အိန္ဒိယနိုင်ငံ မီဇိုရမ်ပြည်နယ် အိုင်ဇောမြို့နယ် ရှီမွေးစစ်ဘေးရှောင်စခန်းမှာ ဂတ်စ်အိုး ပေါက်ကွဲမှုကြောင့် မီးလောင်ပြီး စစ်ဘေးရှောင်နေအိမ် ၈ လုံး ပျက်စီးဆုံးရှုံးခဲ့တယ်လို့ စစ်ဘေးရှောင်တွေဆီက သိရပါတယ်။

ဖေဖော်ဝါရီ ၂၁ ရက်နေ့ ညနေ အိန္ဒိယစံတော်ချိန် ၆ နာရီခွဲ ( မြန်မာစံတော်ချိန် ၇ နာရီခွဲ) လောက်မှာ အလှူရှင်က ထောက်ပံ့ပစ္စည်းတွေ လာရောက်လှူဒါန်းလို့ ပစ္စည်းတွေယူဖို့ စခန်းထဲက စစ်ရှောင်တွေ ခန်းမဆောင်တွင်းမှာ စုဝေးနေတဲ့အချိန် ဂတ်စ်အိုးပေါက်ကွဲပြီး မီးလောင်ကျွမ်းခဲ့တာဖြစ်ပါတယ်။

မီးလောင်မှုကြောင့် စစ်ဘေးရှောင်ပြည်သူတွေရဲ့ နေအိမ် ၈ လုံး ဆုံးရှုံးခဲ့ပြီး စစ်ဘေးရှောင် ပြည်သူ ၃၀ ကျော် အိုးမဲ့အိမ်မဲ့ဖြစ်ခဲ့ကြရတယ်လို့   သိရပါတယ်။

စစ်ဘေးရှောင်တွေနဲ့ နီးစပ်သူတဦးက “အိုင်ဇောဘက်က ပါစတာတယောက်က ကူညီဖို့ ယောက်လာတယ်၊ သူတို့ပစ္စည်းဝေမျှဖို့ ခန်းမဆောင်မှာ သူတို့သွားကြတာပေါ့။ အိမ်မှာဘယ်သူမှမရှိဘူး၊ အဲ့ဒီအချိန်မှာ ဂတ်စ်အိုးပေါက်ပြီးတော့ မီးလောင်သွားတာ။ ဒီမှာ စစ်ဘေးရှောင်တွေက ဂတ်စ်နဲ့ပဲ ထမင်းချက်ကြတာလေ။ သူတို့ပေါက်ကွဲသံကြားလို့ သိတဲ့အချိန်မှာ အိမ်က ၈ အိမ်လောက်က အကုန်လုံးမီးလောင်သွားတယ်၊ အကုန်လုံး ဘာတခုမှ မကျန်ဘူး” လို့ ပြောပါတယ်။

မီးလောင်မှုကို ရှီမွေးလူငယ်အသင်း၊ အုပ်ချုပ်ရေးမှူးအဖွဲ့အစည်းတွေနဲ့ စစ်ရှောင်ပြည်သူတွေက ဝိုင်းဝန်းငြှိမ်းသတ်ခဲ့တယ်လို့ သိရပါတယ်။

ရှီမွေးစစ်ဘေးရှောင်စခန်းမှာ အိမ်ခြေ ၁၀၀ ကျော်ရှိပြီး ချင်းပြည်နယ် မတူပီမြို့နယ်က ပြည်သူတွေ နေထိုင်ကြတယ်လို့ သိရပါတယ်။