မင်းပြားတွင် ဘုရားဖူးစက်လှေ တိမ်းမှောက်၊ ၈ ဦးသေ ၁ ဦးပျောက်ဆုံး
DVB
·
April 13, 2017
ရခိုင်ပြည်နယ်၊ မင်းပြားမြို့နယ်၊ ကမ်းနီ၊ မေလွမ်းအနီးမှာ ဘုရားဖူးစက်လှေတစီး တိမ်းမှောက်လို့ ၈ ဦး သေဆုံးပြီး တဦးပျောက်ဆုံးနေပါတယ်။
ဧပြီ ၁၃ ရက် မနက် ၄ နာရီဝန်းကျင်လောက်က ရခိုင်ပြည်နယ်၊ အမ်းမြို့နယ်ကံဗွေကျေးရွာက ကျောက်တော်-မြောက်ဦးကို ဘုရားဖူးလာတဲ့ ခရီးသည် ၆၂ ဦး တင်ဆောင်လာတဲ့ စက်လှေ တိမ်းမှောက်နစ်မြုပ်မှု ဖြစ်ပွားခဲ့တာပါ။
လက်ရှိအချိန်မှာတော့ အလောင်း ၈ လောင်းရရှိထားပြီး ၁ ဦးပျောက်ဆုံးနေတယ်လို့ ကယ်ဆယ်ရေး လုပ်ဆောင်နေတဲ့ ရခိုင်အမျိုးသားပါတီ မင်းပြားမြို့ အေအန်ပီပြန်ကြားရေဌာန ကိုဆန်းဝင်းမောင်က ဒီဗွီဘီကို ပြောပါတယ်။
"အမ်းမြို့နယ်ကနေ ကျောက်တော်-မြောက်ဦးကို ဘုရားလာဖူးတာလို့ ပြောပါတယ်။ စက်လှေပေါ်မှာလူဦးရေ ၆၂ ဦးပါတယ်။ စက်လှေက မနက် ၄ နာရီလောက်မှာ မှောက်သွားတာပါ။ ကျားပါးစပ်ပိုက်မှာ စက်လှေဒလက်နဲ့ငြိပြီး မှောက်သွားတာ။ မနက်အစောကြီးဆိုတော့ ဘာမှ မမြင်ဘူးလို့ ပြောတယ်။ အလောင်း ၈ လောင်းကို ဆယ်ထားပြီးပြီ၊ တဦးပျောက်ဆုံးနေတယ်။"
လက်ရှိအချိန်မှာတော့ မင်းပြားပြည့်သူ့ဆေးရုံမှာ ဆေးကုသမှုခံယူနေတာကတော့ ၉ ဦးရှိပြီး မင်းပြား မီးသတ်ဌာနအပါအဝင် မင်းပြားမြို့လူမှုအဖွဲ့အစည်းတွေ ပျောက်ဆုံးနေတဲ့ လူတဦးကို ဆက်လက်ရှာဖွေနေတယ်လို့ ပြောပါတယ်။
ဝဏ္ဏခွာညို
