိုက်နှစ်သက်ကြတော့ ရောင်းအားလည်း ပိုကောင်းတယ်”လို့ ပြောပါတယ်။
ကွမ်းရွက်ပင် စိုက်ပျိုးတဲ့နေရာမှာ သန့်ရှင်းသပ်ရပ်ဖို့က အရေးကြီးပြီး အေးလွန်းတဲ့ ရာသီဥတုနဲ့ မိုးများလွန်းရင်လည်း ကွမ်းပင်တွေက မကြိုက်နှစ်ဘူးလို့ သိရပါတယ်။
"ကွမ်းပင်စိုက်ပျိုးလာတာ ၇ နှစ်ရှိပါပြီ၊ ကွမ်းပင်ကို စိုက်ပျိုးပြီး အနည်းဆုံး ၆ လ ကျော်ရင် အရွက်ခူးလို့ရနေပြီ။ ကွမ်းရွက်ဈေးက ဆောင်းတွင်းပိုင်တွေမှာ ဈေးကောင်း ပိုရရှိတယ်။ အပင်ရှင်သန်ပြီး ရောဂါပိုးမွှားမကျရောက်အောင် သေချာဂရုစိုက်ရတယ်။ အဓိက မြေသြဇာ ကတော့ ဆိတ်ချေးနဲ့ နွားချေးကိုပဲ သုံးပါတယ်။ ကွမ်းစိုက်ရတာ အခက်အခဲသိပ်တော့မရှိပဲ တောင်သူတွေအတွက် ကွမ်းပင်စိုက်ပျိုးရတာ အကျိုးအမြတ်ရှိတယ်”လို့ ကွမ်းပင်စိုက်ပျိုးတဲ့ ဦးကျော်ဌေး က ဆိုပါတယ်။
ဆောင်းတွင်းကာလမှာ ကွမ်းရွက်အထွက်နှုန်း နည်းတာမျိုး ဖြစ်စေတတ်ပြီး ပြီးခဲ့တဲ့ ၂၀၁၇ ဒီဇင်ဘာလတွေမှာ ကွမ်းရွက် ၁ ပိဿာကို ၂၂၀၀၀ ကျပ်အထိ ဈေးမြင့်တက်ခဲ့ပါတယ်။
လက်ရှိ ကွမ်းရွက် ၁ ပိဿာကို အမျိုးအစားလိုက်ပြီး အနည်းဆုံး ၄၀၀၀ ကျပ်မှ ၅၅၀၀ ကျပ်အထိ ရောင်းချနေရတယ်လို့ သိရပါတယ်။
ရီရီထွန်း (မြင်းခြံ)
