မြန်မာလုပ်သားတဦး စိတ်မနှံ့သည့် အမျိုးသမီးကို မုဒိမ်းကျင့်ရန်ကြံစည်မှုဖြင့် အဖမ်းခံရ
DVB
·
December 22, 2017
ထိုင်းနိုင်ငံမြောက်ပိုင်း ချင်းမိုင်ခရိုင် မယ့်တိုင်မြို့နယ်ထဲမှာ စိတ်မနှံ့တဲ့ အမျိုးသမီးတဦးကို မုဒိမ်းကျင့်ရန်ကြံစည်မှု၊ အကြမ်းဖက်မှုတွေနဲ့ မြန်မာလုပ်သားတဦး ဖမ်းဆီးခံခဲ့ရပါတယ်။
ဒီဇင်ဘာ ၁၈ ရက်နေ့က မယ့်တိုင်မြို့နယ် မဲ့တမန်းအုပ်စု မူးဆေးပါမြိန့်ကျေးရွာရှိ လမ်းဘေးတောအုပ်ထဲမှာ ဓားခုတ်ရာတွေနဲ့ လဲကျနေတဲ့ အသက် ၂၀ နှစ်အရွယ် စိတ်မနှံ့သူ မိန်းကလေးတဦး တွေ့ရှိကြောင်း ရွာသူကြီးက လာရောက်အကြောင်းကြားတဲ့အတွက် တရားခံကို လိုက်လံစုံစမ်းရှာဖွေခဲ့တာလို့ မယ့်တိုင်မြို့နယ် ရဲစခန်းမှ တာဝန်ကျရဲအုပ် ယုထကန်မေထာက သတင်းထောက်တွေကို ပြောပါတယ်။
ဒီဇင်ဘာ ၁၉ ရက်နေ့ မနက်မှာတော့ မဲ့တိုင်မြို့နယ် ကိုက်ချန့်အုပ်စု ရပ်ကွက် ၆ ရှိ သစ်သီးခြံစောင့်တဲအတွင်း ပွန်းပဲ့ရာတွေရထားတဲ့ အသက် ၃၂ နှစ်ရွယ် မြန်မာရွှေ့ပြောင်း အလုပ်သမား ထွန်းထောင်းဒီကို ဖမ်းမိခဲ့တယ်လို့ ဆိုပါတယ်။
ထွန်းထောင်းဒီက အခင်းဖြစ်တဲ့နေ့က သူဟာ စိတ်ကြွဆေး ၂ ပြား သုံးထားပြီး တောလမ်းတနေရာမှာ မိန်းကလေးတယောက် လျှောက်သွားတာမြင်လို့ လိင်ဆက်ဆံလိုစိတ် ဖြစ်ပေါ်ခဲ့ကြောင်း၊ ဒါကြောင့် အဲဒီမိန်းကလေးကို ချုံပုတ်ထဲ ဆွဲခေါ်ခဲ့ရာမှာ မိန်းကလေးက ပြန်လည်ခုခံ ရုန်းကန်တဲ့အတွက် ဓားနဲ့ ၂ ချက် ၃ ချက် ထိုးခဲ့ကြောင်း၊ မိန်းကလေးက ထွက်ပြေးသွားလို့ သူလည်း ဓားကို အဲဒီနေရာမှာ လွှင့်ပစ်ကာ အင်္ကျီပါချွတ်ခဲ့ပြီး သစ်သီးခြံထဲ ဝင်ရောက်ပုန်းခိုနေခဲ့တာလို့ ဖွင့်ဟဝန်ခံသွားပါတယ်။
ရဲစခန်းက ထွန်းထောင်းဒီကို သူတပါးအား သေစေလိုရန် တမင်ကြံရွယ်မှု၊ မုဒိမ်းကျင့်ရန် ကြံစည်မှု၊ ကိုယ်ထိလက်ရောက် အကြမ်းဖက်မှုတွေနဲ့ အမှုဖွင့် အရေးယူသွားမှာဖြစ်ပြီး ဒဏ်ရာရ မိန်းကလေးကတော့ မယ့်တိုင်ဆေးရုံကြီးမှာ တက်ရောက်ကုသနေပါတယ်။
