မိုးညှင်းတွင် တပ်ကြပ်ကြီးတဦး မောင်းနှင်သည့် ကားပေါ်မှ ကျွန်းခွဲသားများ ဖမ်းမိ
DVB
·
November 27, 2017
ကချင်ပြည်နယ်၊ မိုးညှင်းမြို့နယ်၊ မြို့အ၀င်ဂိတ်မှာ နိုဝင်ဘာ ၂၆ ရက် ညနေ ပိုင်းက တပ်ကြပ်ကြီးတဦး မောင်းနှင်လာတဲ့ ကားထဲက ကျွန်းသစ်ခွဲသားတွေ သိမ်းဆည်းရမိခဲ့တယ်လို့ ဟိုပင်ရဲစခန်းက ပြောပါတယ်။
ဟိုပင်ဘိနယ်တာဝန်ခံ တောအုပ် ဦးစိုးညွန့်အောင်၊ ဟိုပင်ရဲစခန်းမှ နယ်ထိန်းခေါင်းဆောင်၊ ဒုရဲအုပ်ရှိန်းထက်ဦး ဦးစီးအဖွဲ့ အမှတ် ၃ စစ်ဖက်ရေးရာလုံခြုံရေးတပ်စုမှ တပ်ကြပ်ကြီးတို့ ပူးပေါင်းအဖွဲ့ဟာ သက်သေတွေနဲ့အတူ သတင်းအရ ဟိုပင်မြို့ဝင်ဂိတ်မှာ စောင့်ဆိုင်းနေချိန် ယာဉ်မောင်းတပ်ကြပ်ကြီး အောင်နိုင်စိုး မောင်းနှင်လာပြီး သစ်ပိုင်ရှင်ဖြစ်သူ ဒေါ်သင်းသင်းမြတ် လိုက်ပါလာတဲ့ ကားကိုစစ်ဆေးခဲ့တာပါ။
ကားကို စစ်ဆေးရှာဖွေရာ ကားနောက်ခန်းမှာ တရားမဝင်သယ်ဆောင်လာတဲ့ ကျွန်းခွဲသားဆိုဒ်စုံ ၂၄၉ ချောင်း၊ အလေးချိန် ၁ ဒသမ ၀၈၆၂ တန်တို့ကို တွေ့ရှိလို့ သိမ်းဆည်းခဲ့တာလို့ ဆိုပါတယ်။
ဟိုပင်ရဲစခန်းမှူး ရဲအုပ်ထိန်လင်းက “စစ်တပ်ကဆိုတော့ သူတို့တပ်ကို ပြန်လွှဲပေးရမှာပါ။
ခုလောလောဆယ်တော့ ဟိုပင်ရဲစခန်းမှာပဲ ထိန်းသိမ်းထားပါတယ်” လို့ ပြောပါတယ်။
ဟိုပင်ရဲစခန်းက တပ်ကြပ်ကြီးအောင်နိုင်စိုးနဲ့ ဒေါ်သင်းသင်းမြတ် တို့ကို သစ်တောအက်ဥပဒေပုဒ်မ-၄၃(က) နဲ့ အမှုဖွင့် အရေးယူထားတယ်လို့ သိရပါတယ်။
မုန်းမုန်းမင်း
