ယခု ဧပြီလ ၁၇ ရက်နေ့ဟာ မြန်မာသက္ကရာဇ် ၁၃၈၀ ခုနှစ်ရဲ့ နှစ်သစ်ကူးနေ့ ဖြစ်တာကြောင့် အန်အယ်လ်ဒီအစိုးရရဲ့ ပူပူနွေးနွေးသမ္မတ ဦးဝင်းမြင့်က ပြည်သူလူထုကို ရည်ရွယ်ပြီး နှစ်သစ်ကူး နှုတ်ခွန်းဆက်စကား ပြောကြားခဲ့ပါတယ်။ ဒီမိန့်ခွန်းဟာ နိုင်ငံတော်သမ္မတအနေနဲ့ ပြည်သူလူထုကို ပြောကြားတဲ့ ဒုတိယမြောက်မိန့်ခွန်းပါ။ အစိုးရအဖွဲ့ ခေါင်းဆောင်တယောက်အနေနဲ့ ကျန်တဲ့သက်တမ်း ၃ နှစ်တာအတွင်း ပြည်သူလူထုအတွက် ဘာတွေကို ဆောင်ရွက် အကောင်အထည်ဖော်သွားမယ်ဆိုတာကို ပြောပြထားလေတော့ နားထောင်လိုက်ရတဲ့ ပြည်သူတယောက်အနေနဲ့ ကျေနပ်အားရ ဖြစ်မိပါတယ်။ အကြောင်းကတော့ သမ္မတရဲ့မိန့်ခွန်းမှာ ပြည်သူအများစု မျှော်လင့် တောင့်တနေတဲ့ အချက်တွေကို ဆောင်ရွက်ပေးမယ်လို့ ကတိပေးသွားလို့ပါပဲ။ ကျနော် မှတ်မိသလောက်ဆိုရင် အန်အယ်လ်ဒီအစိုးရသစ် တက်လာပြီးတဲ့နောက်ပိုင်း နိုင်ငံ့ခေါင်းဆောင်တယောက်က ပြောကြားတဲ့ မိန့်ခွန်းတွေထဲမှာ လက်တွေ့အကျဆုံး မိန့်ခွန်းတခုပါ။ အန်အယ်လ်ဒီအစိုးရ တက်လာခါစကတည်းက မျှော်လင့်ထားခဲ့တာတွေကို သက်တမ်း ၂ နှစ်ကျော်ကြာလာမှ ကြားလာရတော့ ကုန်လွန်သွားခဲ့တဲ့ အချိန်တွေကိုလည်း နှမြောမိပါတယ်။ ပြုပြင်ပြောင်းလဲရေး လုပ်ရမယ့် ကဏ္ဍ ၉ ခု သမ္မတရဲ့မိန့်ခွန်းမှာ ပြုပြင်ပြောင်းလဲမှု နှောင့်နှေးနေတဲ့ ဌာနတွေကို ကြပ်မတ်ရာမှာ ပြည်ထောင်စုအစိုးရက ချမှတ်ထားတဲ့ မူဝါဒတွေကို ဌာနဆိုင်ရာတွေက ဦးစားပေးအလိုက် အကောင်အထည်ဖော်ကြဖို့လို့ ဆိုပါတယ်။ အဲဒီမှာ…. ပထမဆုံး ဦးစားပေးပြော ဆိုတာက - ပြည်သူလူထုရဲ့ စားဝတ်နေရေး အဓိက လိုအပ်ချက် ၃ ခုမှာ နေရေးက အရေးကြီးတဲ့အတွက် ဝန်ထမ်းအိမ်ရာတွေ တိုးချဲ့ တည်ဆောက်ပေးဖို့၊ နောက်ပြီး နေ့စားလုပ်ခ အနည်းဆုံး ၄၈၀၀ ကျပ် ရရှိဖို့၊ အခြားအဆင့် ဝန်ထမ်းလစာတွေကို ၂၀ ရာခိုင်နှုန်း တိုးပေးဖို့နဲ့ အရာရှိလစာတွေကို ၁၀ ရာခိုင်နှုန်း တိုးပေးဖို့ ပါဝင်ပါတယ်။ အဲဒီနောက် တပြည်လုံး လျှပ်စစ်ဓာတ်အား နှစ်ဆတိုး ဖြန့်ဖြူးနိုင်ရေး၊ တပြည်လုံးမှာရှိတဲ့ လမ်းတွေ၊ တံတားတွေ တိုးချဲ့တည်ဆောက်ရေး၊ အသေးစား အလတ်စား စီးပွားရေးလုပ်ငန်းတွေကို ငွေချေးပေးရာမှာ လျင်မြန်လွယ်ကူစွာ ရရှိစေရေး စတာတွေကို ဦးစားပေး ဆောင်ရွက်သွားမယ်လို့ ဆိုပါတယ်။ ဒုတိယအချက်အနေနဲ့ ဦးစားပေးပြောတာက ယိမ်းယိုင်နေတဲ့ တရားရေးမဏ္ဍိုင် တည့်မတ်စေဖို့ ပြည်ထောင်စုတရားသူကြီးချုပ်၊ ပြည်ထောင်စု တရားလွှတ်တော်ချုပ် တရားသူကြီးများကို မကြာသေးခင်ကပဲ တွေ့ဆုံ ပြောကြားထားတဲ့အကြောင်းနဲ့ အစိုးရ ဌာနဆိုင်ရာ အသီးသီးမှာ ထုံးစံလိုဖြစ်နေတဲ့ အဂတိလိုက်စားမှုကို တိုက်ဖျက်ရာမှာ၊ ပြည်သူလူထုနဲ့ မီဒီယာတွေက အဂတိလိုက်စားမှု တိုက်ဖျက်ရေး ကော်မရှင်နဲ့ ပူးပေါင်းပြီး ကူညီကြဖို့ ပြောပါတယ်။ တတိယအချက်အနေနဲ့ကတော့ ပြည်သူများ လူ့အခွင့်အရေး ချိုးဖောက်မခံကြရအောင် ကာကွယ်ရေးမှာ အရပ်ဘက် လူ့အဖွဲ့အစည်းတွေ၊ မီဒီယာတွေ၊ ပြည်သူတွေနဲ့ ပူးပေါင်းဆောင်ရွက်ဖို့၊ လူ့အခွင့်အရေးကော်မရှင်ကို ပြောကြားထားတဲ့အကြောင်း၊ အထူးသဖြင့် စစ်ကြောရေးစခန်း၊ ရဲစခန်းအချုပ်၊ တရားရုံးအချုပ်၊ အကျဉ်းထောင်၊ ရဲဘက်စခန်း စတဲ့နေရာတွေမှာ ဖြစ်လေ့ဖြစ်ထရှိတဲ့ လူ့အခွင့်အရေး ချိုးဖောက်ခံနေရမှုတွေ မဖြစ်ရအောင် အလေးထား ပြောပါတယ်။ စတုတ္ထအချက်အနေနဲ့တော့ နာမည်အကြီးအကျယ် ပျက်နေတဲ့ မူးယစ်ဆေးဝါး နှိမ်နင်းရေးကိစ္စပါပဲ။ မူးယစ်ဆေးဝါးတွေ အများအပြား ဖမ်းမိပြီဆိုရင် ပိုင်ရှင်မဲ့တွေ ဖြစ်နေတာများလို့ တာဝန်ရှိတဲ့ ရဲတပ်ဖွဲ့အပေါ် ပြည်သူလူထုက တော်တော်ကို အယုံအကြည် ကင်းမဲ့နေတာ ကြာပါပြီ။ အခု ဒါတွေကို ထိထိရောက်ရောက် နှိမ်နင်းဖို့ ဘယ်လိုလုပ်မယ် ဆိုတာကိုပါ ပြောသွားပါတယ်။ ပဉ္စမအချက်အနေနဲ့ကတော့ ပြည်သူလူထုရဲ့ ဘဏ္ဍာငွေတွေ အလေအလွင့် မဖြစ်စေရေးအတွက် ဖွံ့ဖြိုးရေးဘတ်ဂျက် ချထားပေးငွေတွေကို ကာလ-ဒေသ ပေါက်ဈေးနဲ့အညီ မှန်ကန်စွာ တွက်ချက်တင်ပြ သုံးစွဲရေး၊ လုပ်ငန်းမပြီးသေးဘဲ လုပ်ငန်းပြီးစီးကြောင်း လိမ်ညာပြီး အစီရင်မခံရေး၊ တင်ဒါချထားပေးတဲ့အခါ တင်ဒါစည်းကမ်းနဲ့အညီ စစ်ဆေးခွင့်ပြုရေး၊ တင်ဒါစည်းမျဉ်းကို လက်တလုံးခြား လုပ်ဆောင်မှုတွေကို ပြင်းပြင်းထန်ထန် အရေးယူရေးနဲ့ စာရင်းစစ်ဆေးရေးကိစ္စမှာ ပြည်ထောင်စုစာရင်းစစ်ချုပ်ရုံးအပြင် ဌာနတိုင်းက ဖွဲ့စည်းထားတဲ့ စာရင်းစစ်ကော်မတီတွေအနေနဲ့ ဘက်လိုက်မှုမရှိဘဲ အဂတိကင်းကင်းနဲ့ တိတိကျကျ ဆောင်ရွက်ဖို့ ပြောထားပါတယ်။ ဆဋ္ဌမအချက်အနေနဲ့က သိမ်းဆည်းခံ လယ်မြေယာများ ကိစ္စပါ။ ဒီကိစ္စဟာ ပထမအကြိမ် လွှတ်တော်ကာလကတည်းက ပြည်ထောင်စုလွှတ်တော်က ရှေ့ဆောင်ရှေ့ရွက်ပြုပြီး ဆောင်ရွက်ခဲ့တဲ့ကိစ္စ ဖြစ်ပါတယ်။ လွှတ်တော်မှာ စတင်ကတည်းက ဦးသိန်းစိန်အစိုးရရဲ့ လယ်ယာစိုက်ပျိုးရေးဝန်ကြီးက သဘောမတူ ကန့်ကွက်ခဲ့ပါတယ်။ လွှတ်တော်က လုပ်စရာရှိတာ ဆက်လုပ်တဲ့အခါ သက်ဆိုင်ရာ ဝန်ကြီးဌာနတွေက တက်တက်ကြွကြွ ပူးပေါင်းဆောင်ရွက်မှုမရှိတာ၊ အကယ်လို့ သက်ဆိုင်ရာဌာနတွေနဲ့ တပ်မတော် တပ်ရင်းတပ်ဖွဲ့တွေက ပြန်လည် စွန့်လွှတ်လိုက်ရင်လည်း မူလပိုင်ရှင်ထံ ပြန်မရောက်တာ စသဖြင့် ပြဿနာတွေ မနည်းမနော ရှိခဲ့တာပါ။ အဲဒီ မပြေမလည်ဖြစ်နေတဲ့ ပြဿနာဟာ သမ္မတ ဦးထင်ကျော် တာဝန်ယူထားစဉ် ကာလမှာ မျှော်လင့်ချက်ရောင်ခြည်သန်းလာတယ်လို့ ထင်ရပေမယ့် သိသိသာသာ ထူးခြားမလာခဲ့ပါဘူး။ အခုတော့ ဒီကိစ္စတွေနဲ့ပတ်သက်ပြီး အတော်လေး နက်နက်ရှိုင်းရှိုင်း သိထားပြီး လွှတ်တော်အတွေ့အကြုံ ၅ နှစ်သက်တမ်းရှိခဲ့တဲ့ သမ္မတက အသိမ်းဆည်းခံ တောင်သူလယ်သမားတွေ လျော်ကြေး၊ နစ်နာကြေး ရရှိရေးနဲ့ သက်ဆိုင်ရာရဲ့ ပြန်လည်စွန့်လွှတ်မြေတွေကို