Home
မြန်မာသတင်း
ကန်ကျနပူရီတွင် တရားမဝင်မြန်မာ ၁၇ ဦး ဖမ်းဆီးခံရ
DVB
·
February 15, 2024
workers 1522024

ထိုင်းအနောက်ပိုင်း၊ ကန်ကျနပူရီခရိုင်၊ ဆန်ခလပူရီမြို့နယ်ထဲမှာ ဖေဖော်ဝါရီ ၁၄ ရက် မနက်က တရားမဝင် ဝင်ရောက်လာတဲ့ မြန်မာနိုင်ငံသား ၁၇ ဦး လမ်းပြ ၂ ဦးနဲ့အတူ ဖမ်းဆီးခံခဲ့ရတယ်လို့  ကန်ကျနပူရီဒေသတွင်းသတင်းမှာ ဖော်ပြပါတယ်။ 

နယ်မြေထဲမှာ တရားမဝင်အလုပ်သမားတွေ ဝင်ရောက်လာဖို့ရှိကြောင်း ကျေးရွာလုံ ခြုံရေးအဖွဲ့ဝင်တွေက သတင်းပေးပို့ထားတဲ့အတွက် မြို့နယ်လုံခြုံရေးတပ်ဖွဲ့ဝင်တွေ၊ လဝက ရဲတပ်ဖွဲ့ဝင်၊ နယ်မြေခံရဲ နဲ့ အုပ်ချုပ်ရေးရုံးက တာဝန်ရှိသူတွေပါတဲ့ ပူးပေါင်းအဖွဲ့ဝင်တွေဟာ ၆ ဖွဲ့ ခွဲပြီး ၆ နေရာမှာ စောင့်ကြပ်စစ်ဆေးခဲ့တယ်လို့ မြို့နယ် ဒုလုံခြုံရေးမှူး နိုင်းနာ့သ်ဖတ် ငမ်းဆီရို့တ်က သတင်းထောက်တွေကို ပြောပါတယ်။

အဲဒီမနက်စောစောမှာတော့ ဆန်ခလပူရီမြို့နယ် နောင်လူးအုပ်စု ဖားနစ်လမ်းထဲကို မသင်္ကာဖွယ် ကား ၅ စီး ဝင်ရောက်လာကြောင်း၊  ရှေ့ကား ၃ စီးဟာ တာဝန်ရှိသူတွေကို တွေ့တာနဲ့  ကားကိုအရှိန်မြှင့်ပြီး ထွက်ပြေးသွားကြတယ်၊ ကျန်တဲ့ တိုယိုတာကား ၁ စီး နဲ့ အီဇူးစူးဒီမက်စ် ကား ၁ စီးတို့သာ အစစ်ဆေးခံတယ်လို့ ဆိုပါတယ်။ 

တိုယိုတာကားမောင်းသူမှာ အောင်နိုင်ဝင်း (၄၀ နှစ်) ဆိုသူ မြန်မာအမျိုးသား မောင်းနှင်ပြီး အီဇူးစူးကားကိုတော့ နိုင်ဝင်း ဆရီဆအတ် (၄၀ နှစ်) ဆိုသူ မွန်အမျိုးသား ၁ ဦးတို့ မောင်းနှင်လာပါတယ်။ 

အဆိုပါကား ၂ စီးပေါ်ကနေ တရားမဝင် မြန်မာအလုပ်သမား ၁၇ ဦး ( ကျား - ၁၄ ၊ မ -  ၃ ) တို့ကို ခရီးဆောင်အိတ်တွေနဲ့အတူ ဖမ်းဆီးရမိတယ်လို့ ဆိုပါတယ်။ 

ယာဉ်မောင်း ၂ ဦးရဲ့ ဖွင့်ဟဝန်ခံချက်အရ သူတို့တွေဟာ မြန်မာပြည်ကနေ ထိုင်းနိုင်ငံအတွင်းပိုင်းမှာ အလုပ်သွားလုပ်ဖို့ ရောက်လာကြောင်း၊ ပွဲစားအဆက်အသွယ်နဲ့  ဘုရားသုံးဆူနယ်စပ်ဂိတ်ကနေ သွားကြိုလာပြီး နောင်လူးအုပ်စု ဝမ်းကကျေးရွာရှိ လှေဆိပ်ကို ပို့ပေးဖို့ ဖြစ်တယ်၊ သယ်ခအဖြစ် ၁ ဦးလျှင် ဘတ် ၁၅၀၀ ရတယ်၊ လှေဆိပ်မှာ ပွဲစားက လှေနဲ့လာကြိုမယ်လို့ ဆိုပါတယ်။ 

သူတို့ဟာ အခုလို တရားမဝင်သူတွေကို သယ်ဆောင်ပေးတာ ဒီတကြိမ်ပါရင် ၆ ကြိမ်ရှိသွားပြီလို့ ဝန်ခံပါတယ်။ 

တာဝန်ရှိသူတွေက သူတို့ကို ဆန်ခလပူရီရဲစခန်းကို ပို့ဆောင်ထားပြီး လဝကဥပဒေနဲ့ ဆက်လက်အရေးယူသွားမယ်လို့ ပြောသွားပါတယ်။ 

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024