မြင်းခြံ ဒီဂရီကောလိပ်ကျောင်းသားများသမဂ္ဂ ဥက္ကဋ္ဌကို ငြိမ်းစုစီဥပဒေဖြင့် တရားစွဲ
DVB
·
May 10, 2018
ကချင်စစ်ဘေးရှောင်တွေ လွတ်မြောက်ရေးနဲ့ စစ်ပွဲတွေ ရပ်တန့်ရေးအတွက် မြင်းခြံမြို့မှာ ဦးဆောင်ဆန္ဒပြခဲ့တဲ့ ဗကသကျောင်းသား ကိုစည်သူမြတ်ကို မြင်းခြုံမြို့မရဲစခန်းက ငြိမ်းစုစီ ဥပဒေ ပုဒ်မ (၁၉)နဲ့ မေ ၉ ရက်နေ့က တရားစွဲလိုက်ပါတယ်။
ခုလိုအမှုဖွင့်တရားစွဲရတာနဲ့ပတ်သက်ပြီး မြင်းခြံမြို့မရဲစခန်းက တာဝန်ရှိသူတဦးက "ဆန္ဒဖော်ထုတ်ရာမှာ သက်ဆိုင်ရာမြို့နယ်ရဲတပ်ဖွဲ့သို့ အသိပေး အကြောင်းကြားတာမျိုး မရှိတဲ့အတွက် ငြိမ်းချမ်းစွာစုဝေးခွင့်နှင့် ငြိမ်းချမ်းစွာ စီတန်းလှည့်လည်ခြင်းဆိုင်ရာ ဥပဒေပုဒ်မ (၁၉) နဲ့ အမှုဖွင့် အရေးယူထားတာ”လို့ ဒီဗွီဘီကို ပြောပါတယ်။
ကချင်စစ်ပွဲအတွင်း ပိတ်မိနေတဲ့ ဒေသခံတွေ ဘေးကင်းရေးနဲ့ စစ်ပွဲတွေ ရပ်တန့်ရေးအတွက် ဆုတောင်းပွဲနဲ့ ဆန္ဒပြပွဲကို မန္တလေးတိုင်းဒေသကြီး၊ မြင်းခြံမြို့မှာ ပြီးခဲ့တဲ့ မေ ၆ ရက်က ဒေသခံ ကျောင်းသားတွေက ပြုလုပ်ခဲ့ကြတာပါ။
ဒီဆုတောင်းပွဲနဲ့ ဆန္ဒထုတ်ဖော်ပွဲကို မြင်းခြံဆန္ဒတော်ပြည့်ဘုရားမှာ ဖယောင်းတိုင် ထွန်းညှိကာ ဆုတောင်းခဲ့ကြပြီး ဗိုလ်ချုပ်ကြေးရုပ်အထိ လမ်းလျှောက်ဆန္ဒဖော်ထုတ်ခဲ့တာလည်း ဖြစ်ပါတယ်။
ဆန္ဒပြသူတွေထဲမှ ဦးဆောင်သူဖြစ်တဲ့ မြင်းခြံဒီဂရီကောလိပ် ကျောင်းသားများသမဂ္ဂ ဥက္ကဋ္ဌ တတိယနှစ် သင်္ချာကျောင်းသား ကိုစည်သူမြတ်က "ကျနော်တို့ ဒီမိုကရေစီနိုင်ငံမှာ ခုလို ပုဒ်မတွေ မရှိသင့်ဘူးလို့ထင်တယ်။ ဒါက ဒီမိုကရေစီညှဉ်းပန်းနှိပ်စက်မှုလို့ ကျနော်တို့ သုံးသပ်ရ လိမ့်မယ်။ ဒီမိုကရေစီဆိုရင် လွတ်လပ်စွာ ဆန္ဒထုတ်ဖော်ခွင့်ရှိတယ်။ ကျနော်တို့ ဒီမိုကရေစီပီပီ လွတ်လပ်စွာလှုပ်ရှားတယ်။ ကျနော်တို့လုပ်ရပ်က မှန်ကန်တယ်လို့ ယူဆတဲ့အတွက် ဘယ်သူ့ကိုမှ စာတင်စရာမလိုဘူးလို့ ထင်တယ်။ ပြီးတော့ ဒီအမှုနဲ့ပတ်သတ်ပြီး အမှုကိုဘယ်လိုပဲဖွင့်ဖွင့် ရှေ့ဆက်ပြီး လုပ်ဆောင်သွားစရာရှိတာ ဆက်လုပ်သွားမယ်”လို့ပြောပါတယ်။
ကချင်ပြည်နယ်အတွင်း စစ်ပွဲတွေကြောင့် ပိတ်မိနေတဲ့ ဒေသခံပြည်သူတွေ ဘေးကင်းရေးနဲ့ စစ်ပွဲတွေရပ်တန့်ရေးအတွက် ဆုတောင်းပွဲတွေနဲ့ ဆန္ဒဖော်ထုတ်ပွဲတွေကို မြန်မာပြည့် မြို့အသီးသီးမှာ ပြုလုပ်ခဲ့ကြရာမှာ ဦးဆောင်သူတွေ အမှုဖွင့် အရေးယူခံနေကြရပါတယ်။
သတင်း - ရီရီထွန်း (မြင်းခြံ)
