ကေအိုင်အိုနှင့် တပ်မတော်တို့ နိုင်ငံရေးဆွေးနွေးပွဲဆီသွားနိုင်ရန် တွေ့ဆုံဆွေးနွေး
DVB
·
February 2, 2018
တိုက်ပွဲတွေဖြစ်ပွားနေတဲ့ ကေအိုင်အိုနဲ့ တပ်မတော်တို့အကြား အလွတ်သဘောတွေ့ဆုံပြီး နိုင်ငံရေးဆွေးနွေးပွဲဆီသွားနိုင်ဖို့ ဆွေးနွေးခဲ့ကြတယ်လို့ ကချင်လွတ်မြောက်ရေးအဖွဲ့ ကေအိုင်အိုပြောခွင့်ရ ဗိုလ်မှူးကြီး နော်ဘိုက ဒီဗွီဘီကို ပြောပါတယ်။
ဖေဖော်ဝါရီ ၁ ရက်က နှစ်ဘက်ကိုယ်စားလှယ်တွေ တွေ့ဆုံဆွေးနွေးခဲ့ကြတာဖြစ်ပြီး ကေအိုင်အို ကချင်လွတ်မြောက်ရေးအဖွဲ့ဥက္ကဋ္ဌ ဗိုလ်ချုပ်ကြီး အင်ဘန်လ တက်ရောက်ဆွေးနွေးခဲ့တယ်လို့ ပြောပါတယ်။
“ကေအိုင်အေဘက်က ဥက္ကဋ္ဌကြီး ဦးစီးဦးဆောင်ပြီး လုပ်ဆောင်တယ်လို့ ကြားမိပါတယ်။ တိုက်ပွဲတွေ၊ စစ်ပွဲတွေက တော်တော်ပြင်းထန်နေတဲ့ အချိန်ဖြစ်ပါတယ်။ တိုက်ပွဲကနေ နိုင်ငံရေးဆွေးနွေးပွဲသို့ဆိုတဲ့ ရည်ရွယ်ချက်နဲ့ ဒီနိုင်ငံရေးဆွေးနွေးပွဲ လုပ်နိုင်ဖို့အတွက် လမ်းကြောင်းလမ်းစတွေ၊ အခွင့်အရေးတွေ အခြေအနေတွေကို ဖန်တီးနိုင်ရေးအတွက် ခုလိုမျိုးတွေ့ဆုံတဲ့ သဘောမျိုးဖြစ်နိုင်တယ်လို့ ကျနော် ယူဆပါတယ်။”
ဘယ်နေရာမှာ တွေ့ဆုံခဲ့ကြတယ် တပ်မတော်ဘက်က ဘယ်သူတွေ တက်တယ်ဆိုတာတော့ပြောဆိုခဲ့ခြင်းမရှိပါဘူး။
ပြင်ပမှာ ထွက်ပေါ်နေတဲ့ သတင်းတွေအရ ကေအိုင်အိုအဖွဲ့ဥက္ကဋ္ဌ ဗိုလ်ချုပ်ကြီး အင်ဘန်လ ဦးဆောင်တဲ့ ကိုယ်စားလှယ်အဖွဲ့နဲ့ တပ်မတော်ဘက်က ဒုဗိုလ်ချုပ်ကြီး ထွန်းထွန်းနောင် ခေါင်းဆောင်တဲ့ ကိုယ်စားလှယ်အဖွဲ့တို့ဟာ တရုတ်အစိုးရရဲ့ ကြားဝင်ညှိနှိုင်းမှုနဲ့ နယ်စပ် တရုတ်နိုင်ငံ ယူနန်ပြည်နယ်မှာ တွေ့ဆုံခဲ့ကြတယ်လို့ သိရပါတယ်။
ကေအိုင်အိုတပ်ဖွဲ့ဟာ အန်စီအေ အပစ်ရပ်စာချုပ်မှာ လက်မှတ်မထိုးသေးတဲ့ တပ်ဖွဲ့ဖြစ်ပြီး လတ်တလော တနိုင်းဒေသမှာ တပ်မတော်နဲ့ တိုက်ပွဲတွေ အပြင်းအထန်ဖြစ်ပွားနေပါတယ်။
