ကယားပြည်နယ် လွိုင်ကော်တွင် မီးလောင်
နန်းမြနဒီ
·
January 3, 2017
ကယားပြည်နယ် လွိုင်ကော်မြို့ မင်းစုရပ် နာရီစင်အနီးရှိ လူနေအိမ်တအိမ်မှာ ဒီကနေ့မနက်က မီးလောင်မှု ဖြစ်ပွားခဲ့ပါတယ်။
မီးလောင်တဲ့နေရာဟာ အုတ်ညှပ်သွပ်မိုး ၂ ထပ်အိမ်ဖြစ်ပြီး အောက်ထပ်မှာ ဈေးဆိုင်ဖွင့်ထားကြောင်း၊ မနက် ၂ နာရီက စလောင်ကာ မီးသတ်ကားတွေ အချိန်မီရောက်လာတဲ့အတွက် ၁၀ မိနစ်အတွင်း မီးငြှိမ်းသတ်နိုင်ခဲ့ပြီး အိမ်ထဲက ပစ္စည်းတွေပဲ လောင်ကျွမ်းသွားတယ်လို့ လွိုင်ကော်ခရိုင် အုပ်ချုပ်ရေးရုံး ဝန်ထမ်း ဦးရီးရယ်က ဒီဗွီဘီကို ပြောပါတယ်။
“အိမ်ရှင်က ဦးစစ်သန်းဝင်းတဲ့။ သူတို့က အိမ်ထဲမှာပဲ ဈေးရောင်းတာလေ။ စတိုးဆိုင်လို့ ပြထားတယ်။ အိမ်က လုံးချင်း ၂ ထပ်အိမ်၊ မီးဖန်ချောင်းကနေ ဝါယာရှော့ဖြစ်ပြီးတော့ လောင်သွားတယ်၊ အိမ်ပုံစံတော့ မပျက်ဘူး၊ အတွင်းထဲက ပစ္စည်းတွေတော့ လောင်သွားတယ်။”
မီးလောင်မှုမှာ ထိခိုက်ဒဏ်ရာရသူမရှိဘဲ မီးလောင်မှုကြောင့် ပျက်စီးဆုံးရှုံးမှုပမာဏ ကျပ် ၃ သိန်းလောက်ရှိမယ်လို့ ခန့်မှန်းထားပါတယ်။
