၂၁ ပင်လုံတွင် အရပ်ဘက်အဖွဲ့အစည်းကိုယ်စားလှယ်များ ပါဝင်ခွင့်ရရေး တောင်းဆိုမည်
DVB
·
February 14, 2017
လာမယ့် ၂၁ ရာစု ပင်လုံ၊ ပြည်ထောင်စုငြိမ်းချမ်းရေးညီလာခံ ဒုတိယအစည်းအဝေး အမျိုးသားအဆင့် နိုင်ငံရေးဆွေးနွေးမှုမှာ အရပ်ဘက်အဖွဲ့အစည်း ကိုယ်စားလှယ်အဖြစ် ပါဝင်ခွင့်ရရေးအတွက် တောင်းဆိုမယ်လို့ အရပ်ဘက်အဖွဲ့အစည်းဖိုရမ် ဖြစ်မြောက်ရေး ဗဟိုကော်မတီဝင် ဒေါ်စုစုဆွေက ပြောပါတယ်။
“ကျမတို့ တောင်းဆိုတာက အမျိုးသားအဆင့်ကိုယ်စားလှယ် တရားဝင်ပါဖို့။ ဘာဖြစ်လို့လဲ ဆိုတော့ အမျိုးသားအဆင့် နိုင်ငံရေးဆွေးနွေးပွဲမှာ သူတို့ရဲ့ ကော်မတီသည် လေးပွင့်ဆိုင် (လွှတ်တော်၊ ပါတီများ၊ တပ်မတော်၊ တိုင်းရင်းသားလက်နက်ကိုင်) ရှိထားတယ်။ ဒါပေမယ့် အရပ်ဘက် အဖွဲ့အစည်းကလည်း အကြောင်းအရာလိုက်ကို ဦးဆောင်ရမှာ ဖြစ်တဲ့အတွက် ဦးဆောင်ရတာချင်း အတူတူ ဘာလို့ အရပ်ဘက် အဖွဲ့အစည်းကို တန်းတူမပေးနိုင်ရမှာလဲ” လို့ ဆက်လက် ပြောပါတယ်။
ဒီလ ၂၄ ရက်နဲ့ ၂၅ ရက်နေ့ နေပြည်တော်မှာပြုလုပ်မယ့် တနိုင်ငံလုံးအဆင့် အရပ်ဘက် အဖွဲ့အစည်းဖိုရမ်မှာ တောင်းဆိုသွားမှာပါ။ လက်ရှိမှာတော့ တနိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) အရ အရပ်ဘက်အဖွဲ့အစည်း ကိုယ်စားလှယ်တွေအနေနဲ့ ပါဝင်သင့် ပါဝင်ထိုက်သူများ ဆိုတဲ့ ခေါင်းစဉ်အောက်ကနေ ပါဝင်ခွင့်ရရှိထားပါတယ်။
“တက်ရောက်ခွင့်ကို မပေးတော့ဘူးလို့ ဒေါ်အောင်ဆန်းစုကြည်ကတော့ ပြောထားတယ်။ အပြိုင်ပဲ လုပ်မယ်ပေါ့။ ဒါပေမယ့် ကျနော်တို့က လေ့လာသူအနေနဲ့ဖိတ်ရင်လည်း ဘာမှ မထိရောက်ဘူးလို့ ထင်တယ်။ တက်မှာလည်း မဟုတ်ဘူးလို့ ဆွေးနွေးချက်တွေ ရှိတယ်” လို့ အရပ်ဘက်အဖွဲ့အစည်းဖိုရမ်ဖြစ်မြောက်ရေး တနင်္သာရီတိုင်းဒေသကြီး တာဝန်ခံ ကိုကျော်မင်းထိုက်က ပြောပါတယ်။
အရပ်ဘက်အဖွဲ့အစည်းဖိုရမ်ဖြစ်မြောက်ရေးအတွက် ပြီးခဲ့တဲ့ ၂၀၁၆ ခုနှစ် မေလ ကုန်လောက်က နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က လမ်းညွှန်ခဲ့တာပါ။ အဲဒီနောက်မှာ ရန်ကုန်တိုင်း လူမှုရေးဝန်ကြီး ဦးနိုင်ငံလင်းက ဦးဆောင်ကာ အရပ်ဘက် အဖွဲ့အစည်း အဖွဲ့ဝင်ပေါင်း ၁၂၀၀ ကျော်ပါဝင်တဲ့ ကွန်ရက် ၂၄ ခုတို့နဲ့ အစည်းအဝေးပေါင်း ၂၀ ကျော် စတင် ပြုလုပ်ခဲ့ပါတယ်။
တနိုင်ငံလုံးအဆင့် အရပ်ဘက်အဖွဲ့အစည်း အကြိုဖိုရမ်ကို ယခုလ ၂၁ ရက်ကနေ ၂၃ ရက်နေ့အထိ ရှမ်းပြည်တောင်ပိုင်း တောင်ကြီးမြို့မှာ ၃ ရက်တိတိ ပြုလုပ်သွားမှာ ဖြစ်ပါတယ်။
မင်းရဲစစ်နိုင်
