ထိုင်းနိုင်ငံ ဘန်ကောက်မြို့၊ ဘန်ဆိနယ်မြေထဲမှာ မတ် ၂၄ ရက်ညက မိုးကြိုးလွှဲကျင်းထဲဆင်းပြီး သန့်ရှင်းရေးလုပ်နေတဲ့ မြန်မာအလုပ်သမား ၂ ယောက် ဓာတ်လိုက်ခံရပြီး သေဆုံးသွားတယ်လို့ ထိုင်းသတင်းတွေမှာ ဖော်ပြပါတယ်။ 

ဘန်ဆိနယ်မြေ ဝုန်းဆဝမ်ရပ်ကွက် ပချားချင့် ၃၇ လမ်းထိပ်မှာ ဓာတ်လိုက်ခံရသူရှိကြောင်း မနေ့ ည ၁၁ နာရီ ၄၅ မိနစ်မှာ အကြောင်းကြားချက်ရတာကြောင့် တာဝန်ရှိသူတွေနဲ့အတူ သွားရောက်ကူညီကယ်ဆယ်ခဲ့တယ်လို့ လုမ့်ကတန်ကယ်ဆယ်ရေးအဖွဲ့က သတင်းထောက်ကို ပြောပါတယ်။ 

အခင်းဖြစ်တဲ့နေရာမှာ အနက် ၁၅ မီတာ အကျယ် ၃ မီတာရှိ မြေအောက်မိုးကြိုးလွှဲဓာတ်ကြိုးတွေ ချ ထားတဲ့ ကျင်းကြီးဖြစ်တယ်၊ အဲဒါဟာ ဘန်ကောက်မြို့တော်စည်ပင်အပိုင်ဖြစ်ပြီး အလုပ်သမား ၂ ယောက်က သန့်ရှင်းရေးဆင်းလုပ်ရင်း ပေါက်နေတဲ့ ဝါယာကြိုးနဲ့ ထိမိတာကြောင့် ဓာတ်လိုက် ခံရတာလို့ ဆိုပါတယ်။ 

ကယ်ဆယ်ရေးအဖွဲ့သား ၃ ယောက်ဟာ ကြိုးနဲ့လွှဲပြီး ဆင်းကယ်ကြတယ်၊ ဒါပေမဲ့ အဲဒီထဲက ဝိုင်ယာကြိုးအသီးသီးရဲ့  ဓာတ်အားလိုင်းတွေ ဖြတ်တောက်ချိန်စောင့်ဆိုင်းရတာကြောင့် အချိန် ၂ နာရီကြာမှာ သူတို့ခန္ဓာကိုယ်ကို ဆွဲထုတ်နိုင်တယ်၊ အဲဒီချိန်မှာ ၂ ယောက်လုံး အသက်မရှိ တော့ဘူးလို့ ဆိုပါတယ်။ 

လုပ်ဖော်ကိုင်ဖက်အလုပ်သမားတယောက်ရဲ့ပြောပြချက်အရ သူတို့ ၂ ယောက်ဟာ တွင်းထဲဆင်းပြီး ၅ မိနစ်လောက်အကြာမှာ ဓာတ်လိုက်ခံရလို့ ကယ်ပါဦးလို့ အော်သံကြားရတယ်။ သူတို့တွေ  ကျင်းထဲသွားငုံ့ကြည့်တော့ ၂ ယောက်လုံးလဲပြီး ငြိမ်သက်နေပြီလို့ ဆိုပါတယ် ။ 

အဆိုပါအလုပ်သမား ၂ ယောက်မှာ အသက် ၄၇ နှစ်ရွယ်နဲ့  အသက် ၂၅ မှ ၃၀ ခန့် အရွယ် မြန်မာအလုပ်သမားတွေဖြစ်တယ်။ သူတို့အလောင်းကို ရဲဆေးရုံ ပို့ဆောင်ထားပြီး နာရေးကိစ္စအတွက် သက်ဆိုင်ရာမိသားစုဝင်တွေကို ဆက်သွယ်နေတယ်လို့  ချနယ်လ် ၈ ထိုင်းတီဗွီသတင်းမှာ ဖော်ပြပါတယ်။ 

Source:  CH8 Thai TV News