ပေါင်မြို့နယ် တူးမြောင်းအတွင်း လူ ၁ ဦး ရေနစ်သေဆုံး
DVB
·
July 21, 2017
ပေါင်မြို့နယ်၊ ရင်းငြိမ်တောင်ကျေးရွာ၊ ရင်းငြိမ်တူးမြောင်းအတွင်း ဇူလိုင် ၁၉ ရက်နေ့ညပိုင်းက လူ ၁ ဦး ရေနစ်သေဆုံးခဲ့တယ်လို့ ရင်းငြိမ်ရဲစခန်းက ပြောပါတယ်။
ဖြစ်စဉ်မှာ ပေါင်မြို့နယ်၊ ရင်းငြိမ်တောင်ကျေးရွာ၊ ကွင်းအမှတ် ၇၆၅ ရှိ ရင်းငြိမ်တူးမြောင်းအတွင်းမှာ ဇူလိုင် ၁၉ ရက် ည ၉ နာရီခွဲလောက်က အမျိုးသားတဦး ရေနစ်သေဆုံးနေတယ်လို့ ကျေးရွာအုပ်ချုပ်ရေးမှူးရဲ့ ဖုန်းသတင်းပေးချက်အရ ရင်းငြိမ်ရဲကင်းစခန်းတာဝန်ရှိသူတွေ သွားရောက်စစ်ဆေးရာ ဦးမင်းအောင်ဆိုသူဟာ တူးမြောင်းထဲ ပက်လက်အနေအထားနဲ့ နှာခေါင်းကနေ သွေးရည်ကြည်တွေ ထွက်ပြီး ပြင်ပဒဏ်ရာတစုံတရာမရှိဘဲ သေဆုံးနေတာကို တွေ့ရှိရတယ်လို့ ရဲငြိမ်ရဲကင်းစခန်းမှ ခေတ္တရဲကင်းစခန်းမှူး ဒုရဲအုပ်အောင်ဌေးက ပြောပါတယ်။
"သေဆုံးသူက မနေ့က ညနေ ၅ နာရီလောက်က တူးမြောင်းထဲမှာ ခရုဖမ်းဖို့ ထွက်သွားရာကနေ ပြန်မရောက်မလာလို့ သူ့မိသားစုက လိုက်ရှာတော့ ည ၁၀ နာရီလောက်မှ တူးမြောင်းထဲမှာ ရေနစ်သေဆုံးနေတာကို တွေ့ခဲ့တယ်လို့တော့ ပြောတယ်။ နောက်ပြီး ဒီလူက ရောဂါသည်တယောက်လည်းဖြစ်ပါတယ်" လို့ ပြောပါတယ်။
ဦးမင်းအောင် ရေနစ်သေဆုံးမှုနဲ့ ပတ်သက်လို့ ပေါင်မြို့မရဲစခန်းက သေမှုသေခင်းအမှတ်စဉ်(၃၆/၂၀၁၇) အရ အမှုဖွင့်ထားပြီး ဓမ္မာတာအတိုင်း သေဆုံးတာ ဟုတ်မဟုတ် ဆေးစစ်နေတယ်လို့ ရဲမှတ်တမ်းတွေအရ သိရပါတယ်။
သတင်း-ယူမင်းစိုး
