ရွှေဘိုတွင် သိန်း ၂၅၀၀ ခန့် တန်ဖိုးရှိ ဘိန်းဖြူများ ဖမ်းမိ
DVB
·
February 12, 2018
စစ်ကိုင်းတိုင်းဒေသကြီး၊ ရွှေဘိုမြို့နယ်မှာ ဖေဖော်ဝါရီ ၁၁ ရက်က ကျပ်သိန်းပေါင်း ၂၅၀၀ လောက် တန်ဖိုးရှိတဲ့ မူးယစ်ဆေးဝါးတွေကို ရဲတပ်ဖွဲ့က ဖမ်းဆီးရမိခဲ့ပါတယ်။
ရွှေဘို-ရေဦး ကားလမ်းမှာ သတင်းအရ ရွှေဘိုခရိုင်ရဲတပ်ဖွဲ့က ကားတွေကို ရပ်တန့်စေပြီး စစ်ဆေးနေစဉ်မှာ ရပ်မပေးဘဲထွက်ပြေးတဲ့ VIOG အမျိုးစားယာဉ်က ဖမ်းမိခဲ့တာပါ။
“ကျနော်တို့က သတင်းရထားလို့ ဖြတ်လာတဲ့ ကားတွေကို စစ်ဆေးတာ။ အဲဒီကားက အရှိန်များတယ်။ ရပ်မပေးဘဲ မောင်းပြေးတာ။ ကျနော်တို့လည်း နောက်က ကားတစီးနဲ့ လိုက်သွားတယ်။ ၅ မိနစ်တောင်မကြာဘူး အဲဒီကားလည်း ထော်လာဂျီကို ပွတ်တိုက်မိပြီး ရေမြောင်းထဲ ထိုးကျတာပဲ။ မသင်္ကာလို့ ကားထဲ ရှာမှ ဒါတွေလာတွေ့တာပဲ” လို့ ရွှေဘိုခရိုင်ရဲတပ်ဖွဲ့ရုံး ရဲအုပ်ခင်မောင်ဦးက ပြောပါတယ်။
စစ်ဆေးရာမှာ ကားအတွင်းရှိ ဂျက်ဖာ ၂ ဖာထဲက ဘိန်းဖြူတွေထည့်ထားတဲ့ ဆပ်ပြာခွက် ၂၄၂ ခွက်ကို တွေ့ရှိရပြီး တန်ဖိုးတွက်ချက်ရာမှာ ဘိန်းဖြူစုစုပေါင်း ၂၄၈၇ ဂရမ်လောက် လောက်ရှိပြီး ငွေကျပ်သိန်းပေါင်း ၂၄၈၇ သိန်း တန်ဖိုးရှိတယ်လို့ သိရပါတယ်။
ရွှေဘိုမြို့မရဲစခန်းက မူးယစ်ဆေးဝါးတွေတင်ဆောင်လာတဲ့ ကလေးမြို့နေ ကျင်ဇတွန်း နဲ့ တွန်းဇံမြို့နယ်နေ လန်ခန့်ဆူမ်တို့ ၂ ဦးကို မူးယစ်ဆေးဝါးသုံးစွဲမှု ဥပဒေပုဒ်မ ၁၅၊ မူးယစ်နှင့် စိတ်ကိုပြောင်းလဲစေနိုင်တဲ့ ဆေးဝါးများအက်ဥပဒေပုဒ်မ ၁၉ (က)၊ မူးယစ်ရောင်းချရာမှာ ပူးပေါင်းကြံစည်မှု ပုဒ်မ ၂၁ တို့နဲ့ အမှုဖွင့် အရေးယူထားတယ်လို့ သိရပါတယ်။
ရန်နိုင်စိုး
