စစ်ကိုင်းမြို့အနှံ့ ငလျင်ကြောင့် ပြိုကျပျက်စီးတဲ့နေရာအများစုဟာ လက်ရာမပျက်ရှိနေပြီး သေဆုံးသူတွေကို ဖော်ယူနိုင်တာ မရှိတာကြောင့် လူနေရပ်ကွက်တွေအတွင်း အပုပ်နံ့တွေ ထွက်လာနေပါတယ်။ 

ငလျင်ဗဟိုချက်နဲ့ အနီးဆုံးမှာရှိနေတဲ့ စစ်ကိုင်းမြို့ဟာ နွေရာသီယဉ်ကျေးလိမ္မာကျောင်းတွေ၊ အခြေခံ ပညာကျူရှင်ကျောင်း  သင်တန်းတွေ၊ ဗလီတွေရှိနေပြီး ငလျင်လှုပ်ချိန်မှာ ကလေးတွေ ကျောင်းတက်ချိန်၊ ဘုရားဝတ်ပြုချိန်ဖြစ်တာကြောင့် သေဆုံးသူလူဦးရေ များပြားခဲ့တာလည်း ဖြစ်ပါတယ်။

စစ်ကိုင်းတောင်ခြေရှိ ယဉ်ကျေးလိမ္မာသင်တန်းဖွင့်လှစ်ထားတဲ့ လေးကျွန်းမြေ အုတ်ကျောင်း သုံးထပ်ဆောင် ငလျင်ကြောင့် ပြိုကျခဲ့ပြီး ယဉ်ကျေးလိမ္မာသင်တန်းကျောင်းတက်ရောက်နေတဲ့ ကလေးတွေရဲ့ အခြေအနေကို မြို့ခံက အခုလို ပြောပါတယ်။

“ကလေးတွေက အသေပျောက်တွေကတော့များတယ်။ ဆရာလေးတွေရော၊ ကိုရင်လေးတွေက များတယ်။ အဲ့ဒီ အုတ်ကျောင်းမှာ။ ရှင်တဲ့ဟာတွေက ဖြစ်ဖြစ်ချင်းတခြမ်းပဲ ပိတာဆိုတော့ ပိတဲ့တဝက်ကတော့ အခုချိန်ထိ မထုတ်ရသေးဘူး။ ဘတ်ဟိုးတွေဘာတွေ မလာသေးတော့။”

နွေရာသီရောက်တိုင်း အုတ်ကျောင်းဆရာတော်က ဦးစီးပြီး ယဉ်ကျေးလိမ္မာသင်တန်း ဖွင့်လှစ်ထားတာ ဖြစ်ပါတယ်။ 

အားပြင်းငလျင်လှုပ်ခတ်လို့ အုတ်ကျောင်းကြီးပြိုကျရာကနေ လွတ်မြောက်လာတဲ့ ဆရာမတယောက်က “ဘယ်လိုကြုံခဲ့ရလဲဆိုတော့ ပထမ ကလေးတွေ စာမေးမယ်ဆိုပြီး ဒုတိယထပ်ကို ရောက်သွားတဲ့အချိန်၊ ပထမ ငလျင်လှုပ်တော့ ပြေးလို့ရမယ်ထင်ပြီးပြေးတယ်။ ရှေ့ကိုပြေးရင် နောက်ကိုပြန်ရောက်တယ်။ အဲ့စက္ကန့်ပိုင်းအတွင်းမှာပဲ အဆောက်အအုံကြီးက ပြိုကျတာ။ အပေါ်ထပ်ကနေ နှစ်ထပ်က ပြိုကျတဲ့ အချိန်မှာ အောက်ထပ်က အောက်ထဲ လုံးဝကျွံဝင်သွားပြီ။ ကျသွားတဲ့အချိန်မှာ ရသမျှကလေးတွေကို ရသမျှအချိန်မှာ ကလေးတွေကို အသံပေးပြီး ဆရာမနားလာပါဆိုပြီးခေါ်တယ်။ ပြေးလို့ရတဲ့ကလေးတွေကတော့ ဝရန်တာကနေ လွတ်အောင်ပြေးတယ်။ လွတ်တဲ့ကလေးတွေ ဒဏ်ရာရတဲ့ကလေးတွေလည်း ရှိတယ်” လို့ ပြောပါတယ်။

