ရန်ကုန်တိုင်း ဗိုလ်တထောင်မြို့နယ် စည်ပင်ဝင်းမှာ ဒီကနေ့ ဇူလိုင် ၂၄ ရက် မနက် လေဆင်နှာမောင်းတိုက်ခတ်တာကြောင့် ကွန်တိန်နာယာဉ်အချို့ တိမ်းမှောက်ပျက်စီးခဲ့တယ်လို့ မြို့ခံတွေဆီက သိရပါတယ်။
“လေက အတော်ပြင်းတာ ကြောက်ဖို့ကောင်းတယ်။ ကွန်တိန်နာကားတွေ ၅ စီး၊ ၆ စီးလောက် လဲကျတယ်။ လူတွေပိပြီး မသေတာပဲ ကံကောင်းတာ။
အလားတူပင် ဒီကနေ့ မနက် ၇ နာရီက ဒလမြို့၊ သမ္မတကမ်းခြေရပ်ကွက်ရှိ ကူးတို့ဆိပ်မှာ ခရီးသည် ၁၀ ယောက် တင်ဆောင်လာတဲ့ စက်လှေတစီး မိုးသည်းထန်စွာရွာသွန်းပြီး လေပြင်းတိုက်ခတ်မှုကြောင့် နစ်မြုပ်ကာ ခရီးသည် ၈ ယောက် ပြန်တွေ့ခဲ့ပေမဲ့ စက်လှေမောင်းသူ နဲ့ ခရီးသည် ၂ ယောက်ကိုတော့ အခုထိ လူမှုကယ်ဆယ်ရေးအဖွဲ့တွေက ရှာဖွေနေကြပါတယ်။
ဒီကနေ့ မနက် ရန်ကုန်တိုင်းမှာ မိုးသည်းထန်စွာရွာပြီး လေပြင်တိုက်ခိုက်မှုကြောင့် မှော်ဘီ၊ ဒေါပုံ၊ ဒလ၊ မင်္ဂလာဒုံ၊ ရန်ကင်း၊ သာကေတ၊ ဒဂုံဆိပ်ကမ်း နဲ့ သန်လျင်မြို့နယ်မှာ သစ်ပင်တွေလဲကျတာ၊ နေအိမ်တွေ အမိုးလန်ပျက်စီးတာတွေ ဖြစ်ခဲ့တယ်လို့ မြန်မာနိုင်ငံ မီးသတ်တပ်ဖွဲ့က ထုတ်ပြန်ထားပါတယ်။
