မြန်မာကျောင်းသားများကို အမေရိကန်က အင်္ဂလိပ်စာ လာရောက်သင်ကြားပေးနေ
DVB
·
May 11, 2018
ပဲခူးတိုင်းဒေသကြီး၊ ညောင်လေးပင်မြို့နယ်မှာ ကျောင်းသား ကျောင်းသူတွေ အင်္ဂလိပ်စာ စွမ်းရည် မြင့်မားစေဖို့ အမေရိကန်က ဆရာမတွေ နှစ်နှစ်တာ လာရောက် ပညာသင်ကြားပေးနေပါတယ်။
Peace Corps Myanmar အစီအစဉ်အဖြစ် မြန်မာအစိုးရနဲ့ အမေရိကန်ပြည်ထောင်စုအစိုးရတို့ ပူပေါင်းပြီး အမေရိကန်နိုင်ငံသူ ဆရာမ နှစ်ဦးက မြန်မာကျောင်းသားတွေကို လာရောက်သင်ကြားပြသနေတာပါ။
မြန်မာနိုင်ငံက သင်ရိုးညွှန်းတမ်းအတိုင်း အခြေခံပညာ ၅ တန်းနဲ့ ၆ တန်းက ကျောင်းသား ကျောင်းသူတွေအပြင် ဆရာ၊ ဆရာမတွေကိုပါ ကျောင်းတွင်း အချိန်ဇယားအလိုက် သင်ကြားပြသမှာ ဖြစ်တယ်လို့ ဒုမြို့နယ်ပညာရေးမှူး ဦးဝင်းလွင်က ဒီဗွီဘီကို ပြောပါတယ်။
“သင်ကြားသွားမှာက နှစ်နှစ် သင်ကြားသွားမှာပါ။ ဒီပညာသင်နှစ်ရယ်၊ နောက်နှစ် ပညာသင်နှစ်ရယ်၊ သူတို့ကို သတ်မှတ်ပေးထားတဲ့ အချိန်ဇယားလေးတွေ ရှိတယ်။ မြန်မာနိုင်ငံက သင်ရိုးညွှန်းအတိုင်း သင်မှာပါ။ ကျောင်းသား ကျောင်းသူတွေအတွက် အများကြီး အကျိုးရှိတဲ့ အစီအစဉ်တခုပါ”
Peace Corps Myanmar အစီအစဉ်နဲ့ ညောင်လေးပင် အ.ထ.က (၁) ကျောင်းအပြင် ပြွန်တန်ဆာ အ.ထ.က(၂) ကျောင်းတွေမှာလည်း အလားတူ သင်ကြားပေးသွားမယ်လို့ သိရပါတယ်။
သတင်း - နေလင်းထိုက်
