ကရင်ပြည်နယ် ဘားအံမြို့နယ်ရှိ မြိုင်ကလေး သစ်တောကြိုးဝိုင်းအတွင်းမှာ ကျူးကျော်နေထိုင်သူ ၂ ဒါဇင်ကို ဘားအံမြို့နယ် ရဲတပ်ဖွဲ့က ဖမ်းဆီးထားပါတယ်။ ကရင်ပြည်နယ် ရဲတပ်ဖွဲ့ ရဲမှူးကြီး စိန်လွင်က “သစ်တောက အမှုဖွင့်တဲ့အတွက်ကြောင့် ရဲတပ်ဖွဲ့က သစ်တောဥပဒေပုဒ်မ ၄၃ (က) နဲ့ ပုဒ်မ ၄၀ (က-ဂ) ၂ မှုနဲ့ ကျနော်တို့ အမှုဖွင့်ပြီးတော့ အဲဒီမှာ အဓိကပါဝင်တဲ့ ကော်မတီတို့၊ အုပ်ချုပ်ရေးမှူးတို့ စုစုပေါင်း လူ ၂၄ ဦးကို ဖမ်းထားပါတယ်။ ” လို့ ပြောပါတယ်။ စတင်ဖမ်းဆီးချိန်က ၃၁ ဦးကို ဖမ်းဆီးစစ်ဆေးခဲ့ရာမှာ ပြစ်မှုကျူးလွန်ခြင်းမရှိသူ ၇ ဦးကို ပြန်လွှတ်ပေးခဲ့ပါတယ်။ ကြိုးဝိုင်းအတွင်းမှာ လွန်ခဲ့တဲ့ ၆ လခန့်ကစပြီး ကျူးကျော်နေထိုင်သူ တိုးပွားလာပြီး အခုအခါ အိမ်ခြေပေါင်း ၁၃၀ လောက်အထိ ရှိလာတယ်လို့ ရဲမှူးကြီး စိန်လွင်က ပြောပါတယ်။ အဲဒီမြေကွက်ကို အကွက်ချရောင်းချခဲ့တဲ့ ကရင်ငြိမ်းချမ်းကောင်စီ (KNU/KNLA- PC) အဖွဲ့ဝင် တဦးကိုလည်း အရေးယူထားတယ်လို့လည်း ပြောပါတယ်။ “အဲဒီမှာ (KNU/KNLA PC) က စောမိုက်ကယ်ဆိုတဲ့လူကနေပြီး အုပ်ချုပ်ရေးမှူး တာဝန်ယူ ပြီးတော့ ရွာကော်မတီသူ့ဘာသူဖွဲ့တယ်။ ပြီးတော့ မြေကွက်တွေကို သူက အကွက်ရိုက် ရောင်းစားတာပေါ့။ ကျနော်တို့ ကနေဦး စစ်ဆေးဖော်ထုတ်ချက်အရတော့ ရွာသားတွေထဲမှာ ၅ သောင်း၊ တသိန်း အဲလို စရံပေးရတယ်။ ပြီးရင် ကိုယ်သတ်မှတ်တဲ့ မြေကွက်ကို ကိုယ့်ဘာသာကို ခြုံရှင်းကြ၊ အားလုံးပြီးလို့ နေပြီဆိုလို့ရှိရင် နောက်ပိုင်းမှာ ၅ သိန်းပေးရတယ်။ အဲဒါမျိုး သဘောတူညီချက်နဲ့ဝင်တယ်။ ကျနော်တို့ကတော့ (KNU/KNLA PC)ကဆိုပြီး ခွင့်လွှတ်လို့ မရပါဘူး။ ပြစ်မှု ကျူးလွန်တဲ့နေရာမှာ သူက အဓိကခေါင်းဆောင်ဖြစ်တဲ့အတွက် သူ့ကိုလည်း ကျနော်တို့ ဖမ်းပြီး အရေးယူထားပါတယ်။” အဲဒီသစ်တော်ကြိုးဝိုင်းဟာ ဘားအံ-သထုံ ကားလမ်းဘေးမှာ တည်ရှိပြီး ဘားအံမြို့နဲ့ ၁၅ မိုင်လောက် ဝေးပါတယ်။ အဲဒီကြိုးဝိုင်းနားမှာ ရှိတဲ့ ကျေးရွာတွေက ရွာသားတွေ လာရောက်ပြီး ကျူးကျော်ဆောက်လုပ်တာလို့ ဆိုပါတယ်။ ကျူးကျော်အိမ်တွေကို ဖယ်ရှားပေးဖို့ သတိပေးထားပြီး  မဖယ်ရင်တော့ သစ်တောဌာနက  ဖယ်ရှားမယ်လို့ ရဲမှူးကြီးက ပြောပါတယ်။