မူလပိုင်ရှင်တွေဆီ ပြန်လည်ရောက်ရှိရေး တရားသဖြင့်ဖြစ်အောင် ဆက်လက်ဆောင်ရွက်တော့မှာဖြစ်လို့ တောင်သူလယ်သမားတွေ ဝမ်းသာကြမှာပါ။ သတ္တမအချက်အနေနဲ့ ပြောတာကလည်း တောင်သူလယ်သမားတွေအတွက်ပါပဲ။ ယခင်အစိုးရလက်ထက်ကထဲက အကုန်ပြီးပြတ်အောင် လုပ်မပေးခဲ့တဲ့ လယ်ယာမြေ ပိုင်ဆိုင်ခွင့်လက်မှတ်တွေကို တနှစ်အတွင်း အမြန်ဆုံးရရှိအောင် ဆောင်ရွက်ပေးမယ်လို့ ဆိုပါတယ်။ ဒီကိစ္စကလည်း သက်ဆိုင်ရာဌာနတွေက တက်တက်ကြွကြွ မလုပ်ခဲ့ဘဲ အကြောင်းကြောင်းကြောင့် ချန်ထားခဲ့တာပါ။ သတ်မှတ်ထားတဲ့ အချိန်အတွင်း မလုပ်ခဲ့မိတဲ့ မြေယာပိုင်ရှင်ဟာ နောက်ကျမှလုပ်တဲ့အခါ ဟိုပေးရ၊ ဒီပေးရနဲ့ ကုန်ကျစရိတ်တွေ များပါတယ်။ အခု ဒီကိစ္စကို ဆောင်ရွက်ပေးတော့မယ်ဆိုတော့ လယ်သမားတွေအတွက် သတင်းကောင်းပါ။ ဒါ့အပြင် လယ်သမားတွေ အချိန်မီ စိုက်ပျိုးစရိတ်ရရှိအောင်၊ မျိုး၊ ပိုးသတ်ဆေး၊ ဓာတ်မြေသြဇာနဲ့ လယ်ယာသုံးကိရိယာ စတာတွေကို အခွန်ကင်းလွတ်ခွင့်ပေးမှာ ဖြစ်တဲ့အပြင် လမ်းပန်းဆက်သွယ်ရေး ကောင်းမွန်ရေး၊ စိုက်ပျိုးရေ၊ သောက်သုံးရေနဲ့ လျှပ်စစ်မီးရရှိရေးတွေလည်း ဦးစားပေး ဆောင်ရွက်မယ်လို့ ဆိုပါတယ်။ အဋ္ဌမအချက်အနေနဲ့ ပြောတာကတော့ အလုပ်သမားဘဝ စိုပြည်သာယာရေးပါ။ ရေတိုကာလမှာ အလုပ်သမားတွေအတွက် လူမှုဖူလုံရေးရန်ပုံငွေတွေ ရရှိရေး၊ ထိထိရောက်ရောက် စီမံပေးနိုင်ဖို့ ဆောင်ရွက်သွားမယ်လို့ ဆိုပါတယ်။ အဲဒီမှာ အဓိကကျတဲ့ အချက်ကတော့ ပြည်တွင်းမှာ အလုပ်အကိုင်တွေ ပေါများလာဖို့ နိုင်ငံတကာ ရင်းနှီးမြှုပ်နှံမှုတွေကို ဖိတ်ခေါ်သွားမယ် ဆိုတာပါ။ နိုင်ငံခြားက ရင်းနှီးမြှုပ်နှံသူတွေရဲ့ အရင်းအနှီးနဲ့ အတတ်ပညာတွေ အများအပြား ဝင်မလာမချင်း၊ ကျနော်တို့နိုင်ငံသားတွေ အိမ်နီးချင်းနိုင်ငံတွေကို ထွက်ပြီး အလုပ်လုပ်နေကြရဦးမှာပဲ ဖြစ်ပါတယ်။ ဒါကြောင့် သမ္မတက