စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးကျေးရွာအုပ်စုရှိ စစ်တပ်မီးရှို့သွားတဲ့ မီးလောင်အိမ်ခြေ ၁၅၈ အိမ်က မိသားစုတွေအတွက် ဒီဇင်ဘာ ၂၆ ရက်က စောင်တွေ လှူဒါန်းပေးခဲ့တယ်လို့ အညာပစ်တိုင်းထောင်လေးများအဖွဲ့ထံက သိရပါတယ်။

ညောင်ပင်ကြီးကျေးရွာအုပ်စုမှာ စစ်တပ်မီးရှို့ခံရတဲ့ အိမ်ခြေ ၆၅၀ ရှိပြီး ပထမအကြိမ်မှာ အိမ်ခြေ ၆၂ လုံး၊ ဒုတိယအကြိမ်မှာ အိမ်ခြေ ၁၇၀၊ တတိယအကြိမ်မှာ အိမ်ခြေ ၂၆၀၊ စတုတ္ထအကြိမ်မှာ ၁၅၈ အိမ်အတွက် အသီးသီးလှူဒါန်းပေးခဲ့တယ်လို့ သိရပါတယ်။

အညာပစ်တိုင်းထောင်လေးများအဖွဲ့ တာဝန်ရှိသူက “ခုလိုမျိုး လှူဒါန်းနိုင်ဖို့ စောင်အထည် ၄၀၀ ကျော် လှူဒါန်းပေးတဲ့ Central Valley Families California USA နဲ့ USA ရောက် မြန်မာမိသားစုများအား ကျေးဇူးအထူးတင်ရှိပါတယ်၊ လှူဒါန်းနိုင်တဲ့အတွက် ဝမ်းသာပီတိ ဖြစ်ရပါတယ်။ ကျနော်တို့ရဲ့ပြည်သူတွေ ဒီဆောင်းကို အန်တုနိုင်ပြီ ဖြစ်ပါတယ်။ ပြည်သူမှ ပြည်သူပေးသော မေတ္တာအနွေးဓာတ်များနဲ့အတူ စစ်အာဏာရှင်ဆန့်ကျင်ရေး နွေဦးတော်လှန်ရေးမှာ ဆက်လက်ပါဝင် တိုက်ပွဲဝင်ပေးကြဖို့ တောင်းဆိုလိုပါတယ်ဗျ” လို့ ပြောပါတယ်။

အညာပစ်တိုင်းထောင်လေးများအဖွဲ့ဟာ ဆားလင်းကြီးမြို့နယ်ထဲက စစ်ဘေးရှောင် ပြည်သူတွေရဲ့ စားဝတ်နေရေးအတွက် ကူညီထောက်ပံ့ပေးနေတယ့်အဖွဲ့ ဖြစ်ပါတယ်။