ရေးမြို့ပင်လယ်ပြင်တွင် ဓားဖြင့်ထိုးခံရသည့် ဖောင်ဦးစီး ရေထဲပြုတ်ကျ ပျောက်ဆုံး
DVB
·
November 10, 2017
မွန်ပြည်နယ်၊ ရေးမြို့နယ်၊ ကပ္ပလီပင်လယ်ပြင်မှာ နိုဝင်ဘာ ၈ ရက် မနက်ပိုင်းက ရေလုပ်ငန်းရှင် ဦးလင်းလင်းရဲ့ ငါးဖမ်းကျားဖောင်ပေါ်က ဖောင်ဦးစီးတဦး ဓားထိုးခံရပြီး ပင်လယ်ထဲပြုတ်ကျ ပျောက်ဆုံးသွားခဲ့တယ်လို့ ရေးမြို့မရဲစခန်းက ပြောပါတယ်။
ရေးမြို့မ ရဲစခန်းမှူး ဒု-ရဲမှူး စိုးမွန်က “ဖောင်ဦးစီး ဦးသက်နိုင်နဲ့ ရေလုပ်သားတွေဖြစ်တဲ့ စိုးကိုကိုနဲ့ ကိုဇွဲတို့ ၃ ဦး အလုပ်လုပ်နေရင်း ဦးသက်နိုင်က စိုးကိုကိုကို ဆဲဆို ကြိမ်းမောင်းရာကနေ စိုးကိုကိုက မကျေနပ်လို့ ငါးခွဲဓားနဲ့ ဦးသက်နိုင်ဝမ်းဗိုက်ကို ထိုးသွင်းလိုက်လို့ ဒဏ်ရာနဲ့ ရေထဲပြုတ်ကျ ပျောက်ဆုံးနေတာ” လို့ ပြောပါတယ်။
ရေလုပ်သား ကိုဇွဲက ဖောင်ဦးစီး ဦးသက်နိုင် ဒဏ်ရာနဲ့ ရေထဲပြုတ်ကျသွားလို့ လိုက်လံရှာဖွေခဲ့ပေမယ့် မတွေ့လို့ ငါးပေါင်းဦးစီးချုပ် ဦးမျိုးအောင်ကို ဆက်သွယ်အကြောင်းကြားပြီး န်ိုဝင်ဘာ ၉ ရက် ညပိုင်းက စိုးကိုကိုကို ရေးမြို့မရဲစခန်းမှာ တိုင်တန်းမှု ပြုလုပ်ခဲ့တာပါ။
ရေးမြို့မရဲစခန်းက ဖောင်ဦးစီးကို ဓားနဲ့ထိုးခဲ့တဲ့ စိုးကိုကိုကို ရာဇသတ်ကြီး ပုဒ်မ-၃၀၇ နဲ့ အမှုဖွင့် အရေးယူထားတယ်လို့ သိရပါတယ်။
နေမျိုးထွဋ် (ရေး)