စစ်ကိုင်းမြို့က မြတ်ကိုယ်ပိုင်ကျောင်းပြိုကျရာမှာ မူကြိုကလေးငယ်တွေအပါအဝင် အတန်းကြီး တွေလည်း ပါဝင်ပြီး ကျောင်းပြိုကျချိန်မှာ ၂၈ ရက်နေ့အထိ ကလေးတွေအသံကြားနေရပေမဲ့  ၂၉ ရက် ရောက်ချိန်မှာတော့ ကယ်မယ့်သူမရှိတဲ့အပြင် ကလေးငယ်တွေရဲ့ အသံတွေလည်း တိတ်ဆိတ်သွားခဲ့တယ်လို့ ဆိုပါတယ်။

မတ် ၃၀ ရက်နေ့မှာတော့ ကျောင်းပတ်ဝန်းကျင်မှာ အပုပ်နံ့တွေရလာနေပြီး သေဆုံးသွားတဲ့ ကလေးမိဘတွေကတော့ ကလေးတွေ နောက်ဆုံးရှိခဲ့တဲ့နေရာမှာ လာရောက်စောင့်ဆိုင်းနေကြပါတယ်။

ကျောင်းပြိုကျရာမှာ ပါသွားတဲ့ ၄ နှစ်သား မူကြိုကလေးငယ်တယောက်ရဲ့ ဖခင်က “၄ နှစ်ကျော်ကျော်လေးပဲ ရှိသေးတယ်။ ထားတာ ၃ ယောက်ထားတာကို သမီး ၂ ယောက်က လွတ်တယ်။ အောက်ဆုံးထပ်မှာ ထုတ်ပြီးသား။ အငယ်ဆုံးကလေးတွေ Kg အပျော်ကျောင်းတွေပေါ့နော်၊ အဲ့ဒါကျတော့ အောက်ထပ်မှာ သွားထည့်တာ။ ဘာမှ မလုပ်ရသေးဘူးပေါ့။ ဆရာများသားသေ။ ခုက မြင်တဲ့ဟာတွေကို အရင်လုပ်တာ။ မနက်က ပညာရှင်တွေလာတာ ပြန်သွားပြီလားမသိဘူး။ ဆရာမကြီးကတော့ ထုတ်သွားပြီ။ အဲ့ဒါကိုထုတ်ပြီးရင် ဟိုဟာကိုဖြိုမှာတဲ့။ ဟိုဟာကိုဖြိုပြီးရင် ဒါကိုကုတ်ထုတ်မှာတဲ့။ ဒီနားကနေ ဖောက်မှာတဲ့။ အဲ့လိုတော့ ပြောတာပဲ” လို့ ပြောပါတယ်။

စစ်ကိုင်းမြို့အတွင်း စစ်ကိုင်းတိုင်းဝန်ကြီးချုပ်ယာဥ်တန်းက လှည့်လည်သွားလာနေပေမဲ့ ငလျင်ကြောင့် သေဆုံးသူတွေကို အချိန်မီကယ်ဆယ်နိုင်တာမရှိတဲ့အပြင် ပြိုပျက်သွားတဲ့ အရပ်သားနေအိမ်တွေ၊ နေအိမ်ပိနေတဲ့ အလောင်းတွေကို ကူညီကယ်ဆယ် ဖော်ယူနိုင်တာမရှိသေးဘဲ ပုံစံမပျက်ရှိနေပါသေးတယ်။ 

ပြိုကျသွားတဲ့ စစ်ကိုင်းတံတားဟောင်းချဥ်းကပ်လမ်းအနီးက ရေခဲမုန့်ဆိုင်တန်း၊ ဇေယျာသီရိရှင်ရုံတန်း စတဲ့နေရာတွေမှာ အပျက်အစီးနဲ့သေဆုံးသူတွေက လက်ရာမပျက်ရှိနေပြီး အပုပ်နံ့တွေ ထွက်လာနေပေမဲ့ ဖယ်ရှားရှင်းလင်းနိုင်တာမရှိသေးပါဘူး။

လတ်တလော စစ်ကောင်စီနဲ့ နီးစပ်ရာ ဝန်ကြီးဌာနတွေ၊ ဘုန်းတော်ကြီးကျောင်းတွေမှာသာ ရဲအင်အား၊ ပြည်သူ့စစ်အင်အားနဲ့ အပျက်စီးဖယ်ရှားနေတာတွေ ရှိနေပါတယ်။ 

စစ်ကိုင်းမြို့ခံ ပရဟိတကူညီကယ်ဆယ်ရေးအသင်းတွေလည်း လမ်းပေါ်မှာ မပြတ်သွားလာနေကြပေမဲ့ မြို့အပျက်အစီးနဲ့ မမျှတပဲ မတ် ၂၈ ရက် ငလျင်လှုပ်ပြီး ဒီနေ့အထိ စစ်ကိုင်းမြို့ကြီးဟာ အပျက်အစီးတွေနဲ့ မြို့ပျက်ကြီးသဖွယ်ရှိနေပါတယ်။