ပြီးခဲ့တဲ့ မတ်လဆန်းပိုင်းက တကျပ်သားကို ကျပ် ၆၆ သိန်းဝန်းကျင်သာ ရှိခဲ့တဲ့ ပြည်တွင်းအခေါက်ရွှေဈေးက မတ်လကုန်ပိုင်းမှာတော့ ကျပ် သိန်း ၇၀ ကျော်ထိ မြင့်တက်လာပါတယ်။

မြန်မာ့ရွှေဈေးဟာ ကမ္ဘာရွှေဈေးတက်တဲ့အရှိန်နဲ့ သီတင်းပတ် တပတ်အတွင်း ကျပ် ၂ သိန်း ဝန်းကျင် ထပ်မံ မြင့်တက်လာတာဖြစ်ပြီး တလအတွင်းမှာတော့ ကျပ် ၄ သိန်းခွဲဝန်းကျင်အထိ မြင့်တက်လာတာပါ။ တဖက်မှာတော့ ဒေါ်လာဈေးက အနည်းငယ် ပြန်ဆင်းသွားပါတယ်။

မနေ့ ညနေပိုင်း ပြင်ပရွှေဈေးကွက်အရ အကယ်ဒမီ မီးလင်းအခေါက်ရွှေဈေးဟာ တကျပ်သားကို ကျပ် ၇,၀၅၀,၀၀၀ ဝန်းကျင်ရှိပြီး၊ ဒေါ်လာဈေးကလည်း ကျပ် ၄၄၃၀ ဝန်းကျင်ကို ပြန်ကျဆင်းသွားပါတယ်။

ရန်ကုန်တိုင်း ရွှေလုပ်ငန်းရှင်များအသင်းရဲ့ ဓာတ်သတ္တု (ရွှေ) ရည်ညွှန်းဈေးကတော့  မတ် ၃၁ ရက်က တကျပ်သားကို ၅,၆၁၀,၀၀၀ ကျပ်သတ်မှတ်ထားပြီး၊ ကမ္ဘာ့ရွှေဈေးအနေနဲ့ကတော့ ပြီးခဲ့တဲ့ သီတင်းပတ်က တအောင်စကို ဒေါ်လာ ၃၀၂၀ အထက်မှာပဲရှိခဲ့ပေမဲ့ အခုတပတ်မှာ တအောင်စကို ဒေါ်လာ ၃၁၀၀ အထက်ကို ရောက်ရှိနေပါတယ်။