အခြေခံပညာကျောင်းတွေရဲ့ ကျောင်းတွင်းစစ် နှစ်ဆုံးစာမေးပွဲနဲ့ အတန်းပြီးမြောက်မှု စစ်ဆေးတဲ့ စာမေးပွဲတွေကို ဒီနေ့ စတင်ဖြေဆိုနေပြီလို့ သိရပါတယ်။

၂၀၂၃-၂၄ ပညာသင်နှစ် အခြေခံပညာအတန်းတွေရဲ့ နှစ်ဆုံးစာမေးပွဲ၊ အတန်းပြီးမြောက်မှု စာမေးပွဲတွေကို ဒီနေ့ ဖေဖော်ဝါရီ ၁၃ ရက်နေ့မှာ တနိုင်ငံလုံးအတိုင်းအတာနဲ့ စတင်ကျင်းပနေပြီး တရက်ကို ၁ ဘာသာနှုန်းနဲ့ အခုလ ၂၀ ရက်နေ့အထိ ကျင်းပမယ်လို့ စစ်ကောင်စီပညာရေးဌာနက ကြေညာထားပါတယ်။

အခြေခံပညာမူလတန်း အဆင့်ပြီးမြောက်မှုစာမေးပွဲ Grade-5 ကို အခုလ ၂၂ ရက်ကနေ ၂၇ ရက်အထိ ကျင်းပမှာဖြစ်ပြီး အလယ်တန်းအဆင့် ပြီးမြောက်မှု Grade-9 စာမေးပွဲကို အခုလ ၂၂ ရက်ကနေ ၂၈ ရက်အထိကျင်းပမှာဖြစ်ကာ ကျန်တဲ့အတန်းတွေရဲ့ စာမေးပွဲတွေကိုတော့ ဒီနေ့ကနေ စတင်ကျင်းပနေတာပါ။

အခြေခံပညာအထက်တန်းအဆင့်ပြီးမြောက်မှု စစ်ဆေးခြင်း Grade-12 စာမေးပွဲကို အခုလ ၁၃ ရက်ကနေ ၂၀ ရက်အထိ ကျင်းပမှာဖြစ်ပြီး တက္ကသိုလ်ဝင်စာမေးပွဲကိုတော့ မတ်လထဲ ကျင်းပမယ်လို့ မြန်မာနိုင်ငံစာစစ်ဦးစီးဌာနက ကြေညာထားပါတယ်။

လက်ရှိမှာ တိုက်ပွဲတွေဖြစ်နေတဲ့ ရခိုင်ပြည်နယ်မြောက်ပိုင်း၊ ကယားပြည်နယ်(ကရင်နီ) ဘက်က ကျောင်းတွေ တော်တော်များများကတော့ ကျောင်းဖွင့်နိုင်တာမျိုးမရှိသလို စာမေးပွဲဖြေဆိုလိုတဲ့ ကျောင်းသားကျောင်းသူတွေကို နီးစပ်တဲ့ ဒေသကကျောင်းတွေမှာ စာမေးပွဲဖြေဖို့ လုပ်ဆောင်ပေးထားတယ်လို့ သိရပါတယ်။