ပြည်ပရောက် မြန်မာအလုပ်သမားတွေရဲ့ လုံခြုံဘေးကင်းမှုနဲ့ တရားဥပဒေအရ အခွင့်အရေးတွေ ရရှိခံစားနိုင်အောင် နိုင်ငံချင်း သဘောတူညီချက်တွေကို အခြေခံပြီး မြှင့်တင် ဆောင်ရွက်ပေးသွားမယ်လို့လည်း ဆိုထားပါတယ်။ နဝမအချက် ပြောတာကတော့ ကျောင်းသူ ကျောင်းသားတွေ အဆင့်မြင့်ပညာရပ်တွေ ဆည်းပူးလေ့လာခွင့်ရရေးအတွက် ပညာသင်စရိတ် ထောက်ပံ့မှုတွေ တိုးတက်ပေးသွားမှာ ဖြစ်သလို အသက်မွေးဝမ်းကျောင်းပညာ သင်ကြားမှုတွေ ပိုမိုမြင့်မားလာအောင် ဦးတည်ကြိုးပမ်းမှာ ဖြစ်တယ်လို့ ဆိုပါတယ်။ အနာဂတ်ဖက်ဒရယ်စနစ်နဲ့ ဗဟိုချုပ်ကိုင်မှု လျှော့ချရေး နောက်ဆုံးအနေနဲ့ ပြောတာကတော့ ဒီလို ပြုပြင်ပြောင်းလဲရေးလုပ်ငန်းတွေ လုပ်ရာမှာ အချုပ်အခြာအာဏာရဲ့ မူလပိုင်ရှင်ဖြစ်တဲ့ ပြည်သူလူထုနဲ့ နီးစပ်တဲ့ အောက်ခြေကနေ စတင်မယ်။ ပြည်သူနဲ့အတူ စုပေါင်းအင်အားနဲ့ ဆောင်ရွက်မယ်ဆိုတဲ့ သဘောတရား အခြေခံနဲ့ ဆောင်ရွက်မှာလို့ ဆိုပါတယ်။ ပြုပြင်ပြောင်းလဲမှုတွေ ပြုလုပ်ရာမှာ အံမဝင် ခွင်မကျတဲ့ သူတွေကိုလည်း လူစားလဲသင့်ရင် လဲမယ်လို့ သတိပေး ပြောဆိုထားပါတယ်။ ဒါကတော့ ဌာနဆိုင်ရာ အထက်ပိုင်း တာဝန်ရှိတဲ့သူတွေကို ရည်ရွယ် ပြောဆိုထားတာလား၊ ပြည်နယ်/တိုင်းဒေသကြီးက ဝန်ကြီးချုပ်တွေ၊ ဝန်ကြီးတွေကို ရည်ရွယ် ပြောဆိုထားတာလား မရှင်းပါဘူး။ ကျနော့်အမြင်အရတော့ ပြည်ထောင်စုအစိုးရ ဌာနဆိုင်ရာ ထိပ်ပိုင်းတွေရဲ့ စိတ်ဓာတ်နဲ့ လုပ်နည်းလုပ်ဟန်တွေကို ပြုပြင်ပြောင်းလဲဖို့ ကောင်းစွာ မကိုင်တွယ်နိုင်ခဲ့ရင် ဌာနတွင်း၊ ဌာနပြင်ပ အကျင့်ပျက်ခြစားမှု၊ အဂတိလိုက်စားမှု၊ ပြည်သူ့ဘဏ္ဍာဖြုန်းတီးမှု စတာတွေ တိုက်ဖျက်ရေးမှာ အောင်မြင်ဖို့ မလွယ်လှပါဘူး။ ကျားကြီး၊ ခြင်္သေ့ကြီးတွေကို မဖမ်းမိဘဲ ခြင်ကလေး၊ ယင်ကလေးတွေနဲ့ တူတဲ့ အောက်ခြေဝန်ထမ်းတွေပဲ သေကျေရမှာပါ။ ဒီလို လူစားလဲသင့်ရင် လဲမယ်လို့ ပြောရာမှာ အထူးသဖြင့် အနာဂတ်မှာ ပေါ်ထွန်းလာမယ့် ဖက်ဒရယ်ပြည်ထောင်စု အုပ်ချုပ်ရေးအတွက် ကြိုတင်စီမံဆောင်ရွက်တဲ့ အနေနဲ့ တိုင်းဒေသကြီးနဲ့ ပြည်နယ်တွေရဲ့ တင်ပြချက်ကို အခြေခံပြီး ဗဟိုချုပ်ကိုင်မှု လျှော့ချသွားမယ်လို့လည်း ဆိုထားတော့ ဒါဟာ ပြည်နယ်/တိုင်းဒေသကြီး အစိုးရ အဖွဲ့ဝင်တွေကို ရည်ရွယ်ပြီး ပြောတာလည်း ဖြစ်နိုင်ပါတယ်။ လုပ်ငန်းစဉ်တွေကို ဆောင်ရွက်ရာမှာ လိုက်နာရမယ့် အခြေခံမူနဲ့ အမျိုးသားရင်ကြားစေ့ရေး သမ္မတရဲ့မိန့်ခွန်း နောက်ဆုံး နိဂုံးချုပ်အပိုင်းကတော့ အငြင်းပွားစရာ ဖြစ်ပါတယ်။ သူက “ဒီလုပ်ငန်းစဉ်တွေကို ဆောင်ရွက်ရာမှာ ကျနော်တို့ လိုက်နာရမယ့် အခြေခံမူကတော့ 'တည်ငြိမ်မှုကိုလည်း မထိခိုက်စေ၊ အပြောင်းအလဲကိုလည်း ဖြစ်ပေါ်စေ'တဲ့ နည်းလမ်းနဲ့ ဆောင်ရွက်ဖို့ဖြစ်ပါတယ်” လို့ ဆိုထားပါတယ်။ ဒါဟာ ဖက်ဒရယ်ပြည်ထောင်စု အုပ်ချုပ်ရေးအတွက် ကြိုတင်စီမံဆောင်ရွက်တဲ့အနေနဲ့ တိုင်းဒေသကြီးနဲ့ ပြည်နယ်တွေရဲ့ တင်ပြချက်ကို အခြေခံပြီး ဗဟိုချုပ်ကိုင်မှု လျှော့ချသွားရေး လုပ်ငန်းစဉ် တခုတည်းကိုပဲ ရည်ရွယ်ပြောတာ ဆိုရင်တော့ မှန်ကန်တယ်၊ ဖြစ်သင့်တယ်လို့ မြင်ပါတယ်။ ဘာဖြစ်လို့လဲဆိုတော့ ဖွဲ့စည်းပုံအခြေခံဥပဒေနဲ့ ညီညွတ်တဲ့ ကိစ္စမျိုးတွေကို ဖြေလျှော့ပေးရာမှာ လွယ်ကူချောမွေ့နိုင်ပေမယ့် ညီညွတ်သလား၊ မညီညွတ်ဘူးလား အငြင်းပွားဖွယ်ဖြစ်တဲ့ ကိစ္စများကို ဖြေလျှော့ပေးရာမှာ ပြဿနာတွေ ရှိလာနိုင်လို့ပါ။ ဒီလိုကိစ္စမျိုးတွေ ကြုံလာရင် အခြေခံဥပဒေပြင်ဆင်ရေးက ရှေ့က လာရမှာဖြစ်လို့ အလောတကြီး မလုပ်ဖို့ လိုအပ်ပါတယ်။ သို့သော်လည်း တချို့သောသူများက အဲသလို အဓိပ္ပာယ်မကောက်ပါဘူး။ မိန့်ခွန်းတခုလုံးမှာပါတဲ့ ပြုပြင်ပြောင်းလဲရေး လုပ်ငန်းစဉ်များကို ဆောင်ရွက်ရာမှာ လိုက်နာရမယ့် အခြေခံမူအဖြစ် ပြောတာလို့ ယူဆကြပါတယ်။ ဒီလိုဆိုရင်တော့ မိန့်ခွန်းဟာ စိတ်ပျက်အားလျော့စရာ ဖြစ်သွားပါတယ်။ “တည်ငြိမ်မှုကိုလည်း မထိခိုက်စေ” လို့ဆိုတာကို “အစိုးရနဲ့ တပ်မတော်အကြား အမျိုးသားရင်ကြားစေ့ရေးကိုလည်း မထိခိုက်စေ” လို့ အနက်အဓိပ္ပာယ် ကောက်ကြသူတွေလည်း ရှိပါတယ်။ ကျနော့်အမြင်အရတော့ မိန့်ခွန်းတခုလုံးမှာ ပြောခဲ့တဲ့ ပြုပြင်ပြောင်းလဲရမယ့် ကိစ္စတွေကို မှန်မှန်ကန်ကန်၊ အောင်အောင်မြင်မြင်၊ ပြတ်ပြတ်သားသား ဆောင်ရွက်မယ်ဆိုရင် တပ်မတော်က သဘောမတူ၊ ကန့်ကွက်စရာအကြောင်း မမြင်ပါဘူး။ ပြည်သူလူထုရဲ့ ထောက်ခံမှုလည်း တိုးတက်ရရှိလာမှာဖြစ်လို့ တည်ငြိမ်မှု ပျက်ပြားစရာအကြောင်း မရှိပါဘူး။ ဒါကြောင့် ဗဟိုချုပ်ကိုင်မှုလျှော့ချရေး လုပ်ငန်းစဉ်ကလွဲလို့ မိန့်ခွန်းမှာ ပြောခဲ့တဲ့ လုပ်ငန်းစဉ်တွေကို အကောင်အထည်ဖော်ရာမှာ ထားရှိရမယ့် အခြေခံမူကတော့ “ပြည်သူ့အကျိုးကို ဦးထိပ်ထား၊ တရားဥပဒေအောက်မှာ အားလုံးတန်းတူညီမျှရေး၊ ကျောသားရင်သား မခွဲခြားရေး” ဆိုတာပဲဖြစ်ပြီး အမျိုးသားရင်ကြားစေ့ရေးမူဝါဒနဲ့ ပြတ်ပြတ်သားသား စည်းခြားထားရေးပဲ ဖြစ်ပါတယ်။ အမျိုးသားရင်ကြားစေ့ရေး မူဝါဒဆိုတာဟာ အနှစ်သာရအားဖြင့် နှစ်ဖက်အကြား အပြန်အလှန် ယုံကြည်မှုတည်ဆောက်ရေး ဖြစ်တာကြောင့် လက်တွေ့သဘောအားဖြင့် စစ်အစိုးရဟောင်းနဲ့ ယခင်အစိုးရအဖွဲ့ဝင်များ၊ တပ်မတော်ခေါင်းဆောင်များအပေါ် လက်စားမချေရေး၊ ခွင့်လွှတ်ရေးနဲ့ ယခင်က ဥပဒေချိုးဖောက်ခဲ့မှုများ ရှိခဲ့ပါက တရားမစွဲဆိုရေးဆိုတဲ့ အချက်ရယ်၊ တပ်မတော်က ဦးဆောင်ရေးဆွဲထားတဲ့ အခြေခံဥပဒေကို ပြင်ဆင်မယ်ဆိုရင် အခြခံဥပဒေပါ ပြဋ္ဌာန်းချက်များနဲ့အညီ ပြင်ဆင်ရေးဆိုတဲ့ အချက်တွေရယ်က အဓိကကျပါတယ်။ ဒါကြောင့် အန်အယ်လ်ဒီအစိုးရသစ်လက်ထက်ကျခါမှ ယခင် အစိုးရအဖွဲ့ဝင်ဟောင်းများ၊ တပ်မတော်အရာရှိကြီးများက ဥပဒေချိုးဖောက်မှုတွေ၊ အကျင့်ပျက် ခြစားမှုတွေ၊ တာဝန်မကျေပွန်မှုတွေ အကယ်၍ ရှိလာခဲ့ရင် အမျိုးသားရင်ကြားစေ့ရေးမူဝါဒကို ထောက်ထားပြီး ခွင့်လွှတ်စရာမလိုပါ။ အဲဒီလို ထောက်ထားငဲ့ညှာနေမယ်ဆိုရင် တခါ ထိုသူများကလည်း လက်ရှိအစိုးရဝန်ကြီးဌာန တခုခုရဲ့ တာဝန်ခံတယောက် ဖြစ်နေခဲ့မယ်ဆိုရင်၊ သမ္မတမိန့်ခွန်းမှာ ပြောဆိုသွားတဲ့ ပြုပြင်ပြောင်းလဲရေး လုပ်ငန်းစဉ်ကို ပြတ်ပြတ်သားသား အကောင်အထည်ဖော်နိုင်ဖို့ ခဲယဉ်းမှာ ဖြစ်ပါတယ်။ ဒါကြောင့် အမျိုးသားရင်ကြားစေ့ရေးမူဝါဒဆိုတာ- ဘာ ဆိုပြီး အားလုံး နားလည်အောင် ပြတ်ပြတ်သားသား အဓိပ္ပာယ်ဖွင့်ဆို ရှင်းပြထားသင့်လှပါတယ်။ သမ္မတ ဦးဝင်းမြင့်ရဲ့ မိန့်ခွန်းဟာ လက်တွေ့ကျတဲ့ ပြဿနာတွေကို မီးမောင်းထိုးပြထားတာပါ။ အောင်မြင်အောင် ဆောင်ရွက်ရာမှာလည်း ပြည်ထောင်စုအစိုးရ၊ အခြားသောမဏ္ဍိုင်ကြီးတွေ၊ တတ်သိပညာရှင်တွေ၊ အရပ်ဘက် လူ့အဖွဲ့အစည်းတွေ၊ သတင်းမီဒီယာတွေနဲ့ ပြည်သူတွေရဲ့ စုပေါင်းအင်အားနဲ့ ကြိုးပမ်းဆောင်ရွက်မှာပါလို့ ပြောဆိုထားပါတယ်။ လက်တွေ့လုပ်ဆောင်ကြတဲ့အခါ အောင်အောင်မြင်မြင် အကောင်အထည်ဖော်နိုင်ဖို့ ကိစ္စမှာ ပထမ အရေးကြီးဆုံးအချက်က အဆုံးအဖြတ်ပေးနိုင်တဲ့ပုဂ္ဂိုလ်ဖြစ်တဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်ရဲ့ ထောက်ခံမှုရယ်၊ အရေးကြီးတဲ့ ပြည်ထောင်စုဝန်ကြီးသုံးဦးကို အမည်စာရင်း တင်သွင်းနိုင်တဲ့ ကာကွယ်ရေးဦးစီးချုပ်တို့ရဲ့ နားလည်သဘောပေါက် ထောက်ခံမှုရယ် ရရှိဖို့လိုပါတယ်။ အရေးကြီးတဲ့ လုပ်ဆောင်မှု အဆင့်တိုင်းမှာလည်း သူတို့နဲ့ ဆွေးနွေးတိုင်ပင်သွားမယ်ဆိုရင် လုပ်ငန်းစဉ်များ ပိုမိုချောမွေ့ အဆင်ပြေမှာဖြစ်ကြောင်းကို လက်ရှိ ငြိမ်းချမ်းရေးဆွေးနွေးပွဲ လုပ်ငန်းစဉ်များ အထစ်အငေါ့ ဖြစ်နေတာကို သင်ခန်းစာယူဖို့ ထောက်ပြရင်း သတိပေးပြောကြားလိုပါတယ်။ ရဲထွန်း (သီပေါ)